Read Papantla Totonac Genesis 9 Bible Online

Genesis 9 - Papantla Totonac bible

Genesis 9

¹Dios a bendishona Noe i su yu hombernan i a bisa nan: "Sea fruktifero i multiplika, i yena tera.

²I e temor pa boso i e teror pa boso lo ta riba tur bestia di tera i riba tur parha di shelu, huntu ku tur loke ta lastra abou na suela i tur piska di laman. Den boso man nan ta entrega.

³Tur loke ta move, ku ta biba, lo ta kuminda pa boso; Mi ta duna boso tur, meskos ku Mi a duna e yerba berde.

⁴"Solamente, boso no mag kome karni ku su bida, esta, su sanger.

⁵I siguramente lo Mi eksigi boso sanger-di-bida; for di tur bestia lo Mi eksigi esaki. I for di tur hende, for di ruman di tur hende lo Mi eksigi e bida di hende.

⁶"Ken ku drama sanger di hende, pa medio di hende su sanger lo wordu drama, pasobra segun e imagen di Dios el a traha hende.

⁷Ma boso, sea fruktifero i multiplika; pobla e tera abundantemente i multiplika riba dje."

⁸E ora ei Dios a papia ku Noe i ku su yu hombernan huntu kune, bisando:

⁹"Awor mira, Ami mes ta stablese Mi aliansa ku boso i ku boso desendientenan despues di boso,

¹⁰i ku tur ser bibu ku ta huntu ku boso: e parhanan, e bestianan di kria i tur bestia di tera ku ta huntu ku boso; di tur loke ta sali for di e arka, tur bestia di tera.

¹¹I Mi ta stablese Mi aliansa ku boso; i nunka mas e awanan di diluvio lo no kaba ku tur karni, ni lo no tin diluvio mas pa destrui tera."

¹²I Dios a bisa: "Esaki ta e senal di e aliansa ku Mi ta sera entre Ami i boso i tur ser bibu ku ta huntu ku boso, pa tur generashon ku ta sigui:

¹³Mi ta pone Mi rembog den e nubianan i esaki lo ta senal di un aliansa entre Ami i tera.

¹⁴I lo sosode ku ora Mi laga un nubia pasa ofer di tera, e rembog lo por wordu mira den e nubia,

¹⁵i lo Mi korda riba Mi aliansa ku tin entre Ami i boso i tur ser bibu di tur karni; i nunka mas e awa lo no bira un diluvio pa destrui tur karni.

¹⁶Ora ku e rembog ta den e nubia, lo Mi mira esaki, pa rekorda e aliansa eterno entre Dios i tur ser bibu di tur karni ku tin riba tera."

¹⁷I Dios a bisa Noe: "Esaki ta e senal di e aliansa ku Mi a stablese entre Ami i tur karni ku tin riba tera."

¹⁸Awor e yu hombernan di Noe ku a sali for di e arka tabata Sem, Kam i Jafet; i Kam tabata tata di Kanaan.

¹⁹E tresnan aki tabata e yu hombernan di Noe, i for di esakinan henter tera a keda pobla.

²⁰Anto Noe a bira kunukero i a planta un kunuku di wendruif.

²¹I el a bebe di e bina i a bira burachi, i a kita sunu den su tent.

²²I Kam, tata di Kanaan, a mira sunu di su tata, i a konta esaki na su dos ruman hombernan pafo.

²³Ma Sem i Jafet a kohe un pana i a pone esaki riba nan tur dos su skouder i a kana ku lomba i a tapa sunu di nan tata; i nan a bira nan kara, asina ku nan no tabata mira sunu di nan tata.

²⁴Ora Noe a spierta di su buracheria, el a hana sa kiko su yu homber di mas chikitu a hasi kune.

²⁵I el a bisa: "Maldishona sea Kanaan; un sirbido di sirbidonan lo e ta pa su rumannan."

²⁶El a bisa tambe: "Bendishona sea SENOR, e Dios di Sem; i laga Kanaan ta su sirbido.

²⁷Ku Dios engrandese Jafet, i lagu'e biba den e tentnan di Sem; i laga Kanaan ta su sirbido."

²⁸Anto Noe a biba 350 ana despues di e diluvio.

²⁹Asina tur e dianan di Noe tabata 950 ana, i el a muri.