Read Papantla Totonac Genesis 6 Bible Online

Genesis 6 - Papantla Totonac bible

Genesis 6

¹Awor a sosode ku ora hende a kuminsa multiplika riba superfisio di tera i a hana yu muhenan,

²e yu hombernan di Dios a mira ku e yu muhenan di hende tabata bunita; i nan a tuma esposanan pa nan mes, esun ku nan tabata kier a skohe.

³E ora ei SENOR a bisa: "Mi Spiritu lo no lucha ku hende pa semper, pasobra di berdat ta karni e ta; sinembargo, su dianan lo ta shent'i binti ana."

⁴Tabatin gigante riba tera den e dianan ei, i tambe despues, tempu ku e yu hombernan di Dios a uni ku e yu muhenan di hende, i esakinan a hana yu pa nan. Eseinan tabata hombernan poderoso i balente di tempunan aya, hombernan di fama.

⁵E ora ei SENOR a mira ku maldat di hende tabata grandi riba tera, i ku tur intenshon di e pensamentunan di su kurason tabata kontinuamente maldat so.

⁶I a duel SENOR ku El a traha hende riba tera i E tabata tristu den Su kurason.

⁷I SENOR a bisa: "Lo Mi destrui hende ku Mi a krea for di riba superfisio di tera, tantu hende komo bestia i tur loke ta lastra i parhanan di shelu, pasobra ta duel Mi ku Mi a traha nan."

⁸Ma Noe a hana grasia den bista di SENOR.

⁹Esakinan ta e generashonnan di Noe. Noe tabata un homber hustu, perfekto den su generashonnan: Noe tabata kana ku Dios.

¹⁰I Noe a engendra tres yu homber: Sem, Kam i Jafet.

¹¹Awor tera tabata korumpi den bista di Dios i tera tabata yen di violensia.

¹²Anto Dios a tira un bista riba tera, i mira, e tabata korupto, pasobra tur karni a korumpi nan kaminda riba tera.

¹³E ora ei Dios a bisa Noe: "E fin di tur karni a bin Mi dilanti, pasobra tera ta yen di violensia pa nan motibu; i mira, Mi ta bai destrui nan huntu ku tera.

¹⁴Traha pa bo mes un arka di palu di gofer; traha kamber den e arka i klafati'e di paden i pafo ku breu.

¹⁵I asin'aki bo mester trah'e: e largura di e arka mester ta 300 kodo, su hanchura 50 kodo i su haltura 30 kodo.

¹⁶Traha un bentana na e arka i akaba esei te na un kodo for di ariba; i pone e porta di e arka na su banda; trah'e ku un piso abou, i un di dos i un di tres piso.

¹⁷I mira, Ami, si, Ami ta bai trese un diluvio di awa riba tera, pa destrui tur karni, ku tin e rosea di bida, for di bou di shelu; tur loke tin riba tera lo perese.

¹⁸Ma lo Mi stablese Mi aliansa ku bo; i lo bo bai den e arka--abo ku bo yu hombernan i bo esposa, i esposanan di bo yu hombernan huntu ku bo.

¹⁹I di tur loke ta bibu di tur karni bo mester hiba dos di kada sorto den e arka, pa tene nan na bida huntu ku bo; nan mester ta machu i muhe.

²⁰Di e parhanan segun nan sorto, di e animalnan segun nan sorto i di tur loke ta lastra abou na suela segun nan sorto, dos di kada sorto lo bin serka bo pa asina tene nan na bida.

²¹I abo, hiba ku bo algu di tur sorto di kuminda ku ta di kome, i warda esaki pa bo mes; i esei lo sirbi komo alimento pa bo i pa nan."

²²Asina Noe a hasi; konforme tur loke Dios a orden'e, el a hasi.