Read Papantla Totonac 2 Samuel 2 Bible Online

2 Samuel 2 - Papantla Totonac bible

2 Samuel 2

¹Despues a sosode ku David a konsulta ku SENOR, bisando: "Mi mester bai na un di e statnan di Juda?" I SENOR a bis'e: "Bai." Asina David a bisa: "Na unda mi mester bai?" I El a bisa: "Na Hebron."

²Anto David a bai ayanan, huntu ku su dos esposanan: Ahinoam e jezreelita i Abigail, biuda di Nabal e karmelita.

³I David a hiba su hombernan ku tabata huntu kune, kada un ku e hendenan di su kas; i nan a bai biba den e statnan di Hebron.

⁴E ora ei e hombernan di Juda a bin, i ayanan nan a ungi David komo rei riba e kas di Juda. I nan a konta David, bisando: "Ta e hombernan di Jabes-galaad a dera Saul."

⁵I David a manda mensaheronan serka e hombernan di Jabes-galaad, i a bisa nan: "Ku SENOR bendishona boso, pasobra boso a mustra e karino aki na Saul, boso senor, i a der'e.

⁶I awor, ku SENOR mustra karino i berdat na boso; i ami tambe lo mustra e bondat aki na boso, pasobra boso a hasi e kos aki.

⁷Pesei anto, laga boso mannan ta fuerte i sea balente; pasobra Saul, boso senor, ta morto, i e kas di Juda a ungimi komo rei riba nan."

⁸Ma Abner, yu homber di Ner, komandante di Saul su ehersito, a tuma Is-boset, yu homber di Saul, i a hib'e Mahanaim.

⁹I el a hasie rei di Galaad, di e gesuritanan, di Jezreel, di Efrain i di Benjamin, si, di henter Israel.

¹⁰Is-boset, Saul su yu homber, tabatin kuarenta ana dia ku el a bira rei riba Israel, i e tabata rei pa dos ana. E kas di Juda, sinembargo, a sigui David.

¹¹I e temporada ku David tabata rei riba e kas di Juda na Hebron tabata shete ana i seis luna.

¹²Awor Abner, yu homber di Ner, a sali for di Mahanaim pa bai Gabaon huntu ku e sirbidonan di Is-boset, yu homber di Saul.

¹³I Joab, yu homber di Sarvia, i e sirbidonan di David a sali i a kontra nan na e tanki di awa di Gabaon; i nan a sinta, un na un banda di e tanki i e otro na e otro banda di e tanki.

¹⁴E ora ei Abner a bisa Joab: "Awor, laga e hobennan lanta i tene un kompetensia nos dilanti." I Joab a bisa: "Laga nan lanta."

¹⁵Asina nan a lanta i a wordu konta, diesdos pa Benjamin i Is-boset, yu homber di Saul, i diesdos di e sirbidonan di David.

¹⁶I kada un di nan a gara su oponente na su kabes, i a hinka su spada den kustia di su oponente; asina nan a kai abou huntu. Pesei e luga ei a wordu yama Helkat-hazurim, ku ta keda na Gabaon.

¹⁷I e dia ei e bataya tabata masha fuerte, i Abner i e hombernan di Israel a wordu derota dilanti di e sirbidonan di David.

¹⁸Awor e tres yu hombernan di Sarvia tabata ayanan, Joab, Abisai i Asael; i Asael por a kore mes lihe ku un gasel den sabana.

¹⁹I Asael a persigui Abner i no a bira ni na man drechi ni na man robes ora ku e tabata sigui tras di Abner.

²⁰Anto Abner a drai wak su tras i a bisa: "T'abo, Asael?" I Asael a kontesta: "Si, t'ami."

²¹Anto Abner a bis'e: "Kita na bo man drechi of na bo man robes, i gara un di e hobennan i tuma su botin pa bo." Ma Asael no tabata kier a stop di sigui su tras.

²²I Abner a bolbe bisa Asael: "Bira bai, stop di siguimi. Pakiko mi mester dal bo tumbabo abou? E ora ei kon mi ta hasi hisa kara wak bo ruman Joab?"

²³Sinembargo, el a nenga di bira bai; pesei Abner a dal e den su barika ku e banda stompi di e lansa, asina ku e lansa a sali pa su lomba. I el a kai einan i a muri ei mes. I a sosode ku tur hende ku a yega na e luga kaminda Asael a kai muri, a keda para ketu.

²⁴Ma Joab i Abisai a persigui Abner. I ora solo tabata baha nan a yega na e seru di Ama, ku ta keda dilanti di Gia den direkshon di e desierto di Gabaon.

²⁵I e yu hombernan di Benjamin a reuni huntu tras di Abner i a forma un trupa, i nan a para riba kabes di un seru.

²⁶E ora ei Abner a yama Joab i a bisa: "E spada mester devora pa semper? Bo no ta realisa ku e final lo ta amargura? Kuantu tempu lo dura prome ku bo bisa e hendenan pa bira bek, pa nan stop di sigui nan rumannan?"

²⁷I Joab a bisa: "Manera Dios ta biba, si bo no a papia, siguramente e pueblo lo a bai for di awe mainta; kada un lo a stop di sigui su ruman."

²⁸Anto Joab a supla trompet; i tur e hendenan a keda para i no a persigui Israel mas, ni nan no a sigui bringa mas.

²⁹I Abner i su hombernan a pasa dor di Araba henter e anochi ei; asina nan a krusa Jordan, a kana henter mainta i a yega Mahanaim.

³⁰E ora ei Joab a bolbe i a stop di sigui Abner. I ora ku el a reuni tur e hendenan, tabata falta diesnuebe sirbido di David, fuera di Asael.

³¹Ma e sirbidonan di David a mata hopi homber di Benjamin i di Abner, asina ku tres shent'i sesenta homber a muri.

³²I nan a kohe Asael i a der'e den e tumba di su tata ku tabata keda na Betlehem. Anto Joab i su hombernan a kana henter anochi, i nan a yega Hebron ora dia tabata habri.