Read Papantla Totonac 2 Samuel 4 Bible Online

2 Samuel 4 - Papantla Totonac bible

2 Samuel 4

¹Awor ora ku Is-boset, Saul su yu homber, a tende ku Abner a muri na Hebron, el a perde kurashi, i henter Israel a keda spanta.

²I Saul su yu homber tabatin dos homber ku tabata komandante di trupa: nomber di esun tabata Baana, i nomber di e otro Rekab, yu hombernan di Rimon e beerotita, di e yu hombernan di Benjamin (pasobra Beerot tambe ta wordu konsidera parti di Benjamin,

³i e beerotitanan a hui bai Gitaim i a keda stranhero ayanan te dia djawe).

⁴Awor Jonatan, Saul su yu homber, tabatin un yu homber ku pia mankaron. E tabatin sinku ana dia ku notisia tokante di Saul i Jonatan a yega for di Jezreel, i su yaya a koh'e i a hui bai kune. I a sosode ku den su pura pa hui e mucha a kai i a bira lam. I su nomber tabata Mefi-boset.

⁵Awor Rekab i Baana, yu hombernan di Rimon e beerotita, a bai i a yega na e kas di Is-boset na e ora mas kalor di dia, mientras ku e tabata tuma su sosiegu di merdia.

⁶I nan a drenta bai te meimei di e kas komo si fuera ta trigo nan a bin buska, i nan a hink'e den su barika; anto Rekab i su ruman homber Baana a hui bai.

⁷I ora nan a drenta den e kas, mientras ku Is-boset tabata drumi riba su kama den su kamber, nan a dal e mata i a kita su kabes afo. I nan a kohe su kabes bai kune i a biaha riba kaminda di Araba henter anochi.

⁸Anto nan a trese e kabes di Is-boset pa David na Hebron, i a bisa rei: "At'e kabes di Is-boset, yu homber di Saul, bo enemigu, kende tabata buskabo pa mata; i awe SENOR a duna senor mi rei vengansa riba Saul i su desendientenan."

⁹I David a kontesta Rekab i su ruman homber Baana, yu hombernan di Rimon e beerotita, i a bisa nan: "Manera SENOR ta biba, Kende a redimi mi bida for di tur angustia,

¹⁰dia ku un hende a bisami: 'Mira, Saul ta morto,' i a kere ku e tabata trese bon notisia, mi a gar'e i a mat'e na Siklag, loke tabata e rekompensa ku mi a dun'e pa su notisia.

¹¹Kuantu mas, ora hombernan malbado a mata un homber hustu den su mes kas riba su kama, lo mi no eksigi awor su sanger for di boso man i destrui boso for di riba tera?"

¹²E ora ei David a duna ordu na su sirbidonan hoben, i nan a mata nan i a korta nan mannan i nan pianan kit'afo i a kologa nan pega ku e tanki na Hebron. Ma nan a kohe e kabes di Is-boset i a dera esaki den e graf di Abner na Hebron.