Read Papantla Totonac 2 Samuel 13 Bible Online

2 Samuel 13 - Papantla Totonac bible

2 Samuel 13

¹Awor despues di esaki a sosode ku Absalon, yu homber di David, tabatin un bunita ruman muhe ku tabata yama Tamar. I Amnon, yu homber di David, a namora di dje.

²I Amnon tabata asina frustra pa motibu di su ruman muhe T amar ku el a bira malu, pasobra Tamar tabata un birgen; i tabata parse Amnon difisil pa hasie algu.

³Ma Amnon tabatin un amigu ku tabata yama Jonadab, yu homber di Simea, David su ruman homber; i Jonadab tabata un homber masha astuto.

⁴I el a bisa Amnon: "O yu di rei, pakiko bo ta asina deprimi dia tras dia? Bo no kier bisami?" Anto Amnon a bis'e: "Mi ta enamora di Tamar, ruman muhe di mi ruman homber Absalon."

⁵E ora ei Jonadab a bis'e: "Kai drumi riba bo kama i gana malu; ora bo tata bin mirabo, bis'e: 'Pa fabor, laga mi ruman muhe Tamar bin dunami algu di kome, i lagu'e prepara e kuminda dilanti di mi bista, pa mi mira esaki i kome for di su man.'"

⁶Asina Amnon a kai drumi i a gana malu; ora rei a bin mir'e, Amnon a bisa rei: "Pa fabor, laga mi ruman muhe Tamar bin traha un par di pan buskuchi pa mi dilanti di mi bista, pa mi kome for di su man."

⁷E ora ei David a manda buska Tamar na kas, bisando: "Bai awor na kas di bo ruman homber Amnon i prepara kuminda p'e."

⁸Asina Tamar a bai kas di su ruman homber Amnon, i a han'e drumi riba kama. I el a kohe mansa, a mans'e i a traha pan buskuchi dilanti di su bista i a horna nan.

⁹I el a kohe e planchi i a saka nan su dilanti sirbie nan, ma el a nenga di kome i a bisa: "Saka tur hende for di akinan." Asina tur hende a sali bai.

¹⁰E ora ei Amnon a bisa Tamar: "Trese e kuminda den kamber, pa mi kome for di bo man." Asina Tamar a kohe e pan buskuchinan ku el a traha i a hiba nan den kamber pa su ruman homber Amnon.

¹¹Ora ku el a trese nan p'e kome, el a koh'e tene i a bis'e: "Bin, drumi ku mi, mi ruman."

¹²Ma Tamar a kontest'e: "No, mi ruman, no violami, pasobra un kos asina no ta wordu hasi den Israel; no hasi e kos bergonsoso aki!

¹³I ami, unda lo mi por deshasi mi mes di mi reproche? I abo mes, lo bo ta manera un di e bobonan den Israel. Pesei anto, pa fabor papia ku rei, pasobra e lo no nenga di dunami na bo."

¹⁴Sinembargo, e no tabata kier a skucha Tamar; i komo ku e tabata mas fuerte kune, el a fors'e pa e drumi kune.

¹⁵Despues Amnon tabata odi'e ku un odio masha grandi mes; pasobra e odio ku e tabata odi'e kune tabata mas grandi ku e amor ku e tabata stim'e kune. I Amnon a bis'e: "Lanta, bai for di aki!"

¹⁶Ma Tamar a bis'e: "No, pasobra e maldat aki di mandami bai ta pio ku loke bo a hasi ku mi kaba!" Ma Amnon no kier a skuch'e.

¹⁷E ora ei el a yama su sirbido hoben ku tabata atend'e i a bisa: "Saka e muhe aki for di mi presensia, i sera e porta na grendel su tras."

¹⁸Awor Tamar tabatin un pana largu di hopi kolo bisti, pasobra t'asina e yu muhenan birgen di rei tabata bisti. Anto Amnon su sirbido a sak'e afo, i a sera e porta na grendel su tras.

¹⁹I Tamar a pone shinishi riba su kabes i a sker su pana largu di hopi kolo ku e tabatin bisti, i a pone su man riba su kabes i a bai i tabata yora duru mientras ku e tabata bai.

²⁰E ora ei su ruman homber Absalon a bis'e: "Bo ruman homber Amnon tabata serka bo? Ma awor keda ketu, mi ruman, e ta bo ruman; no tuma e asunto aki na pechu." Asina Tamar a keda desola den e kas di su ruman homber Absalon.

²¹Awor ora rei David a tende di tur e asuntonan aki, el a rabia masha.

²²Ma Absalon no a papia ni un palabra ku Amnon, ni bon ni malu, komo ku Absalon tabata odia Amnon, pasobra el a viola su ruman muhe Tamar.

²³Awor a sosode, dos ana despues, ku Absalon tabatin peladonan di karne na Baal-hazor, ku ta keda pega ku Efrain; i Absalon a invita tur e yu hombernan di rei.

²⁴I Absalon a bin serka rei i a bisa: "Mira, bo sirbido tin peladonan di karne; pa fabor, laga rei i su sirbidonan bai ku bo sirbido."

²⁵Ma rei a bisa Absalon: "No, mi yu, nos tur no mester bai, pa nos no ta un peso pa bo." Maske Absalon a rogu'e, rei no kier a bai, ma a bendishon'e.

²⁶Anto Absalon a bisa: "Si no, pa fabor, laga mi ruman Amnon bai ku nos." I rei a bis'e: "Pakiko e mester bai ku bo?"

²⁷Ma ora ku Absalon a rogu'e, rei a laga Amnon i tur e yu hombernan di rei bai kune.

²⁸I Absalon a ordena su sirbidonan, bisando: "Mira, ora ku Amnon su kurason ta kontentu di bina, i ora mi bisa boso: 'Dal Amnon,' e ora ei mat'e. No tene miedu. No ta mi mes a ordena boso? Tene kurashi i sea balente."

²⁹I e sirbidonan di Absalon a hasi ku Amnon manera Absalon a ordena. Anto tur e yu hombernan di rei a lanta, i kada un a subi su mula i a hui.

³⁰Awor mientras ku nan tabata na kaminda, e notisia a yega na David, bisando: "Absalon a mata tur e yu hombernan di rei, i no a keda ni un di nan."

³¹E ora ei rei a lanta, a sker su pana i a kai drumi abou na suela; i tur su sirbidonan tabata para banda di dje ku nan pana gesker.

³²I Jonadab, yu homber di Simea, David su ruman homber, a bisa: "No laga mi senor kere ku nan a mata tur e hobennan, e yu hombernan di rei, pasobra ta Amnon so ta morto; pasobra pa medio di boka di Absalon esaki a wordu determina for di dia ku Amnon a viola su ruman muhe Tamar.

³³Pesei anto, no laga senor mi rei tuma e notisia aki na pechu, esta: 'tur e yu hombernan di rei ta morto', pasobra ta solamente Amnon ta morto."

³⁴Awor Absalon a hui. I e hoben ku tabata na warda a hisa kara wak, i mira, hopi hende tabata bin for di e kaminda tras di dje na banda di e seru.

³⁵I Jonadab a bisa rei: "Mira, e yu hombernan di rei a bin; manera bo sirbido a bisa, asina a sosode."

³⁶I a sosode ku asina el a kaba di papia, at'e yu hombernan di rei a yega, i a halsa nan bos i a yora; i tambe rei i tur su sirbidonan a yora amargamente.

³⁷Awor Absalon a hui bai serka Talmai, yu homber di Amiud, rei di Gesur. I tur dia David tabata yora su yu homber.

³⁸Asina Absalon a hui bai Gesur i a keda ayanan tres ana.

³⁹I kurason di rei David a anhela pa mira Absalon; pasobra el a wordu konsola enkuanto Amnon, ya ku el a muri kaba.