Read Papantla Totonac 2 Samuel 17 Bible Online

2 Samuel 17 - Papantla Totonac bible

2 Samuel 17

¹Ademas, Ahitofel a bisa Absalon: "Pa fabor, lagami skohe diesdos mil homber pa mi lanta i persigui David awe nochi.

²I lo mi bin riba dje ora ku e ta morto kansa i debilita, i lo mi spant'e, asina ku tur e hendenan ku ta huntu kune lo hui. E ora ei lo mi mata rei so,

³i lo mi trese henter e pueblo bek serka bo. E regreso di henter e pueblo ta depende di e homber ku bo ta buska; e ora ei henter e pueblo lo ta na pas."

⁴I e plan a agrada Absalon i tur e ansianonan di Israel.

⁵Anto Absalon a bisa: "Awor yama Husai e arkita tambe, i laga nos tende kiko e tin di bisa."

⁶Ora Husai a bin serka Absalon, Absalon a bis'e: "Ahitofel a papia asin'aki. Nos mester ehekuta su plan? Si ta no, abo papia."

⁷Asina Husai a bisa Absalon: "E biaha aki e konseho ku Ahitofel a duna no ta bon."

⁸Ademas Husai a bisa: "Bo konose bo tata i su hombernan, ku nan ta hombernan poderoso i ku nan ta furioso manera un ber roba di su yunan den sabana. I bo tata ta un eksperto den asunto di guera, i lo no pasa nochi huntu ku e pueblo.

⁹Mira, el a skonde awor den un di e kuebanan of den un otro luga; i lo sosode ku ora ku e bin riba nan den e prome atake, ken ku tende esaki lo bisa: 'Tabatin un matansa meimei di e pueblo ku ta sigui Absalon.'

¹⁰I asta esun ku ta balente, kende su kurason ta manera kurason di leon, lo desmaya kompletamente; pasobra henter Israel sa ku bo tata ta un homber poderoso i ku esnan ku ta huntu kune ta hombernan balente.

¹¹"Ma mi ta konseha pa henter Israel reuni serka bo, for di Dan te na Beerseba, den abundansia manera e santu ku tin kantu di laman, i pa bo bai personalmente den bataya.

¹²Asina nos lo bin riba dje na un di e luganan kaminda e por wordu hana, i nos lo kai riba dje manera serena ta kai riba suela; i di dje i di tur e hombernan ku ta huntu kune, ni sikiera un lo resta.

¹³I si e retira su mes bai den un stat, e ora ei henter Israel lo trese kabuya na e stat ei, i nos lo lastra e stat hiba den vaye te ora ni un piedra chikitu no wordu hana mas ayanan."

¹⁴E ora ei Absalon i tur e hombernan di Israel a bisa: "E konseho di Husai e arkita ta miho ku e konseho di Ahitofel." Pasobra SENOR a ordena pa impedi e bon konseho di Ahitofel, pa SENOR por trese kalamidat riba Absalon.

¹⁵Anto Husai a bisa e saserdotenan Zadok i Abiatar: "Esaki ta loke Ahitofel a konseha Absalon i e ansianonan di Israel, i esaki ta loke ami a konseha.

¹⁶Pesei anto, manda avisa David lihe, bisando: 'No pasa nochi na e luganan kaminda por krusa riu den desierto, ma di tur manera krusa bai na e otro banda, pa rei i henter e pueblo ku ta huntu kune no wordu destrui.'"

¹⁷Awor Jonatan i Ahimaas tabata keda na En-rogel; i un sirbiente mester a bai hiba notisia pa nan, i nan mester a bai konta rei David, pasobra nan no por a laga mira nan ta drenta stat.

¹⁸Ma un mucha homber a mira nan i a bisa Absalon; asina nan dos a sali bai lihe i a yega na e kas di un homber na Bahurim, ku tabatin un pos den su kura; i nan a baha den dje.

¹⁹I e muhe a kohe un ko'i tapa i a habrie riba boka di e pos i a plama mainshi riba dje, asina ku no por a ripara nada.

²⁰E ora ei Absalon su sirbidonan a bin serka e muhe na e kas i a bisa: "Unda Ahimaas i Jonatan ta?" I e muhe a bisa nan: "Nan a krusa e roi di awa." I ora nan a buska i no por a hana nan, nan a bai Jerusalem bek.

²¹I a sosode ku despues ku nan a bai e hobennan a sali for di e pos i a bai duna rei David e notisia; i nan a bisa David: "Lanta i krusa e awa lihe, pasobra tal i tal kos Ahitofel a konseha kontra bo."

²²E ora ei David i henter e pueblo ku tabata huntu kune a lanta i a krusa Jordan; i ora dia tabata habri no a keda ni un ku no a krusa Jordan.

²³Awor ora Ahitofel a mira ku nan no a sigui su konseho, el a siya su buriku i a lanta bai su kas na su stat; i el a pone su kas na ordu i a horka su kurpa. Asina el a muri i a wordu dera den graf di su tata.

²⁴Anto David a yega Mahanaim. I Absalon a krusa Jordan, e ku tur e hombernan di Israel huntu kune.

²⁵I Absalon a pone Amasa na kabes di e ehersito na luga di Joab. Awor Amasa tabata yu homber di un homber, kende su nomber tabata Itra, un israelita ku a drumi ku Abigail, yu muhe di Nahas, ruman muhe di Sarvia, Joab su mama.

²⁶I Israel i Absalon a kampa na tera di Galaad.

²⁷Awor ora David a yega Mahanaim, Sobi, yu homber di Nahas, for di Raba di e yu hombernan di Amon, i Makir, yu homber di Amiel, for di Lo-debar, i Barzilai e galaadita for di Rogelim,

²⁸a trese kama, komchi, wea di klei, trigo, puspas, harina, mainshi tosta, bonchi, lenteha, simia tosta,

²⁹miel, lechi kuaha, karne, i keshi di lechi di baka, pa David i pa e pueblo ku tabata huntu kune, pa nan kome; pasobra nan a bisa: "E pueblo tin hamber i ta morto kansa i tin set den desierto."