Read Papantla Totonac Genesis 50 Bible Online

Genesis 50 - Papantla Totonac bible

Genesis 50

¹E ora ei Jose a tira su mes riba kara di su tata, i a yor'e i a sunch'e.

²I Jose a duna ordu na su sirbidonan, e dokternan, pa balsema su tata. I e dokternan a balsema Israel.

³Awor a tuma kuarenta dia pa hasi esaki, pasobra esei ta e temporada nesesario pa balsema. I e egipsionan a yor'e setenta dia largu.

⁴I ora ku e dianan di tene rou p'e a pasa, Jose a papia ku e hendenan di kas di Farao, bisando: "Si awor mi a hana grasia den boso bista, pa fabor, papia ku Farao, bisando:

⁵'Mi tata a hasimi hura, bisando: "Mira, mi ta serka di muri; den mi graf ku mi a koba pa mi mes na tera di Kanaan, ayanan bo mester derami." Pesei anto, pa fabor, lagami bai dera mi tata; despues lo mi bolbe.'"

⁶I Farao a bisa: "Bai dera bo tata, manera el a hasibo hura."

⁷Asina Jose a bai pa dera su tata, i huntu kune a bai tur e sirbidonan di Farao, e ansianonan di su kas i tur e ansianonan di tera di Egipto,

⁸i tur e hendenan di kas di Jose, su ruman hombernan i e hendenan di kas di su tata; solamente nan yu chikitunan, nan karnenan i nan bakanan nan a laga na tera di Gosen.

⁹Tambe a bai huntu kune tantu garoshinan komo koredonan di kabai, i tabata un multitut masha grandi mes.

¹⁰Ora nan a yega na e plenchi-di-bati-mainshi di Atad, ku ta keda na e otro banda di Jordan, nan a lamenta ayanan ku un lamentashon masha grandi i solem; i Jose a tene shete dia di rou pa su tata.

¹¹Awor ora ku e habitantenan di e tera, e kananeonan, a mira nan ta tene rou riba e plenchi-di-bati-mainshi di Atad, nan a bisa: "Esaki ta un rou masha pisa pa e egipsionan." Pesei nan a yama e luga ei Abel-mizraim ku ta keda na e otro banda di Jordan.

¹²I asina su yu hombernan a hasi p'e manera el a ordena nan;

¹³pasobra su yu hombernan a kargu'e hiba tera di Kanaan, i a der'e den e kueba di e kunuku di Makpela dilanti di Mamre, kual Abraham a kumpra huntu ku e kunuku serka Efron e heteo, komo pida tereno-pa-dera-morto.

¹⁴I despues ku el a dera su tata, Jose a bai bek Egipto, e ku su ruman hombernan, i tur esnan ku a bai kune pa dera su tata.

¹⁵Ora Jose su rumannan a mira ku nan tata a muri, nan a bisa: "Basta Jose no tene renkor kontra nos i paga nos bek pa tur e maldat ku nos a komete kontra dje!"

¹⁶Pesei nan a manda rospondi pa Jose, bisando: "Prome ku bo tata a muri el a ordena, bisando:

¹⁷'Asin'aki boso mester bisa Jose: "Mi ta rogabo, pa fabor, pordona e transgreshon di bo rumannan i nan pika; pasobra nan a hasi malu ku bo."' I awor, pa fabor, pordona e transgreshon di e sirbidonan di e Dios di bo tata." I Jose a yora ora nan a papia asina kune.

¹⁸E ora ei su rumannan tambe a bin i a tira nan kurpa abou su dilanti i a bisa: "Mira, nos ta bo sirbidonan."

¹⁹Ma Jose a bisa nan: "No tene miedu; t'ami ta na luga di Dios anto?

²⁰I pa loke ta boso, boso a plania maldat kontra mi, ma Dios a plani'e pa bon, pa laga tur kos sosode manera a resulta awe, pa preserva bida di hopi hende.

²¹Pesei anto, no tene miedu; lo mi provee pa boso i pa boso yu chikitunan." Asina el a konsola nan i a papia karinosamente ku nan.

²²Awor Jose a keda biba na Egipto, e ku e hendenan di kas di su tata, i Jose a biba shent'i dies ana.

²³I Jose a mira e di tres generashon di e yu hombernan di Efrain; tambe e yu hombernan di Makir, yu homber di Manases, a wordu kria riba Jose su skochi.

²⁴I Jose a bisa su ruman hombernan: "Mi ta bai muri, ma Dios siguramente lo perkura pa boso i lo saka boso for di e tera aki hiba na e tera ku El a priminti Abraham, Isaak i Jakob bou di huramentu."

²⁵E ora ei Jose a hasi e yunan di Israel hura, bisando: "Siguramente Dios lo perkura pa boso, i boso mester hiba mi wesunan for di akinan."

²⁶I Jose a muri na edat di shent'i dies ana, i nan a balsem'e i a pon'e den un kaha di morto na Egipto.