Read Papantla Totonac 2 Samuel 12 Bible Online

2 Samuel 12 - Papantla Totonac bible

2 Samuel 12

¹Anto SENOR a manda Natan serka David. I el a yega serka dje i a bisa: "Tabatin dos homber den un stat; esun tabata riku i e otro tabata pober.

²E homber riku tabatin masha hopi tou di bestia chikitu i kria di baka.

³Ma e homber pober no tabatin nada mas sino un lamchi chikitu, ku el a kumpra i kria; i e lamchi a krese serka dje i su yunan. E tabata kome di su pan i bebe di su kopa i drumi na su pechu, i tabata manera un yu muhe p'e.

⁴"Awor un biahero a bin serka e homber riku, i e homber riku no tabata kier a kohe for di su mes tou di bestia chikitu of for di su mes kria di baka, pa prepara pa e biahero ku a bin serka dje; alkontrario, el a kohe e homber pober su lamchi muhe i a prepar'e pa e homber ku a bin serka dje."

⁵E ora ei David su rabia a kima masha kontra e homber, i el a bisa Natan: "Manera SENOR ta biba, siguramente e homber ku a hasi esaki ta merese morto.

⁶I e mester hasi restitushon kuater biaha mas tantu pa e lamchi, pasobra el a hasi e kos aki i no tabatin kompashon."

⁷E ora ei Natan a bisa David: "Ta abo ta e homber! Asina e SENOR Dios di Israel ta bisa: 'Ta Ami a ungibo komo rei riba Israel, i ta Ami a librabo for di man di Saul.

⁸Tambe Mi a dunabo e kas di bo shon i e esposanan di bo shon pa bo kuida, i Mi a dunabo e kas di Israel i di Juda; i si esei tabata muchu poko, lo Mi a dunabo muchu mas kos ainda ku esakinan!

⁹Pakiko bo a despresia e palabra di SENOR dor di hasi malu den Su bista? Bo a mata Urias e heteo ku spada, a tuma su esposa pa ta bo esposa, i a mat'e ku spada di e yu hombernan di Amon.

¹⁰Pesei awor, nunka spada lo no kita for di bo kas, pasobra bo a despresiaMi i a tuma esposa di Urias e heteo pa ta bo esposa.'

¹¹"Asina SENOR ta bisa: 'Mira, lo Mi lanta maldat kontra bo for di bo mes kas; lo Mi tuma bo esposanan dilanti di bo bista i duna nan na bo kompanero, i e lo drumi ku bo esposanan di dia kla.

¹²Abo a hasie na sekreto, ma Ami lo hasi e kos aki dilanti di henter Israel i bou di solo.'"

¹³E ora ei David a bisa Natan: "Mi a peka kontra SENOR." I Natan a bisa David: "SENOR tambe a kita bo pika; lo bo no muri.

¹⁴Sinembargo, pasobra pa medio di e echo aki bo a duna okashon na e enemigunan di SENOR pa blasfema, e yu ku a nase pa bo lo muri sigur."

¹⁵Anto Natan a bai su kas. E ora ei SENOR a dal e yu ku biuda di Urias a hana pa David, asina ku el a bira hopi malu.

¹⁶Pesei David a hasi suplika na Dios pa e yu; i David a yuna i a bai paden i a pasa henter anochi drumi abou na suela.

¹⁷I e ansianonan di su kas a para banda di dje pa his'e for di suela, ma e no tabata kier i no kier a kome kuminda huntu ku nan.

¹⁸Anto a sosode ku riba e di shete dia e yu a muri. I e sirbidonan di David tabatin miedu di bis'e ku e yu a muri, pasobra nan a bisa: "Mira, mientras ku e yu tabata na bida ainda, nos a papia kune i e no a skucha nos bos. Kon nos por bis'e awor ku e yu a muri, pasobra e ta kapas di hasi su mes dano!"

¹⁹Ma ora David a mira ku su sirbidonan tabata papia ketu-ketu ku otro, David a komprende ku e yu a muri; e ora ei David a puntra su sirbidonan: "E yu a muri?" I nan a bisa: "Si, el a muri."

²⁰Asina David a lanta for di suela, a bana, a hunta su mes ku zeta, i a kambia su pananan; i el a bai den e kas di SENOR i a adora. Despues el a bin su mes kas; i ora ku el a pidi, nan a pone kuminda su dilanti i el a kome.

²¹Anto su sirbidonan a bis'e: "Kiko e kos ku bo a hasi aki ta? Mientras ku e yu tabata na bida, bo a yuna i yora; ma ora ku e yu a muri, bo a lanta i a kome kuminda."

²²I el a bisa: "Mientras ku e yu tabata na bida ainda, mi a yuna i yora, pasobra mi a bisa: 'Ken sa, podise SENOR por mustra Su grasia na mi, asina ku e yu por biba.'

²³Ma awor ku el a muri; pakiko lo mi yuna? Mi por bolbe tres'e bek? Ami lo bai serka dje, ma e lo no bolbe serka mi."

²⁴Anto David a konsola su esposa Betsabe, i a bai serka dje i a drumi kune. I Betsabe a duna lus na un yu homber, i David a yam'e Salomon. Awor SENOR tabata stim'e,

²⁵i a manda palabra pa medio di profeta Natan; i el a yam'e Jedidias pa kousa di SENOR.

²⁶Awor Joab a bringa kontra Raba di e yu hombernan di Amon i a kaptura e stat real.

²⁷I Joab a manda mensaheronan serka David i a bisa: "Mi a bringa kontra Raba, asta mi a kaptura e stat di awanan.

²⁸Pesei awor, mobilisa e hendenan ku a resta i kampa kontra e stat i kaptur'e, pa ami mes no kaptura e stat i e wordu yama na mi nomber."

²⁹Pesei David a mobilisa henter e pueblo i a bai Raba, a bringa kontra dje i a kaptur'e.

³⁰Anto el a kohe e korona di nan rei for di su kabes; i esaki tabata pisa un talento di oro, i tabatin un piedra presioso na dje; i el a wordu poni riba David su kabes. I David a saka e botin for di e stat na gran kantidat. (?3