Read Papantla Totonac Genesis 47 Bible Online

Genesis 47 - Papantla Totonac bible

Genesis 47

¹E ora ei Jose a drenta i a partisipa Farao i a bisa: "Mi tata, mi ruman hombernan, nan karnenan, nan bakanan i tur loke nan tin, a bin for di tera di Kanaan; i mira, nan ta na tera di Gosen."

²I el a skohe sinku homber for di entre su ruman hombernan i a presenta nan na Farao.

³E ora ei Farao a bisa e rumannan di Jose: "Kiko ta boso ofishi?" I nan a bisa Farao: "Bo sirbidonan ta wardado di karne, tantu nos komo nos tatanan."

⁴I nan a bisa Farao: "Nos a bin pa keda biba pa un tempu na e tera aki, pasobra no tin yerba pa bo sirbidonan su karnenan, pasobra e hamber ta masha pisa na tera di Kanaan. Pesei anto, pa fabor, laga bo sirbidonan keda biba na tera di Gosen."

⁵E ora ei Farao a bisa Jose: "Bo tata i bo rumannan a bin serka bo.

⁶Tera di Egipto ta na bo disposishon; laga bo tata i bo rumannan keda biba na e miho parti di e tera, laga nan keda biba na tera di Gosen; anto si bo sa ku tin hombernan kapas entre nan, pone mi bestianan na nan enkargo."

⁷E ora ei Jose a trese su tata Jakob i a present'e na Farao, i Jakob a bendishona Farao.

⁸Farao a bisa Jakob: "Kuantu ana bo tin?"

⁹I Jakob a bisa Farao: "E dianan di mi peregrinashon ta shent'i trinta ana; e ananan di mi bida tabata poko i trabahoso i nan no a alkansa e ananan di bida di mi tatanan den e dianan di nan peregrinashon."

¹⁰I Jakob a bendishona Farao i a bai for di su presensia.

¹¹Asina Jose a perkura pa su tata i su rumannan hana luga di biba i a duna nan un propiedat na tera di Egipto, na e miho parti di e tera, na tera di Rameses, manera Farao a ordena.

¹²I Jose a provee pan pa su tata, su rumannan i henter kas di su tata, segun e kantidat di yu ku nan tabatin.

¹³Awor no tabatin pan na henter e tera, pasobra e hamber tabata masha pisa mes, asina ku tera di Egipto i tera di Kanaan tabata desmaya pa motibu di hamber.

¹⁴Anto Jose a rekohe tur e plaka ku a wordu hana na tera di Egipto i na tera di Kanaan pa e mainshi ku e hendenan tabata kumpra, i Jose a hiba e plaka den Farao su kas.

¹⁵I ora plaka a kaba na tera di Egipto i na tera di Kanaan, tur e egipsionan a bin serka Jose i a bisa: "Duna nos pan, pasobra pakiko nos mester muri bo dilanti? Pasobra nos plaka a kaba."

¹⁶E ora ei Jose a bisa: "Trese boso bestianan, i lo mi duna boso pan en kambio di boso bestianan, si boso plaka a kaba."

¹⁷Asina nan a hiba nan bestianan pa Jose, i Jose a duna nan pan en kambio di e kabainan, e krianan di bestia chikitu, e krianan di baka i e burikunan; i e ana ei el a provee pan pa nan en kambio di tur nan bestianan.

¹⁸I ora ku e ana ei a kaba, nan a bin serka dje su siguiente ana i a bis'e: "Nos no ta skonde pa mi senor ku nos plaka a kaba i ku e bestianan ta di mi senor. No a sobra nada mas pa mi senor ku nos kurpanan i nos kunukunan.

¹⁹Pakiko nos mester muri bo dilanti, tantu nos komo nos kunuku? Kumpra nos i nos kunuku pa nos hana pan, i nos i nos kunuku lo ta esklabu di Farao. Duna nos simia, pa nos keda na bida i no muri, i pa e kunuku no keda desola."

²⁰Asina Jose a kumpra henter tera di Egipto pa Farao, pasobra tur e egipsionan a bende nan kunuku, komo ku e hamber tabata pisa riba nan. Asina e tera a bira di Farao.

²¹I pa loke ta e pueblo, el a pasa nan pa e statnan di Egipto, di un ekstremo di e frontera te na e otro.

²²Solamente e kunuku di e saserdotenan e no a kumpra, pasobra e saserdotenan tabatin un porshon ku nan a hana di Farao i nan tabata biba di e porshon ku Farao a duna nan. Pesei nan no a bende nan kunuku.

²³Anto Jose a bisa e pueblo: "Mira, awe mi a kumpra boso i boso kunukunan pa Farao; awor, ata simia pa boso, i boso lo sembra kunuku.

²⁴I ora boso kosecha, boso lo duna Farao un di sinku parti, i kuater parti lo ta di boso komo simia pa kunuku i komo boso kuminda i komo kuminda pa esnan di boso kas i komo kuminda pa boso yu chikitunan."

²⁵I nan a bisa: "Bo a salba nos bida! Laga nos hana grasia den bista di mi senor i nos lo ta esklabu di Farao."

²⁶Anto Jose a hasi esei un statuto pa tera di Egipto, valido te dia djawe, ku Farao mester hana un di sinku parti; solamente e kunuku di e saserdotenan no a bira di Farao.

²⁷Awor Israel a keda biba na tera di Egipto, na Gosen, i nan a atkiri propiedat einan i tabata fruktifero i a multiplika masha hopi mes.

²⁸I Jakob a biba dieshete ana na tera di Egipto; asina ku e dianan di Jakob, e ananan di su bida, tabata shent'i kuarent'i shete ana.

²⁹Ora ku e tempu ku Israel tabata pa muri a yega, el a yama su yu Jose i a bis'e: "Pa fabor, si mi a hana grasia den bo bista, pone bo man awor bou di mi bel di pia, i tratami ku miserikordia i fieldat. Pa fabor, no derami na Egipto,

³⁰ma ora mi bai sosega serka mi tatanan, sakami for di Egipto, i derami den nan tereno-pa-dera-morto." I Jose a bis'e: "Lo mi hasi manera bo a bisa."

³¹I Israel a bisa: "Hurami!" I el a hura. E ora ei Israel a buig den adorashon na kabes di kama.