Read Papantla Totonac 2 Samuel 19 Bible Online

2 Samuel 19 - Papantla Totonac bible

2 Samuel 19

¹E ora ei nan a bisa Joab: "Ata rei ta yora i ta lamenta pa Absalon."

²I e viktoria e dia ei a kambia den lamento pa henter e pueblo, pasobra e pueblo a tende nan bisa e dia ei: "Rei ta tristu pa motibu di su yu homber."

³Pesei e pueblo a drenta e stat ketu-ketu e dia ei, manera hende ku tin berguensa ta bai ketu-ketu ora nan ta hui for di den bataya.

⁴I rei a tapa su kara i a grita na bos haltu: "O mi yu Absalon, O Absalon, mi yu, mi yu!"

⁵E ora ei Joab a drenta kas serka rei i a bisa: "Awe bo a pone berguensa na kara di tur bo sirbidonan, ku awe a salba bo bida i bida di bo yu hombernan i yu muhenan, bida di bo esposanan i bida di bo konkubinanan,

⁶dor di stima esnan ku ta odiabo i dor di odia esnan ku ta stimabo. Pasobra awe bo a demostra ku prensnan i sirbidonan no ta nifika nada pa bo; pasobra awe mi a komprende ku si Absalon tabata na bida i nos tur tabata morto, anto lo bo a keda kontentu.

⁷Pesei anto, lanta bai pafo i enkurasha bo sirbidonan, pasobra mi ta hura na SENOR, si bo no bai pafo, siguramente ni un hende lo no pasa nochi serka bo. I esaki lo ta pio pa bo ku tur e maldat ku a bin riba bo for di bo hubentut te awor."

⁸Asina rei a lanta i a sinta den e porta di stat. Ora nan a konta henter e pueblo, bisando: "Mira, rei ta sinta den e porta di stat," e ora ei tur e hendenan a bin dilanti di rei. Awor Israel a hui, kada un pa su tent. Awor Israel a hui, kada un na su tent.

⁹I henter e pueblo tabata pleita den tur e tribunan di Israel, bisando: "Rei a libra nos for di man di nos enemigunan i a salba nos for di man di e filisteonan, ma awor el a hui bai for di e tera pa motibu di Absalon.

¹⁰Sinembargo, Absalon, kende nos a ungi riba nos, a muri den bataya. Awor anto, pakiko boso no ta bisa nada tokante di e asunto di trese rei bek?"

¹¹E ora ei rei David a manda bisa e saserdotenan Zadok i Abiatar: "Papia ku e ansianonan di Juda, bisando: 'Pakiko boso ta e ultimonan pa trese rei su kas bek, ya ku loke henter Israel a bisa, a yega na rei, si, na su kas?

¹²Boso ta mi rumannan; boso ta mi wesu i mi karni. Pakiko anto boso mester ta e ultimonan pa trese rei bek?'

¹³I bisa Amasa: 'No ta mi wesu i mi karni bo ta? Ku Dios hasi asina ku mi i pio ainda, si abo no bira komandante di e ehersito kontinuamente mi dilanti na luga di Joab.'"

¹⁴Asina el a gana kurason di tur e hombernan di Juda, komo si fuera nan tabata un solo homber, asina ku nan a manda bisa rei: "Bolbe, abo i tur bo sirbidonan."

¹⁵E ora ei rei a bolbe i a yega te na Jordan. I Juda a bin Gilgal pa bai kontra ku rei, pa hiba rei na e otro banda di Jordan.

¹⁶E ora ei Simei, yu homber di Gera e benjaminita, kende tabata di Bahurim, a hasi lihe i a baha bin ku e hombernan di Juda pa kontra ku rei David.

¹⁷I tabatin mil homber di Benjamin huntu kune, huntu ku Ziba, sirbido di e kas di Saul, ku su diesinku yu hombernan i su binti sirbidonan huntu kune; i nan a kore bai na Jordan dilanti di rei.

¹⁸I nan a sigui krusa e riu, kaminda awa no ta hundu, pa pasa rei su hendenan di kas hiba na e otro banda, i pa hasi loke tabata bon den su bista. I Simei, yu homber di Gera, a tira su kurpa abou dilanti di rei, net ora ku esaki tabata bai krusa Jordan.

¹⁹Asina el a bisa rei: "No laga mi senor konsiderami kulpabel, ni korda loke bo sirbido a hasi robes riba e dia ku senor mi rei a sali for di Jerusalem; no laga rei tuma esaki na kurason.

²⁰Pasobra ami, bo sirbido, sa ku mi a peka; pesei mira, mi a bin awe, esun prome di henter e kas di Jose, pa baha bin kontra ku senor mi rei."

²¹Ma Abisai, yu homber di Sarvia, a kontesta i a bisa: "Simei no mester wordu mata pa esaki, pasobra el a maldishona SENOR Su ungi?"

²²E ora ei David a bisa: "Kiko mi tin di hasi ku boso, O yunan di Sarvia, pa boso ta un atversario pa mi awe? Mester mata un hende na Israel awe? Akaso mi no sa ku ta ami ta rei riba Israel awe?"

²³I rei a bisa Simei: "Lo bo no muri." Asina rei a hur'e.

²⁴E ora ei Mefi-boset, yu homber di Saul, a baha bin pa kontra ku rei. I e no a laba su pianan, ni a korta su mustashi, ni a laba su pananan, for di dia ku rei a bai te dia ku el a bin kas den pas.

²⁵I ora Mefi-boset a yega di Jerusalem pa kontra ku rei, rei a bis'e: "Pakiko bo no a bai ku mi, Mefi-boset?"

²⁶I el a kontesta: "O senor mi rei, mi sirbido a ganami; pasobra bo sirbido a bisa: 'Lo mi siya un buriku pa mi mes, pa mi kore riba dje i bai ku rei,' pasobra bo sirbido ta lam.

²⁷Ademas, el a kalumnia bo sirbido serka senor mi rei; ma senor mi rei ta manera e angel di Dios; pesei, hasi loke ta bon den bo bista.

²⁸Pasobra henter e kas di mi tata no tabata nada otro sino hende morto dilanti di senor mi rei; tog bo a pone bo sirbido entre esnan ku a kome na bo mesa. Ki derecho mas mi tin pa mi keha ainda serka rei?"

²⁹Pesei rei a bis'e: "Pakiko bo ta papia ainda di bo asuntonan? Ami a disidi: 'Abo ku Ziba lo parti e tera.'"

³⁰I Mefi-boset a bisa rei: "Lagu'e tuma tur mes, awor ku senor mi rei a yega su kas sano i salvo."

³¹Awor Barzilai e galaadita a baha bin for di Rogelim; i el a sigui bai te na Jordan ku rei, pa kompan'e bai te na e otro banda di Jordan.

³²Awor Barzilai tabata hopi bieu, i e tabatin ochenta ana. I el a provee pa rei durante di rei su estadia na Mahanaim, pasobra e tabata un homber masha riku mes.

³³I rei a bisa Barzilai: "Abo krusa Jordan huntu ku mi i ami lo provee pa bo na Jerusalem serka mi."

³⁴Ma Barzilai a bisa rei: "Ta kuantu tempu mas mi tin di biba, pa mi lo a bai Jerusalem ku rei?

³⁵Mi tin ochenta ana awor. Mi por distingui entre bon i malu? Of bo sirbido por sinti smak di loke mi ta kome of loke mi ta bebe? Of mi por tende ainda e bos di hombernan i muhenan ku ta kanta? Pakiko anto bo sirbido mester ta un karga mas pa senor mi rei?

³⁶Bo sirbido lo djis krusa Jordan ku rei. Pakiko rei mester dunami e rekompensa aki?

³⁷Pa fabor, laga bo sirbido bai bek, pa mi por muri den mi mes stat serka di e graf di mi tata i mi mama. Sinembargo, ata bo sirbido Kimam aki, lagu'e krusa ku senor mi rei, i hasi p'e loke ta bon den bo bista."

³⁸I rei a kontesta: "Kimam lo krusa huntu ku mi, i lo mi hasi p'e loke ta bon den bo bista; i tur loke bo pidimi, lo mi hasi pa bo."

³⁹Henter e pueblo a krusa Jordan i rei tambe a krusa. E ora ei rei a sunchi Barzilai i a bendishon'e, i Barzilai a bolbe su kas.

⁴⁰Awor rei a sigui pa Gilgal, i Kimam a bai kune. I henter e pueblo di Juda i tambe mitar di e pueblo di Israel a kompana rei.

⁴¹I mira, tur e hombernan di Israel a bin serka rei i a bisa rei: "Pakiko nos rumannan, e hombernan di Juda, a sekuestrabo, i a trese rei i e hendenan di su kas i tur David su hombernan huntu kune na e otro banda di Jordan?"

⁴²E ora ei tur e hombernan di Juda a kontesta e hombernan di Israel: "Pasobra rei ta un famia yega di nos. Pakiko anto boso ta rabia tokante di e asunto aki? Nos a yega di kome riba kuenta di rei? Nos a kohe algu pa nos mes?"

⁴³Ma e hombernan di Israel a kontesta e hombernan di Juda i a bisa: "Nos tin dies parti den rei, pesei tambe nos tin mas derecho riba David ku boso. Pakiko boso a trata nos ku menospresio anto? No ta nos a konseha prome pa trese nos rei bek?" Tog e palabranan di e hombernan di Juda tabata mas duru ku e palabranan di e hombernan di Israel.