Read Papantla Totonac Genesis 49 Bible Online

Genesis 49 - Papantla Totonac bible

Genesis 49

¹E ora ei Jakob a manda yama su yu hombernan i a bisa: "Boso bin huntu pa mi konta boso kiko ta bai pasa ku boso den e dianan ku ta bin.

²"Boso bin huntu i tende, o yu hombernan di Jakob; i skucha boso tata Israel.

³"Ruben, bo ta mi primogenito, mi forsa i e prinsipio di mi vigor, e ekselensia di dignidat i e ekselensia di poder.

⁴Turbulente manera awa, lo bo no sobresali, pasobra bo a subi kama di bo tata; e ora ei bo a kontamin'e--el a subi mi kama.

⁵"Simeon i Levi ta ruman; nan armanan ta instrument di violensia.

⁶No laga mi alma tin parti den nan konseho; no laga mi gloria uni ku nan asamblea; pasobra den nan rabia nan a mata hende, i den nan kapricho nan a manka buey.

⁷Maldishona sea nan rabia, pasobra esei ta feros; i nan furia, pasobra esei ta kruel. Lo Mi plama nan den Jakob, i distribui nan den Israel.

⁸"Juda, bo rumannan lo elogiabo; bo man lo ta riba nek di bo enemigunan; e yu hombernan di bo tata lo buig pa bo.

⁹Juda ta un yu di leon; for di bo proi, mi yu, bo a subi bai ariba. E ta gatia, e ta drumi abou manera leon, i manera leon, ken ta tribi lant'e?

¹⁰E septer lo no kita for di Juda, ni e bara di gobernado for di meimei di su pia, te ora Silo bin, i nashonnan lo obedes'E.

¹¹E ta mara su buriku na e mata di wendruif, i su yu di buriku na e mata di wendruif di mas miho; e ta laba su pananan den bina, i su mantel den e sanger di druif.

¹²Su wowonan ta mas skur ku bina, i su djentenan mas blanku ku lechi.

¹³"Zabulon lo biba kantu di laman; i e lo ta un haf pa barku, i su frontera lo ekstende te na Sidon.

¹⁴"Isakar ta un buriku fuerte, ku ta kai drumi entre e kuranan di karne.

¹⁵Ora ku el a mira ku un luga di deskanso tabata bon i ku e tera tabata agradabel, el a dobla su lomba pa hiba karga, i a bira un esklabu ku ta hasi trabou forsa.

¹⁶"Dan lo huzga su pueblo, komo un di e tribunan di Israel.

¹⁷Dan lo ta un kolebra riba kaminda, un vibora riba bereha, ku ta morde hilchi di kabai, asina ku su koredo ta kai ku lomba.

¹⁸"Riba Bo salbashon mi ta spera, O SENOR.

¹⁹"Pa loke ta Gad, bandidonan lo atak'e, ma e lo sali ataka nan hilchi.

²⁰"Pa loke ta Aser, su kuminda lo ta riku, i e lo produsi delisianan digno di un rei.

²¹"Neftali ta un bina ku nan a laga los; e ta papia palabranan bunita.

²²"Jose ta un rama fruktifero, un rama fruktifero na un fuente; su takinan ta kore pasa ofer di muraya.

²³Yen di amargura e tiradonan di flecha a atak'e, i a tira riba dje i a persiguie;

²⁴ma su bog a keda firme, i su brasanan a move ku rapides dor di e mannan di Esun Poderoso di Jakob, (for di ayanan e Wardado ta, e Baranka di Israel),

²⁵dor di e Dios di bo tata ku ta yudabo, dor di e Todopoderoso ku ta bendishonabo ku bendishonnan di shelu ariba, bendishonnan di e abismo ku ta keda abou, bendishonnan di e pechunan i di e matris.

²⁶E bendishonnan di bo tata a surpasa e bendishonnan di mi antepasadonan te na e frontera di mas aleha di e serunan eterno. Nan lo keda riba kabes di Jose, i riba korona di kabes di esun distingui entre su rumannan.

²⁷"Benjamin ta un lobo ku ta habraka; mainta e ta devora su proi, i atardi e ta parti e botin."

²⁸Esakinan ta tur e diesdos tribunan di Israel, i esaki ta loke nan tata a bisa nan dia ku el a bendishona nan. El a bendishona nan, kada un ku e bendishon ku ta pas p'e.

²⁹Despues el a ordena nan i a bisa nan: "Pronto lo mi wordu reuni ku mi pueblo; derami serka mi tatanan den e kueba ku ta keda den e kunuku di Efron e heteo,

³⁰den e kueba ku ta keda den e kunuku di Makpela, kual ta keda dilanti di Mamre na tera di Kanaan, kual Abraham a kumpra huntu ku e kunuku serka Efron e heteo, komo pida tereno-pa-dera-morto.

³¹Aya nan a dera Abraham i su esposa Sara, aya nan a dera Isaak i su esposa Rebeka i aya mi a dera Lea;

³²e kunuku i e kueba ku ta keda den dje a wordu kumpra serka e yu hombernan di Het."

³³Ora Jakob a kaba di duna ordu na su yu hombernan, el a hala su pianan pone riba kama i a hala su ultimo rosea i a wordu uni ku su pueblo.