Read Papantla Totonac 2 Samuel 3 Bible Online

2 Samuel 3 - Papantla Totonac bible

2 Samuel 3

¹Awor tabatin un guera largu entre e kas di Saul i e kas di David; i David a bira mas i mas fuerte, ma e kas di Saul a sigui bira mas i mas swak.

²Na Hebron a nase yu hombernan pa David: su primogenito tabata Amnon, di Ahinoam e jezreelita;

³i su di dos yu, Kileab, di Abigail, biuda di Nabal e karmelita; i e di tres, Absalon, yu homber di Maaka, yu muhe di Talmai, rei di Gesur;

⁴i e di kuater, Adonias, yu homber di Haguit; i e di sinku, Sefatias, yu homber di Abital;

⁵i e di seis, Itream, di Egla, esposa di David. Esakinan a nase pa David na Hebron.

⁶I a sosode ku mientras tabatin guera entre e kas di Saul i e kas di David, Abner tabata fortalese su mes posishon den e kas di Saul.

⁷Awor Saul tabatin un konkubina ku tabata yama Rispa, yu muhe di Aja; i Is-boset a bisa Abner: "Pakiko bo a drumi ku mi tata su konkubina?"

⁸Anto Abner a rabia masha pa e palabranan di Is-boset, i a bisa: "Ta un kabes di kacho mi ta ku ta pertenese na Juda? Awe mi ta mustra karino na e kas di bo tata Saul, na su ruman hombernan i na su amigunan, i no a entregabo den man di David; i tog awe bo ta pone un kulpa riba mi enkuanto e muhe.

⁹Ku Dios hasi asina ku Abner, i pio ainda, si mi no hasi pa David loke SENOR a hura na dje,

¹⁰i traslada e reino for di e kas di Saul, i stablese e trono di David riba Israel i riba Juda, for di Dan te na Beerseba."

¹¹I Is-boset no por a kontesta Abner ni un palabra mas, pasobra e tabatin miedu di dje.

¹²E ora ei Abner a manda mensaheronan serka David kaminda e tabata, bisando: "Di ken e tera ta? Sera un aliansa ku mi, i mira, mi man lo ta ku bo pa trese henter Israel na su banda."

¹³I David a bisa: "Bon! Lo mi sera un aliansa ku bo, ma un kos mi ta eksigi di bo, esta, lo bo no mira mi kara si bo no trese Mikal, Saul su yu muhe, prome, ora bo bin serka mi."

¹⁴I David a manda mensaheronan serka Is-boset, Saul su yu homber, bisando: "Dunami mi esposa Mikal, ku kende mi tabata komprometi pa shen prepusio di e filisteonan."

¹⁵I Is-boset a manda kita Mikal for di su esposo, for di Paltiel, yu homber di Lais.

¹⁶Ma su esposo a bai kune, yorando, i a siguie te na Bahurim. Anto Abner a bis'e: "Bai bek." I el a bai bek.

¹⁷Awor Abner a papia ku e ansianonan di Israel, bisando: "Den pasado boso tabata buska David pa ta rei riba boso.

¹⁸Awor anto, hasie! Pasobra SENOR a papia di David, bisando: 'Pa medio di man di Mi sirbido David lo Mi salba Mi pueblo Israel for di man di e filisteonan i for di man di tur nan enemigunan.'"

¹⁹I tambe Abner a papia pa Benjamin tende; i ademas, Abner a bai papia pa David tende na Hebron tur loke tabata parse bon pa Israel i pa henter e kas di Benjamin.

²⁰Anto Abner i binti homber huntu kune a yega serka David na Hebron. I David a hasi un fiesta pa Abner i e hombernan ku tabata huntu kune.

²¹I Abner a bisa David: "Lagami lanta i bai, i reuni henter Israel serka senor mi rei, pa nan sera un aliansa ku bo, i pa bo ta rei riba tur loke bo kurason ta desea." Asina David a manda Abner bai, i el a bai na pas.

²²I mira, e sirbidonan di David i Joab a bin for di un atake i a trese hopi botin huntu ku nan; ma Abner no tabata serka David na Hebron, pasobra David a mand'e bai, i el a bai na pas.

²³Ora Joab i henter e ehersito ku tabata huntu kune a yega, nan a konta Joab, bisando: "Abner, yu homber di Ner, a bin serka rei, i el a mand'e bai, i el a bai na pas."

²⁴E ora ei Joab a bin serka rei i a bisa: "Kiko bo a hasi? Mira, Abner a bin serka bo; pakiko anto bo a mand'e bai, i el a bai kaba?

²⁵Bo konose Abner, yu homber di Ner, ku el a bin pa ganabo i pa investiga bo salida i bo entrada, i pa hana sa tur loke bo ta hasi."

²⁶Ora Joab a bai for di David, el a manda mensaheronan tras di Abner; i nan a tres'e bek for di e pos di Sira, ma David no tabata sa esaki.

²⁷Awor ora ku Abner a bolbe Hebron, Joab a hal'e bai kune na e porta di stat komo si fuera e kier a papia den konfiansa kune; i ayanan el a hink'e den su barika asina ku el a muri pa motibu di e sanger di su ruman homber Asael.

²⁸I despues, ora David a tende esaki, el a bisa: "Ami i mi reino pa semper ta inosente di e sanger di Abner, yu homber di Ner, dilanti di SENOR.

²⁹Ku esaki kai riba kabes di Joab i riba henter e kas di su tata; i ku lo no falta den e kas di Joab un hende ku tin derama, of ku ta leproso, of ku ta kana ku garoti, of ku ta kai pa medio di spada, of ku ta falta pan."

³⁰Asina Joab i su ruman homber Abisai a mata Abner, pasobra el a mata nan ruman homber Asael den e bataya na Gabaon.

³¹E ora ei David a bisa Joab i tur e hendenan ku tabata huntu kune: "Sker boso pananan i faha boso mes ku pana-di-saku i lamenta dilanti di Abner." I rei David a kana tras di e kaha di morto.

³²Asina nan a dera Abner na Hebron; i rei a halsa su bos i a yora na graf di Abner, i henter e pueblo a yora.

³³I rei a kanta un lamento pa Abner i a bisa: "Abner mester a muri manera un bobo ta muri?

³⁴Bo mannan no tabata mara, ni bo pianan no tabata na sepa; manera un hende ku ta kai dilanti di e malbadonan, bo a kai." I henter e pueblo a bolbe yor'e.

³⁵E ora ei henter e pueblo a bin pa persuadi David pa kome pan, mientras ku tabata di dia ainda; ma David a hura, bisando: "Ku Dios hasi asina ku mi, i pio ainda, si mi purba pan of kualke otro kos prome ku solo baha."

³⁶Awor henter e pueblo a ripara esaki, i esaki a agrada nan, meskos ku tur kos ku rei tabata hasi tabata agrada henter e pueblo.

³⁷Asina henter e pueblo i henter Israel a komprende e dia ei ku no tabata boluntat di rei pa laga mata Abner, yu homber di Ner.

³⁸E ora ei rei a bisa su sirbidonan: "Boso no sa ku awe un prens i un gran homber a kai na Israel?

³⁹I awe mi ta swak, ounke ku mi ta ungi komo rei; i e hombernan aki, yu hombernan di Sarvia, ta muchu fuerte pa mi. Ku SENOR paga e malechor segun su maldat."