Read Papantla Totonac 2 Samuel 14 Bible Online

2 Samuel 14 - Papantla Totonac bible

2 Samuel 14

¹Awor Joab, yu homber di Sarvia, a ripara ku rei su kurason tabata anhela na Absalon.

²Pesei Joab a manda buska un muhe sabi for di Tekoa i a bis'e: "Pa fabor, hasi komo si ta na rou bo ta, i bisti pana di rou; no hunta bo mes ku zeta, ma hasi manera un muhe ku pa basta dia kaba ta na rou pa un morto.

³Anto bai serka rei i papia kune asin'aki." Asina Joab a pone e palabranan den su boka.

⁴Awor ora ku e muhe di Tekoa a papia ku rei, el a tira su kurpa abou i a buig ku su kara te na suela i a bisa: "Yudami, O rei."

⁵I rei a bis'e: "Kiko ta bo problema?" I el a kontesta: "Di berdat, mi ta biuda, pasobra mi esposo a muri.

⁶I bo sirbiente tabatin dos yu homber, i nan dos a bringa ku otro den kunuku; i no tabatin ningun hende pa kita nan for di otro, asina ku esun a dal e otro mata.

⁷I mira, henter famia a lanta kontra bo sirbiente, i nan ta bisa: 'Entrega esun ku a mata su ruman homber, pa nos mat'e pa bida di su ruman homber ku el a mata; i nos lo destrui e eredero tambe.' Asina nan lo paga mi karbon ku a keda, pa asina laga mi esposo sin nomber ni restante riba e superfisio di tera."

⁸Anto rei a bisa e muhe: "Bai bo kas, i lo mi duna ordu tokante di bo."

⁹I e muhe di Tekoa a bisa rei: "O senor mi rei, e inikidat ta riba mi i riba e kas di mi tata, ma rei i su trono ta sin kulpa."

¹⁰Anto rei a bisa: "Ken ku papia ku bo, tres'e pa mi, i e lo no molestiabo mas."

¹¹E ora ei e muhe a bisa: "Pa fabor, laga rei korda SENOR bo Dios, pa e vengado di sanger no sigui destrui, pa nan no destrui mi yu homber." I rei a bisa: "Manera SENOR ta biba, ni un drachi di kabei di bo yu homber lo no kai abou na suela."

¹²E ora ei e muhe a bisa: "Pa fabor, laga bo sirbiente papia un palabra ku senor mi rei." I rei a bisa: "Papia numa."

¹³I e muhe a bisa: "Pakiko anto bo a plania un kos asina kontra e pueblo di Dios? Pasobra dor di papia e palabra aki rei ta manera un ku ta kulpabel, siendo ku rei no ta trese bek esun ku el a deporta.

¹⁴Pasobra siguramente nos lo muri i lo ta manera awa basha riba suela, ku no por wordu rekohi mas. Tog Dios no ta kita bida, ma ta plania maneranan pa esun ku a wordu deporta no wordu tira for di djé.

¹⁵"Awor e motibu ku mi a bin papia e palabra aki ku senor mi rei ta pasobra e pueblo a dunami miedu; pesei bo sirbiente a bisa: 'Awor, lagami papia ku rei, podise rei lo kumpli ku petishon di su sirbiente.

¹⁶Pasobra rei lo skucha i libra su sirbiente for di man di e homber ku kier destrui tantu ami komo mi yu homber for di e erensia di Dios.'

¹⁷"Anto bo sirbiente a bisa: 'Pa fabor, laga e palabra di senor mi rei ta palabra di konsuelo, pasobra manera e angel di Dios, asina senor mi rei ta pa diserni bon i malu. I ku SENOR bo Dios sea ku bo.'"

¹⁸E ora ei rei a kontesta i a bisa e muhe: "Pa fabor, no skonde nada pa mi di loke mi ta bai puntrabo." I e muhe a bisa: "Pa fabor, papia senor mi rei."

¹⁹Asina rei a bisa: "Man di Joab ta ku bo den tur esaki?" I e muhe a kontesta i a bisa: "Manera bo alma ta biba, senor mi rei, ningun hende no por bira ni na man drechi ni na man robes for di nada ku senor mi rei a papia. Di berdat, tabata bo sirbido Joab ku a ordenami, i tabata e ku a pone tur e palabranan aki den boka di bo sirbiente.

²⁰Pa kambia aparensia di kosnan, bo sirbido Joab a hasi e kos aki. Ma mi senor ta sabi, manera sabiduria di e angel di Dios: e sa tur loke ta sosode riba tera."

²¹E ora ei rei a bisa Joab: "Mira awor, siguramente lo mi hasi e kos aki; pesei bai, trese e hoben Absalon bek."

²²I Joab a tira su kurpa abou i a buig ku su kara te na suela, i a bendishona rei; anto Joab a bisa: "Awe bo sirbido sa ku mi a hana grasia den bo bista, O senor mi rei, dor ku rei a kumpli ku e petishon di su sirbido."

²³Asina Joab a lanta, a bai Gesur i a trese Absalon na Jerusalem.

²⁴I rei a bisa: "Lagu'e bai su mes kas i no lagu'e mira mi kara." Asina Absalon a bai su mes kas i no a mira rei su kara.

²⁵Awor den henter Israel no tabatin ningun hende ku tabata risibi tantu elogio pa su bunitesa manera Absalon; for di su plant'i pia te na korona di su kabes no tabatin ningun defekto na dje.

²⁶I ki ora ku el a korta e kabei di su kabes (i tabata na fin di tur ana ku e tabata kort'e; pasobra e tabata pisa p'e, pesei e tabata kort'e), el a pisa e kabei di su kabes: dos shen siklo, segun e peso di rei.

²⁷I pa Absalon a nase tres yu homber i un yu muhe, kende su nomber tabata Tamar; e tabata un muhe masha bunita.

²⁸Awor Absalon a biba dos ana kompleto na Jerusalem, i no a mira rei su kara.

²⁹E ora ei Absalon a manda yama Joab pa mand'e serka rei, ma e no kier a bin serka dje. Asina el a bolbe manda yam'e pa di dos biaha, ma e no kier a bin.

³⁰Pesei el a bisa su sirbidonan: "Mira, Joab su kunuku ta keda pega ku esun di mi, i e tin puspas einan; bai send'e na kandela." Asina Absalon su sirbidonan a sende e kunuku na kandela.

³¹E ora ei Joab a lanta, a bin serka Absalon na su kas i a bis'e: "Pakiko bo sirbidonan a sende mi kunuku na kandela?"

³²Anto Absalon a kontesta Joab: "Mira, mi a manda yamabo, bisando: 'Bin aki, pa mi mandabo serka rei pa bisa: "Pakiko mi a bin for di Gesur? Lo tabata miho pa mi tabata ayanan ainda."' Pesei anto, lagami mira rei su kara; i si tin inikidat den mi, lagu'e matami."

³³I ora Joab a bin serka rei i a kont'e, el a manda yama Absalon. Asina el a bin serka rei i a tira su kurpa abou ku su kara te na suela dilanti di rei; i rei a sunchi Absalon.