Read Papantla Totonac Genesis 7 Bible Online

Genesis 7 - Papantla Totonac bible

Genesis 7

¹Despues SENOR a bisa Noe: "Bai den e arka, abo i tur hende di bo kas, pasobra ta abo so Mi a mira ku ta hustu Mi dilanti den e tempu aki.

²Di tur bestia limpi bo mester hiba shete par, machu i muhe; i di e bestianan ku no ta limpi, dos, un machu i un muhe;

³di e parhanan di shelu tambe shete par, machu i muhe, pa tene nan sorto na bida riba superfisio di henter tera.

⁴Pasobra aki shete dia mas lo Mi manda awaseru riba tera pa kuarenta dia i kuarenta nochi; i lo Mi destrui for di superfisio di tera tur ser bibu ku Mi a traha."

⁵I Noe a hasi konforme tur loke SENOR a orden'e.

⁶Awor Noe tabatin 600 ana tempu ku e diluvio di awa a bin riba tera.

⁷E ora ei Noe, ku su yu hombernan, su esposa i esposanan di su yu hombernan, a bai den e arka pa motibu di e awa di e diluvio.

⁸Di bestia limpi i bestia ku no ta limpi i di parha i tur loke ta lastra abou na suela,

⁹a bai dos-dos serka Noe den e arka, machu i muhe, manera Dios a ordena Noe.

¹⁰I a sosode ku despues di e shete dianan e awa di e diluvio a subi tera.

¹¹Den e di seis shen ana di bida di Noe, den e di dos luna, riba e di dieshete dia di e luna, riba e dia ei tur e fuentenan di e gran abismo a rementa, i e bentananan di shelu a wordu habri.

¹²I awaseru a kai riba tera kuarenta dia i kuarenta nochi.

¹³Riba e mesun dia ei Noe i Sem, Kam i Jafet, e yu hombernan di Noe, i esposa di Noe i e tres esposanan di su yu hombernan huntu ku nan, a bai den e arka--

¹⁴eseinan i tur bestia di mondi segun nan sorto, i tur bestia di kria segun nan sorto, i tur loke ta lastra riba tera segun su sorto, i tur parha segun su sorto, tur sorto di parha.

¹⁵Asina nan a bai den e arka serka Noe, dos-dos di tur karni den kual tabatin e rosea di bida.

¹⁶I esnan ku a drenta, machu i muhe di tur karni, a drenta manera Dios a orden'e; i SENOR a sera e porta su tras.

¹⁷I e diluvio tabata kuarenta dia largu riba tera; i awa a subi i a lanta e arka, asina ku el a keda mas haltu ku e tera.

¹⁸I e awa tabata oumenta i tabata subi hopi riba tera; anto e arka tabata drif riba superfisio di e awa.

¹⁹I e awa tabata oumenta mas i mas riba tera, asina ku tur e serunan haltu tur kaminda bou di e shelunan a keda tapa.

²⁰E awa a oumenta subi diesinku kodo mas haltu i e serunan a keda tapa.

²¹I tur karni ku tabata move riba tera a muri: parha, bestia di kria, bestia di mondi i tur bestia ku ta kriul den otro riba tera, i tur hende;

²²tur loke tabata riba tera seku, tur ku tabatin rosea di e spiritu di bida den nan nanishi a muri.

²³Asina El a destrui tur loke tabata eksisti i ku tabata riba superfisio di tera, tantu hende komo bestia i loke ta lastra abou, i parha di shelu, i nan a wordu destrui for di riba tera; i Noe so a keda, ku esnan ku tabata huntu kune den e arka.

²⁴I shent'i sinkuenta dia largu e awa a prevalese riba tera.