Read Papantla Totonac 2 Samuel 23 Bible Online

2 Samuel 23 - Papantla Totonac bible

2 Samuel 23

¹Awor esakinan ta e ultimo palabranan di David. "David, yu homber di Isai, ta deklara, i e homber ku a wordu halsa te na haltu ta deklara, e ungi di e Dios di Jakob, i e salmista dushi di Israel:

²"E Spiritu di SENOR a papia pa medio di mi, i Su palabra tabata riba mi lenga.

³E Dios di Israel a bisa, e Baranka di Israel a papia ku mi: 'Esun ku ta goberna hende ku hustisia, ku ta goberna den e temor di Dios,

⁴ta manera e lus di mainta ora solo ta sali, un mainta sin nubia, ora yerba fresku ta spreit for di tera debi na e klaridat di solo despues di awaseru.'

⁵"Di berdat, no t'asina mi kas ta pa ku Dios? Pasobra El a sera un aliansa eterno ku mi, ordena den tur kos, i sigura. Pasobra esaki ta tur mi salbashon i tur mi deseo; lo E no hasi esaki krese di berdat?

⁶Ma esnan perverso, kada un di nan lo wordu benta afo manera sumpina, pasobra nan no por wordu kohl ku man;

⁷ma e homber ku mishi ku nan mester ta arma ku heru i kabu di lansa, i nan lo ta kompletamente kima ku kandela na nan luga."

⁸Esakinan ta e nombernan di e hombernan poderoso ku David tabatin: Joseb-basebet, un takmonita, hefe di e kapitannan; e tabata wordu yama Adino e esnita pa motibu di ocho shen homber ku el a mata den un solo biaha.

⁹I despues di dje a sigui Eleazar, yu homber di Dodo e ahohita, un di e tres hombernan poderoso ku tabata huntu ku David, tempu ku nan a desafia e filisteonan ku tabata reuni ayanan pa bataya, mientras ku e hombernan di Israel a retira nan mes.

¹⁰El a lanta i a mata e filisteonan te ora su man a kansa i a keda pega na e spada. I e dia ei SENOR a obra un gran viktoria; i e pueblo a bolbe su tras solamente pa plunder e mortonan.

¹¹Awor Sama, yu homber di Age e hararita, tabata despues di dje. I e filisteonan tabata reuni na trupa kaminda tabatin un pida tereno yen di lenteha; i e pueblo a hui pa e filisteonan.

¹²Ma el a keda para firme meimei di e pida tereno, a defende esaki i a mata e filisteonan; i SENOR a obra un gran viktoria.

¹³Den e tempu di kosecha tres di e trinta hefenan a baha bin serka David na e kueba di Adulam, mientras ku un trupa di filisteonan tabata kampa den e vaye di Refaim.

¹⁴I e tempu ei David tabata na e luga fortifika, mientras ku e guamishon di e filisteonan tabata na Betlehem.

¹⁵I David a hana asina un deseo i a bisa: "Mara un hende por a dunami awa bebe for di e pos ku ta keda pega ku e porta di Betlehem!"

¹⁶Asina e tres hombernan poderoso a kibra pasa dor di e kampamentu di e filisteonan, a saka awa for di e pos ku tabata keda pega ku e porta di Betlehem, i a koh'e hiba pa David. Sinembargo, e no kier a beb'e, ma a dram'e pa SENOR;

¹⁷i el a bisa: "Leu sea di mi, O SENOR, di hasi e kos aki. Lo mi bebe e sanger di e hombernan ku a riska nan bida pa bai?" Pesei e no kier a beb'e. E kosnan aki e tres hombernan poderoso a hasi.

¹⁸I Abisai, ruman homber di Joab, yu homber di Sarvia, tabata hefe di e trintanan. I el a zwai su lansa kontra tres shen i a mata nan; i el a hana fama meskos ku e tresnan.

¹⁹E tabata esun mas onra di e trintanan, pesei el a bira nan komandante; sinembargo, e no a iguala e tresnan.

²⁰Anto Benaia, yu homber di Joiada, yu di un homber balente di Kabseel, kende a hasi echonan poderoso, a mata e dos yu hombernan di Ariel di Moab. Tambe el a baha bai den un buraku riba un dia ku sneu tabata kai i a mata un leon.

²¹I Benaia a mata un egipsio, un homber di gran estatura. Awor e egipsio tabatin un lansa den su man, ma Benaia a baha bai riba dje ku un klop i a ranka e lansa for di e egipsio su man, i a mat'e ku su mes lansa.

²²E kosnan aki Benaia, yu homber di Joiada, a hasi; i el a hana fama meskos ku e tres hombernan poderoso.

²³El a wordu onra entre e trintanan, ma e no a iguala e tresnan. I David a nombr'e riba su guardia.

²⁴Asael, ruman homber di Joab, tabata entre e trintanan; Elhanan, yu homber di Dodo di Betlehem,

²⁵Sama e harodita, Elika e harodita,

²⁶Heles e paltita, Ira, yu homber di Ikes e tekoita,

²⁷Abiezer e anatotita, Mebunai e husatita,

²⁸Salmon e ahohita, Maharai e netofatita,

²⁹Heleb, yu homber di Baana e netofatita, Itai, yu homber di Ribai di Gabaa di e yu hombernan di Benjamin,

³⁰Benaia e piratonita, Hidai di e roinan di Gaas,

³¹Abi-albon e arbatita, Azmavet e barhumita,

³²Eliaba e saalbonita, e yu hombernan di Jasen, Jonatan,

³³Sama e hararita, Ahiam, yu homber di Sarar e hararita,

³⁴Elifelet, yu homber di Ahasbai, yu homber di e maakatitanan, Eliam, yu homber di Ahitofel e gilonita,

³⁵Hezrai e karmelita, Paarai e arbita,

³⁶Igal, yu homber di Natan di Soba, Bani e gadita,

³⁷Selek e amonita, Naharai e beerotita, kargadonan di arma di Joab, yu homber di Sarvia,

³⁸Ira e itrita, Gareb e itrita,

³⁹Urias e heteo; na tur trint'i shete.