Read Papantla Totonac 2 Samuel 10 Bible Online

2 Samuel 10 - Papantla Totonac bible

2 Samuel 10

¹I a sosode ku despues di esaki rei di e amonitanan a muri, i su yu homber Hanun a bira rei na su luga.

²Anto David a bisa: "Lo mi mustra karino na Hanun, yu homber di Nahas, meskos ku su tata a mustrami karino." Asina David a manda algun di su sirbidonan pa konsol'e pa motibu di e morto di su tata. Ma ora David su sirbidonan a yega na e tera di e amonitanan,

³e prensnan di e amonitanan a bisa Hanun, nan senor: "Bo ta kere ku ta onra David ta onra bo tata, pasobra el a manda konsolado serka bo? No ta pa ristra e stat, pa spion'e i pa derot'e David a manda su sirbidonan serka bo?"

⁴Asina Hanun a kohe David su sirbidonan i a feita mitar di nan barba, i a korta nan pana na mitar kit'afo pareu ku nan hep i a manda nan bai.

⁵Ora nan a konta David esaki, el a manda hende bai topa nan, pasobra e hombernan a wordu umiya masha. I rei a bisa: "Keda na Jeriko te ora boso barba krese, i e ora ei boso bolbe."

⁶Awor ora ku e yu hombernan di Amon a mira ku nan a bira un abominashon pa David, e yu hombernan di Amon a manda hur e sirionan di Bet-rehob i e sirionan di Soba, binti mil solda-na-pia, i rei di Maaka ku mil homber, i e hombernan di Tob ku diesdos mil homber.

⁷Ora David a tende esaki, el a manda Joab i henter e ehersito, e hombernan poderoso.

⁸I e yu hombernan di Amon a sali i a pone nan mes den ordu di bataya na entrada di e stat, mientras ku e sirionan di Soba i Rehob i e hombernan di Tob i Maaka a keda nan so den sabana.

⁹Awor ora Joab a mira ku e bataya tabata kontra dje dilanti i patras, el a skohe for di tur e hombernan skohi di Israel, i a pone nan den ordu di bataya kontra e sirionan.

¹⁰Ma e hendenan ku a resta el a pone den man di su ruman homber Abisai, i Abisai a pone nan den ordu di bataya kontra e yu hombernan di Amon.

¹¹I Joab a bisa: "Si e sirionan ta muchu fuerte pa mi, e ora ei abo lo yudami, ma si e yu hombernan di Amon ta muchu fuerte pa bo, e ora ei ami lo yudabo.

¹²Sea fuerte, i laga nos mustra nos mes yen di kurashi pa kousa di nos pueblo i pa e statnan di nos Dios; i ku SENOR hasi loke ta bon den Su bista."

¹³Asina Joab i e pueblo ku tabata huntu kune a hala serka pa bringa kontra e sirionan, i nan a hui su dilanti.

¹⁴Ora ku e yu hombernan di Amon a mira ku e sirionan a hui, nan tambe a hui dilanti di Abisai i a drenta e stat. Anto Joab a bin bek for di bataya kontra e yu hombernan di Amon i a yega Jerusalem.

¹⁵Ora ku e sirionan a mira ku nan a wordu derota dor di Israel, nan a reuni huntu.

¹⁶I Hadadezer a manda buska e sirionan for di e otro banda di Riu Eufrates, i nan a bin Helam; i Sobak, komandante di e ehersito di Hadadezer, tabata guia nan.

¹⁷Awor ora nan a konta David esaki, el a reuni henter Israel huntu, a krusa Jordan i a bin Helam. I e sirionan a pone nan mes den ordu di bataya pa kontra ku David i a bringa kontra dje.

¹⁸Ma e sirionan a hui dilanti di Israel; i di e sirionan David a mata shete shen koredo di garoshi i kuarenta mil homber riba kabai, i a mata Sobak, komandante di nan ehersito, i el a muri einan.

¹⁹Ora tur e reinan, sirbidonan di Hadadezer, a mira ku Israel a derota nan, nan a hasi pas ku Israel i a sirbi nan. Pesei e sirionan tabatin miedu di bolbe yuda e yu hombernan di Amon.