Read Papantla Totonac 2 Samuel 18 Bible Online

2 Samuel 18 - Papantla Totonac bible

2 Samuel 18

¹E ora ei David a konta e pueblo ku tabata huntu kune i a pone riba nan komandantenan di milnan i komandantenan di shennan.

²I David a manda e pueblo bai, un di tres parti bou di komando di Joab, un di tres parti bou di komando di Abisai, yu homber di Sarvia, Joab su ruman homber, i un di tres parti bou di komando di Itai e geteo. I rei a bisa e pueblo: "Siguramente ami mes tambe lo bai ku boso."

³Ma e pueblo a bisa: "Abo no mester bai, pasobra si nos hui, nan lo no preokupa pa nos; maske mitar di nos muri, nan lo no preokupa pa nos. Ma abo ta bal pa dies mil di nos; pesei anto, ta miho bo yuda nos for di stat."

⁴Anto rei a bisa nan: "Loke boso ta hana miho, esei lo mi hasi." Asina rei a bai para banda di e porta di stat, i henter e pueblo a sali na trupanan di shennan i di milnan.

⁵I rei a duna ordu na Joab, Abisai i Itai, bisando: "Trata e hoben Absalon ku suavidat pa mi kousa." I henter e pueblo a tende ora rei a enkarga tur e komandantenan tokante di Absalon.

⁶E ora ei e pueblo a sali bai den sabana kontra Israel, i e bataya a tuma luga den e mondi-sera di Efrain.

⁷I e pueblo di Israel a wordu derota ayanan dilanti di e sirbidonan di David, i e matansa e dia ei tabata grandi, binti mil homber.

⁸Pasobra e bataya einan a plama den henter e region, i e mondi-sera a devora mas hende e dia ei ku spada a devora.

⁹Awor Absalon a topa ku e sirbidonan di David. I Absalon tabata kore riba su mula; i ora ku e mula a pasa bou di e ramanan diki di un palu grandi di eik, su kabes a keda pega den e palu di eik, asina ku el a keda kologa entre shelu i tera, mientras ku e mula ku tabata bou di dje a sigui bai.

¹⁰I un homber a mira esaki i el a bai konta Joab i a bisa: "Ata, mi a mira Absalon ta kologa den un palu di eik."

¹¹Anto Joab a bisa e homber ku a bin kont'e: "Awor si bo a mir'e, pakiko bo no a dal e abou ei mes? I lo mi a dunabo dies pida plata i un faha."

¹²I e homber a bisa Joab: "Ni maske mi risibi mil pida plata den mi man, lo mi no lanta mi man kontra rei su yu homber; pasobra nos a tende rei duna abo, Abisai i Itai e ordu, bisando: 'Proteha e hoben Absalon pa mi!'

¹³Of, si mi a trata ku traishon kontra su bida (i no tin nada skondi pa rei), e ora ei abo mes lo a distansia bo mes di mi."

¹⁴E ora ei Joab a bisa: "Mi no ta perde tempu ku bo akinan." Asina el a kohe tres lansa den su man i a hinka nan den kurason di Absalon, mientras ku Absalon tabata bibu ainda den e palu di eik.

¹⁵I dies hoben ku tabata karga Joab su armanan a rondon'e i a dal Absalon mata.

¹⁶E ora ei Joab a supla trompet i e pueblo a bolbe despues di a persigui Israel, pasobra Joab a wanta e pueblo.

¹⁷I nan a kohe Absalon i a tir'e den un pos hundu den e mondi-sera, i a lanta un monton masha grandi di piedra riba dje. I henter Israel a hui, kada un pa su tent.

¹⁸Awor durante di su bida Absalon a traha pa su mes un pilar ku ta keda den e Vaye di Rei, pasobra el a bisa: "Mi no tin yu homber pa preserva mi nomber." Pesei el a duna e pilar su mes nomber, i e ta wordu yama monumento di Absalon te dia djawe.

¹⁹E ora ei Ahimaas, yu homber di Zadok, a bisa: "Pa fabor, lagami kore bai hiba notisia pa rei, ku SENOR a libr'e for di man di su enemigunan."

²⁰Ma Joab a bis'e: "Abo no ta e homber pa hiba notisia awe, abo mag hiba notisia un otro dia; ma bo no mag hiba notisia awe, pasobra rei su yu homber a muri."

²¹Anto Joab a bisa un kusita: "Bai abo, konta rei loke bo a mira." Asina e kusita a buig pa Joab i a kore bai.

²²Awor Ahimaas, yu homber di Zadok, a bolbe bisa Joab: "Maske kiko pasa, pa fabor, laga ami tambe kore bai tras di e kusita." I Joab a bisa: "Pakiko bo ta kore, mi yu? Bo no tin notisia pa kual bo lo hana algu rekompensa?"

²³El a bisa: "Maske kiko pasa, mi kier kore." Asina Joab a bis'e: "Kore." Anto Ahimaas a kore i a tuma e kaminda di sabana i a pasa e kusita.

²⁴Awor David tabata sinta meimei di e dos portanan; i e guardia a subi bai riba dak di e porta den e muraya, i a hisa su kara wak, i el a mira un homber ku ta kore su so.

²⁵I e guardia a yama i a konta rei. I rei a bisa: "Si e ta su so, e tin bon notisia." I e tabata yega mas i mas serka.

²⁶E ora ei e guardia a mira un otro homber ta kore bin; i e guardia a yama e wardado-di-porta i a bisa: "At'un otro homber ku ta kore su so." I rei a bisa: "Esaki tambe ta trese bon notisia."

²⁷I e guardia a bisa: "Ta parsemi ku esun prome ta kore meskos ku Ahimaas, yu homber di Zadok." I rei a bisa: "Esaki ta un bon homber i ta bin ku bon notisia."

²⁸I Ahimaas a yama i a bisa rei: "Tur kos ta bon." I el a buig dilanti di rei ku su kara te na suela. I el a bisa: "Bendishona ta SENOR bo Dios, Kende a entrega e hombernan ku a lanta nan man kontra senor mi rei."

²⁹I rei a bisa: "E hoben Absalon ta bon?" I Ahimaas a kontesta: "Ora Joab a manda rei su sirbido, i bo sirbido, mi a mira un gran konfushon, ma mi no tabata sa kiko esei tabata."

³⁰E ora ei rei a bisa: "Hala un banda i para aki." Asina el a hala un banda i a keda para.

³¹I at'e kusita a yega, i e kusita a bisa: "Laga senor mi rei risibi bon notisia, pasobra SENOR a librabo e dia aki for di man di tur esnan ku a lanta kontra bo."

³²Anto rei a bisa e kusita: "E hoben Absalon ta bon?" I e kusita a kontesta: "Laga e enemigunan di senor mi rei, i tur ku lanta kontra bo pa maldat, sea manera e hoben ei!"

³³I rei a keda masha konmovi i a subi bai den e kamber riba e porta i a yora. I asina el a bisa, mientras ku e tabata kana: "O mi yu Absalon, mi yu, mi yu Absalon! Miho ta ami a muri na bo luga, O Absalon, mi yu, mi yu!"