Read Papantla Totonac 2 Samuel 16 Bible Online

2 Samuel 16 - Papantla Totonac bible

2 Samuel 16

¹Awor ora David a pasa un poko mas leu ku kabes di e seru, ata Ziba, sirbido di Mefi-boset, a bin kontr'e ku un par di buriku siya, i riba nan tabatin dos shen pan, shen troshi di rasenchi, shen fruta hechu i un saku-di-kueru ku bina aden.

²I rei a bisa Ziba: "Pakiko tur esaki?" I Ziba a bisa: "E burikunan ta pa e hendenan di kas di rei kore ariba, e pan i fruta hechu ta pa e hobennan kome i e bina ta pa ken ku ta tur desmaya den desierto, bebe."

³E ora ei rei a bisa: "I unda bo shon su yu homber ta?" I Ziba a bisa rei: "Mira, e ta kedando na Jerusalem, pasobra el a bisa: 'Awe e kas di Israel lo restora e reino di mi tata na mi.'"

⁴E ora ei rei a bisa Ziba: "Mira, tur loke ta pertenese na Mefi-boset ta di bo." I Ziba a bisa: "Mi ta buig te na suela; lagami hana grasia den bo bista, O senor mi rei!"

⁵Ora rei David a yega Bahurim, ata, a sali for di einan un homber di famia di e kas di Saul, kende su nomber tabata Simei, yu homber di Gera; el a sali ta maldishona kontinuamente segun ku e tabata bin.

⁶I el a tira David ku piedra i tur e sirbidonan di rei David; i tur e hendenan i tur e hombernan poderoso tabata na David su man drechi i na su man robes.

⁷I asina Simei a bisa ora ku e tabata maldishona: "Bai, bai, abo homber dramado di sanger, homber perverso!

⁸SENOR a trese bek riba bo tur e dramamentu di sanger di e kas di Saul, den kende su luga bo a reina; i SENOR a entrega e reino den man di bo yu homber Absalon. I mira, bo a wordu kohl den bo mes maldat, pasobra bo ta un homber dramado di sanger."

⁹E ora ei Abisai, yu homber di Sarvia, a bisa rei: "Pakiko e kacho morto aki ta maldishona senor mi rei? Lagami bai na e otro banda awor i kita su kabes afo."

¹⁰Ma rei a bisa: "Kiko mi tin di hasi ku boso, O yu hombernan di Sarvia? Si e maldishona, i si SENOR a bis'e: 'Maldishona David,' e ora ei ken por bisa: 'Pakiko bo a hasi esei?'"

¹¹E ora ei David a bisa Abisai i tur su sirbidonan: "Mira, mi yu homber ku a sali for di mi ta buskami pa mata; awor kuantu mas e benjaminita aki? Lagu'e pa su kuenta i lagu'e maldishona, pasobra ta SENOR a bis'e.

¹²Podise SENOR lo mira riba mi aflikshon i debolbemi loke ta bon na luga di su maldishon riba e dia aki."

¹³Asina David i su hombernan a sigui nan kaminda; i Simei a bai ku nan riba e subida di seru den e mesun direkshon ku David, i segun ku e tabata bai e tabata maldishona i tira piedra, i manda tera riba dje.

¹⁴I rei, i tur e hendenan ku tabata huntu kune, a yega morto kansa, i ayanan el a sosega.

¹⁵E ora ei Absalon i tur e hendenan, e hombernan di Israel, a yega Jerusalem, i Ahitofel huntu kune.

¹⁶Awor a sosode ku ora Husai e arkita, David su amigu, a yega serka Absalon, Husai a bisa Absalon: "Biba rei! Biba rei!"

¹⁷I Absalon a bisa Husai: "Ta esaki ta bo fieldat pa ku bo amigu? Pakiko bo no a bai ku bo amigu?"

¹⁸E ora ei Husai a bisa Absalon: "No! Pasobra esun ku SENOR i e pueblo aki i tur e hombernan di Israel a skohe, di dje lo mi ta, i huntu kune lo mi keda.

¹⁹I ademas, ta ken lo mi sirbi? Lo mi no sirbi den presensia di su yu homber? Manera mi a sirbi den bo tata su presensia, asina lo mi sirbi den bo presensia."

²⁰E ora ei Absalon a bisa Ahitofel: "Duna bo konseho. Kiko nos mester hasi?"

²¹I Ahitofel a bisa Absalon: "Bai drumi ku bo tata su konkubinanan ku el a laga pa kuida e kas; e ora ei henter Israel lo tende ku bo a hasi bo mes un abominashon pa bo tata. E mannan di tur ku ta ku bo tambe lo wordu fortalesi."

²²Asina nan a arma un tent pa Absalon riba dak, i Absalon a drumi ku e konkubinanan di su tata den bista di henter Israel.

²³I e konseho di Ahitofel, ku e tabata duna den e dianan ei, tabata manera konseho di un hende ku a konsulta ku e palabra di Dios; asina tur konseho di Ahitofel tabata wordu konsidera tantu dor di David komo dor di Absalon.