Read Papantla Totonac 2 Samuel 11 Bible Online

2 Samuel 11 - Papantla Totonac bible

2 Samuel 11

¹Anto a sosode na e kuminsamentu di ana, na e tempu ku reinan ta bai bataya, ku David a manda Joab i su sirbidonan huntu kune i henter Israel, i nan a destrui e yu hombernan di Amon, i a bin rondona Raba. Ma David a keda Jerusalem.

²Awor ora ku a bira tardi David a lanta for di su kama i a kana ront riba dak di rei su kas, i for di riba dak el a mira un muhe ta bana; i e muhe tabata masha bunita pa mira.

³Anto David a manda buska informashon tokante di e muhe. I un hende a bisa: "No ta Betsabe, yu muhe di Eliam, esposa di Urias e heteo?"

⁴I David a manda mensaheronan pa tres'e, i ora ku el a bin serka David, el a drumi kune; i despues ku el a purifika su mes di su impuresa, el a bai su kas bek.

⁵I e muhe a konsebi; i el a manda bisa David: "Mi ta na estado."

⁶Anto David a manda bisa Joab: "Manda Urias e heteo pa mi." I Joab a manda Urias pa David.

⁷Ora ku Urias a bin serka dje, David a puntra kon ta bai ku Joab i e pueblo, i kon ta sigui ku e guera.

⁸Despues David a bisa Urias: "Bai bo kas i laba bo pianan." I Urias a sali for di rei su kas, i un regalo di rei a wordu manda p'e.

⁹Ma Urias a drumi na porta di rei su kas huntu ku tur e sirbidonan di su senor, i no a bai su kas.

¹⁰Awor ora nan a konta David, bisando: "Urias no a bai su kas," David a bisa Urias: "No ta for di un biahe bo a kaba di yega? Pakiko bo no a bai bo kas?"

¹¹I Urias a bisa David: "E arka, Israel i Juda ta keda den tentnan, i mi senor Joab i e sirbidonan di mi senor ta kampa pafo den sabana. Anto ami mester bai mi kas pa kome i bebe, i pa drumi ku mi esposa? Pa bo bida, i bida di bo alma, lo mi no hasi e kos aki."

¹²E ora ei David a bisa Urias: "Keda aki awe tambe, i manan lo mi lagabo bai." Asina Urias a keda na Jerusalem e dia ei i e dia siguiente.

¹³Awor David a yama Urias, i el a kome i bebe den David su presensia; i David a hasie burachi, i anochi el a bai pafo pa drumi riba su kama huntu ku e sirbidonan di su senor, ma e no a bai su kas.

¹⁴Awor a sosode ku mainta David a skirbi Joab un karta i a mand'e ku Urias.

¹⁵I den e karta el a skirbi, bisando: "Pone Urias den e fila mas dilanti di e bataya di mas fuerte i retira for di dje, asina ku e lo wordu herida i muri."

¹⁶Asina a sosode ku ora Joab tabata vigila e stat, el a pone Urias na e luga kaminda e tabata sa ku tabatin hombernan balente.

¹⁷I e hombernan di e stat a sali i a bringa kontra Joab, i algun di e hombernan entre David su sirbidonan a muri; i Urias e heteo tambe a muri.

¹⁸Anto Joab a manda konta David tur kos ku tabatin di hasi ku e guera.

¹⁹I el a instrui e mensahero, bisando: "Ora bo kaba di konta rei tur loke tin di hasi ku e guera,

²⁰i sosode ku rei su furia lanta, i e bisabo: 'Pakiko boso a bai asina serka di e stat pa bringa? Boso no tabata sa ku nan lo a tira flecha for di e muraya?

²¹Ta ken a mata Abimelek, yu homber di Jerubeset? No ta un muhe a tira un piedra di mulina riba dje for di e muraya, asina ku el a muri na Tebes? Pakiko boso a bai asina serka di e muraya?' e ora ei lo bo bisa: 'Bo sirbido Urias e heteo tambe ta morto.'"

²²Asina e mensahero a bai, i ora ku el a yega el a reporta na David tur loke Joab a mand'e bai konta.

²³I e mensahero a bisa David: "E hombernan tabata resisti kontra nos i a sali bin kontra nos den sabana, ma nos a forsa nan bek te na entrada di e porta.

²⁴Ademas, e tiradonan di flecha a tira riba bo sirbidonan for di muraya; i algun di rei su sirbidonan a muri, i bo sirbido Urias e heteo tambe a muri."

²⁵Anto David a bisa e mensahero: "Bisa Joab: 'No laga e kos aki molestiabo, pasobra spada ta devora esun igual ku e otro; hasi bo bataya kontra e stat mas fuerte i derot'e;' enkurash'e asina."

²⁶Awor ora ku esposa di Urias a tende ku su esposo Urias tabata morto, el a tene rou pa su esposo.

²⁷Ora ku e tempu di rou a pasa, David a manda buska Betsabe i a tres'e su kas, i el a bira su esposa; despues el a hana un yu homber pa David. Ma e kos ku David a hasi tabata malu den bista di SENOR.