Read Papantla Totonac 2 Samuel 20 Bible Online

2 Samuel 20 - Papantla Totonac bible

2 Samuel 20

¹Awor a sosode ku tabatin un homber perverso ayanan, ku tabata yama Seba, yu homber di Bikri, un benjaminita; i el a supla trompet i a bisa: "Nos no tin parti den David, ni nos no tin erensia den e yu homber di Isai; kada homber bai su tent, O Israel!"

²Asina tur e hombernan di Israel a bandona David pa sigui Seba, yu homber di Bikri; ma e hombernan di Juda a keda fiel na nan rei, for di Jordan te na Jerusalem.

³Anto David a yega su kas na Jerusalem, i rei a tuma e dies muhenan, e konkubinanan ku el a laga pa kuida kas, i a pone nan bou di vigilansia i a provee kuminda pa nan, ma e no a drumi ku nan. Asina nan a keda sera te dia nan a muri, bibando komo biuda.

⁴E ora ei rei a bisa Amasa: "Yama e hombernan di Juda pa mi denter di tres dia, i abo mes sea presente akinan."

⁵Asina Amasa a bai yama e hombernan di Juda, ma el a tarda mas ku e tempu fiha ku David a stipula p'e.

⁶I David a bisa Abisai: "Awor Seba, yu homber di Bikri, lo hasi nos mas dano ku Absalon; tuma e sirbidonan di bo senor i persiguie, pa e no hana statnan fortifika pa su mes i skapa for di nos bista."

⁷Asina e hombernan di Joab a sali su tras, huntu ku e kereteonan i e peleteonan i tur e hombernan poderoso; i nan a sali for di Jerusalem pa persigui Seba, yu homber di Bikri.

⁸Ora nan a yega na e piedra grandi ku ta keda na Gabaon, Amasa a bin topa nan. Awor Joab tabatin su pana di militar bisti, i riba dje tabatin un faha ku un spada den su balina, pega na su hep; i ora ku e tabata kana bai dilanti, e spada a sali kai.

⁹I Joab a bisa Amasa: "Kon ta bai, mi ruman?" I Joab a kohe Amasa na su barba ku su man drechi pa sunch'e.

¹⁰Ma Amasa no a paga tino na e spada ku tabata den Joab su man, asina ku el a hink'e den su barika kune i a basha su shirishiri abou na suela, i no a hink'e mas; i el a muri. Despues Joab i su ruman homber Abisai a persigui Seba, yu homber di Bikri.

¹¹Awor tabatin un di e hombernan di Joab para banda di dje i el a bisa: "Ken ku ta na fabor di Joab i ken ku ta pa David, lagu'e sigui Joab."

¹²Ma Amasa a keda bana den su sanger meimei di e kaminda grandi. I ora ku e homber a mira ku tur hende tabata keda para, el a hala Amasa for di kaminda grandi hib'e den kunuku i a tira un pana di bisti riba dje, ora ku el a mira ku tur hende ku pasa tabata keda para.

¹³Asina ku el a hal'e for di kaminda grandi, tur e hombernan a sigui tras di Joab pa persigui Seba, yu homber di Bikri.

¹⁴Awor Seba a pasa dor di tur e tribunan di Israel bai Abel te na Bet-maaka, ku tur e beritanan, kendenan a reuni huntu i tambe a sigui su tras.

¹⁵I e pueblo a bin i a rondon'e na Abel Bet-maaka i nan a lanta un baluarte kontra e stat, i esaki tabata yega te na e luga fortifika; i henter e pueblo ku tabata huntu ku Joab tabata destrui e muraya pa bash'e abou.

¹⁶E ora ei un muhe sabi a grita for di e stat: "Tende, tende! Pa fabor, bisa Joab: 'Bin aki pa mi papia ku bo.'"

¹⁷Asina el a bai serka dje, i e muhe a bisa: "T'abo ta Joab?" I el a kontesta: "Si, t'ami." E ora ei e muhe a bis'e: "Skucha e palabranan di bo sirbiente." I Joab a kontesta: "Mi ta skucha."

¹⁸Anto e muhe a papia, bisando: "Antes nan tabata bisa: 'Sigur-sigur nan lo buska konseho na Abel,' i asina nan tabata kaba ku e asunto.

¹⁹Mi ta un di esnan ku ta gusta pas i ta fiel den Israel. Bo ta buska pa destrui un stat, un mama den Israel. Pakiko bo kier traga e erensia di SENOR?"

²⁰I Joab a kontesta i a bisa: "Leu, ku esei sea leu di mi di traga of di destrui!

²¹No t'asina e asunto ta. Ma un homber di e serunan di Efrain ku yama Seba, yu homber di Bikri, a lanta su man kontra rei David. Djis entregu'e, i lo mi bai for di e stat." I e muhe a bisa Joab: "Mira, su kabes lo wordu tira pa bo ofer di e muraya."

²²E ora ei e muhe, ku sabiduria, a bai serka henter e pueblo. I nan a korta kabes di Seba, yu homber di Bikri, kit'afo i a tir'e pa Joab. Asina el a supla trompet i nan a retira for di e stat, kada un pa su tent. Joab tambe a bolbe Jerusalem serka rei.

²³Awor Joab tabata manda riba henter e ehersito di Israel; i Benaia, yu homber di Joiada, tabata manda riba e kereteonan i riba e peleteonan;

²⁴i Adoram tabata manda riba e trabou forsa; i Josafat, yu homber di Ahilud, tabata e registrado;

²⁵i Seva tabata eskriba; i Zadok ku Abiatar tabata saserdote;

²⁶anto Ira e jaireo tambe tabata saserdote di David.