Read Papantla Totonac Genesis 48 Bible Online

Genesis 48 - Papantla Totonac bible

Genesis 48

¹Awor a sosode ku despues di e kosnan aki nan a bisa Jose: "Mira, bo tata ta malu." Asina el a bai ku su dos yu hombernan, Manases i Efrain.

²Ora nan a bisa Jakob: "Ata bo yu Jose a bin serka bo," Israel a hasi tur su esfuerso i a lanta sinta riba kama.

³Anto Jakob a bisa Jose: "Dios Todopoderoso a parese na mi na Luz, na tera di Kanaan i a bendishonami,

⁴i El a bisami: 'Mira, lo Mi hasibo fruktifero i numeroso, i lo Mi hasibo un multitut di nashonnan i lo Mi duna bo desendientenan despues di bo e tera aki komo propiedat eterno.'

⁵"I awor bo dos yu hombernan, ku a nase pa bo na tera di Egipto prome ku mi a bin serka bo na Egipto, ta di mi; Efrain i Manases lo ta di mi, meskos ku Ruben i Simeon.

⁶Ma bo desendientenan ku a nase despues di nan lo ta di bo; na e nomber di nan ruman hombernan nan lo wordu yama den nan erensia.

⁷Awor pa loke t'ami, ora mi tabata bin di Padan, Raquel a muri bai lagami na tera di Kanaan na kaminda, ora tabata falta djis un pida pa yega Efrata; i ayanan mi a der'e, na kaminda pa Efrata (esta, Betlehem)."

⁸Ora ku Israel a mira e yu hombernan di Jose, el a puntra: "Ta ken esakinan ta?"

⁹I Jose a bisa su tata: "Ta mi yu hombernan ku Dios a dunami aki." I Israel a bisa: "Pa fabor, trese nan serka mi, pa mi bendishona nan."

¹⁰Awor Israel su bista tabata asina skur di biehes ku e no por a mira. I Jose a hiba nan te serka di dje, i el a sunchi nan i a brasa nan.

¹¹Anto Israel a bisa Jose: "Nunka mi no a spera di mira bo kara, i ata, Dios a lagami mira asta bo yunan."

¹²E ora ei Jose a hala nan kita for di meimei di su rudianan i a buig ku su kara te na suela.

¹³I Jose a tuma nan tur dos, Efrain ku su man drechi na Israel su man robes, i Manases ku su man robes na Israel su man drechi, i a hiba nan te serka di dje.

¹⁴Ma Israel a saka su man drechi pone riba kabes di Efrain, kende tabata esun mas chikitu, i su man robes riba kabes di Manases, krusando su mannan intenshonalmente, ounke Manases tabata e primogenito.

¹⁵I el a bendishona Jose i a bisa: "E Dios dilanti di Kende mi tatanan Abraham i Isaak tabata kana, e Dios, Kende tabata mi wardado henter mi bida te dia djawe,

¹⁶e Angel ku a redimimi di tur maldat, bendishona e muchanan; i ku mi nomber sigui biba den nan, i nomber di mi tatanan Abraham i Isaak; i ku nan krese bira un multitut meimei di tera."

¹⁷Ora Jose a mira ku su tata a pone su man drechi riba kabes di Efrain, e no a keda kontentu ku esaki; i el a gara man di su tata pa kit'e for di kabes di Efrain pon'e riba kabes di Manases.

¹⁸I Jose a bisa su tata: "Asina no, mi tata, pasobra esaki ta e primogenito. Pone bo man drechi riba su kabes."

¹⁹Ma su tata a nenga i a bisa: "Mi sa, mi yu, mi sa; e tambe lo bira un pueblo i e tambe lo ta grandi. Sinembargo, su ruman mas chikitu lo ta mas grandi kune i su desendientenan lo bira un multitut di nashonnan."

²⁰I e dia ei el a bendishona nan, bisando: "Den bo nomber Israel lo pronunsia bendishon, bisando: 'Ku Dios hasibo manera Efrain i Manases!'" Asina el a pone Efrain prome ku Manases.

²¹E ora ei Israel a bisa Jose: "Mira, mi ta bai muri, ma Dios lo ta ku boso i lo hiba boso bek na tera di boso tatanan.

²²I lo mi dunabo un porshon mas ku bo rumannan, kual mi a kita for di man di e amoreonan ku mi spada i mi bog."