Read Papantla Totonac 2 Samuel 1 Bible Online

2 Samuel 1 - Papantla Totonac bible

2 Samuel 1

¹Awor a sosode ku despues di Saul su morto, ora David a bolbe di e matansa di e amalekitanan, el a keda dos dia na Siklag.

²I a sosode ku riba e di tres dia a bin un homber for di e kampamentu di Saul, ku su pananan gesker i ku tera riba su kabes. I ora ku el a yega serka David, el a tira su kurpa abou ku su kara te na suela.

³I David a puntr'e: "Di unda bo ta bin?" I el a bis'e: "Mi a skapa for di e kampamentu di Israel."

⁴I David a bis'e: "Kon kos a bai? Pa fabor, kontami." I el a bisa: "E pueblo a hui for di bataya, i tambe hopi di e hendenan a kai i a muri; i Saul ku su yu homber Jonatan tambe a muri."

⁵Anto David a bisa e hoben ku a trese e notisia: "Kon bo sa ku Saul i su yu homber Jonatan ta morto?"

⁶I e hoben ku a trese e notisia a bisa: "Pa kasualidat mi tabata riba Seru Gilboa, i mira, Saul tabata len riba su lansa. I mira, e garoshinan i e koredonan di kabai tabata bin net su tras.

⁷I ora ku el a drai wak, el a mirami i a yamami. I mi a bisa: 'At'ami aki.'

⁸"I el a puntrami: 'Ken bo ta?' "I mi a kontest'e: 'Mi ta un amalekita.'

⁹"Anto el a bisami: 'Pa fabor, para banda di mi i matami, pasobra agonia a garami, komo ku ainda tin bida den mi.'

¹⁰"Asina mi a para banda di dje i a mat'e, pasobra mi tabata sa ku e lo no por a biba mas despues ku el a kai. I mi a kohe e korona ku tabata riba su kabes i e armbant ku tabata na su brasa, i mi a trese nan aki pa mi senor."

¹¹E ora ei David a gara su mes pananan i a sker nan, i tur e hombernan ku tabata huntu kune tambe a hasi meskos.

¹²I nan a lamenta i a yora i a yuna te anochi pa Saul i su yu homber Jonatan, i pa e pueblo di SENOR i pa e kas di Israel, pasobra nan a muri pa medio di spada.

¹³I David a puntra e hoben ku a trese e notisia p'e: "Di unda bo ta?" I el a kontesta: "Mi ta yu di un stranhero, un amalekita."

¹⁴Anto David a bis'e: "Di kon bo no tabatin miedu di saka bo man pa destrui SENOR Su ungi?"

¹⁵I David a yama un di e hobennan i a bisa: "Bai mat'e." Asina el a dal e mata.

¹⁶I David a bis'e: "Bo sanger ta riba bo kabes, pasobra bo mes boka a testifika kontra bo, ora bo a bisa: 'Mi a mata SENOR Su ungi.'"

¹⁷E ora ei David a kanta e kantika di lamento aki ofer di Saul i su yu homber Jonatan,

¹⁸i el a bisa nan pa sina e yu hombernan di Juda e kantika di e bog; mira, e ta para skirbi den e buki di Jaser.

¹⁹"Bo bunitesa, O Israel, ta mata riba bo luganan haltu! Kon e poderosonan a kai!

²⁰"No konta esaki na Gat, no proklama esaki den e kayanan di Askalon, pa e yu muhenan di e filisteonan no regosiha, pa e yu muhenan di e insirkumsidanan no bula di kontentu.

²¹"O serunan di Gilboa, no laga tin serena ni awaseru riba boso, ni terenonan di ofrenda; pasobra ayanan e eskudo di e poderosonan a wordu profana, e eskudo di Saul no ta wordu hunta ku zeta.

²²For di e sanger di e mortonan, for di e vet di e poderosonan, e bog di Jonatan no a bolbe bek, i e spada di Saul no a bolbe bashi.

²³"Saul i Jonatan, stima i amabel durante di nan bida, i den nan morto nan no a wordu separa; nan tabata mas lihe ku aguila, nan tabata mas fuerte ku leon.

²⁴"O yu muhenan di Israel, yora pa Saul, kende a bisti boso luhosamente na skarlata, kende a dorna boso bistinan ku oro.

²⁵"Kon e poderosonan a kai meimei di e bataya! Jonatan a wordu mata riba bo luganan haltu.

²⁶Mi ta angustia pa bo motibu, mi ruman Jonatan; bo tabata masha amabel pa mi. Bo amor pa mi tabata mas maraviyoso ku e amor di muhe.

²⁷"Kon e poderosonan a kai, i e armanan di guera a perese!"