Read Papantla Totonac Genesis 8 Bible Online

Genesis 8 - Papantla Totonac bible

Genesis 8

¹Ma Dios a korda riba Noe i tur e bestianan di mondi i tur e bestianan di kria ku tabata huntu kune den e arka; i Dios a hasi un bientu supla riba tera, i e awa a baha.

²E fuentenan di abismo i e bentananan di shelu tambe a wordu sera, i awaseru for di shelu a stop;

³i poko-poko e awa a kuminsa baha for di tera, i despues di shent'i sinkuenta dia e awa a sak.

⁴I den e di shete luna, riba e di dieshete dia di e luna, e arka a keda wanta riba e serunan di Ararat.

⁵I e awa tabata sak poko-poko te na e di dies luna; den e di dies luna, riba e prome dia di e luna, e kabesnan di e serunan a bira visibel.

⁶Asina a sosode ku na fin di kuarenta dia Noe a habri bentana di e arka ku el a traha;

⁷i el a laga un raf bai, i esaki a bula bai-bin te ora ku e awa a seka riba tera.

⁸E ora ei el a laga un palomba bai pa mira si e awa a mengua for di riba superfisio di tera;

⁹ma e palomba no a hana luga pa su plant'i pia sosega ariba, pesei el a bolbe serka Noe den e arka, pasobra e awa tabata riba superfisio di henter e tera. E ora ei Noe a saka su man i a koh'e, i a hink'e den e arka serka dje.

¹⁰I el a bolbe warda shete dia mas i atrobe el a laga e palomba bai for di e arka.

¹¹Anto den ora di atardi e palomba a bin serka dje, i mira, den su pik tabatin un blachi di oleifi kita fresku asina. Asina Noe a hana sa ku e awa a mengua for di riba tera.

¹²I el a bolbe warda shete dia mas i a laga e palomba bai, ma e no a bolbe mas serka dje.

¹³Awor a sosode ku den e di seis shent'i un ana, den e prome luna, riba e prome dia di e luna, e awa a seka for di riba tera. E ora ei Noe a kita tapa di e arka i a wak, i mira, e superfisio di suela a seka.

¹⁴I den e di dos luna, riba e di bint'i shete dia di e luna, tera tabata seku.

¹⁵E ora ei Dios a papia ku Noe, bisando:

¹⁶"Sali for di e arka, abo i bo esposa i bo yu hombernan i esposanan di bo yu hombernan huntu ku bo.

¹⁷Sali ku tur loke ta bibu di tur karni ku ta huntu ku bo: parha i animal i tur loke ta lastra riba tera, pa nan por rende abundantemente riba tera, i ta fruktifero i multiplika riba tera."

¹⁸Asina Noe a sali, i su yu hombernan i su esposa i esposanan di su yu hombernan huntu kune.

¹⁹Tur bestia i tur bestia ku ta lastra, i tur parha, tur loke ta move riba tera, segun nan sorto, a sali for di e arka.

²⁰E ora ei Noe a traha un altar pa SENOR i a kohe for di tur bestia limpi i for di tur parha limpi i a ofrese ofrendanan kima riba e altar.

²¹I SENOR a sinti e holo dushi, i SENOR a bisa den Su kurason: "Nunka mas lo Mi no maldishona suela pa motibu di hende, pasobra e intenshon di kurason di hende ta malu for di su hubentut; nunka mas lo Mi destrui tur loke ta bibu, manera Mi a hasi.

²²"Mientras ku tera ta permanese, tempu di sembra i tempu di kosecha, i frialdat i kalor, i zomer i wenter, i dia i anochi lo no kaba."