Read Papantla Totonac 2 Samuel 5 Bible Online

2 Samuel 5 - Papantla Totonac bible

2 Samuel 5

¹E ora ei tur e tribunan di Israel a bin serka David na Hebron i a bisa: "Mira, nos ta bo wesu i bo karni.

²Den pasado, tempu ku Saul tabata rei riba nos, abo tabata esun ku tabata guia Israel pa sali i pa drenta. I SENOR a bisabo: 'Abo lo pastoria Mi pueblo Israel, i lo bo ta un gobernante riba Israel.'"

³Asina tur e ansianonan di Israel a bin serka rei na Hebron, i rei David a sera un aliansa ku nan na Hebron dilanti di SENOR; anto nan a ungi David komo rei riba Israel.

⁴David tabatin trinta ana dia ku el a bira rei i el a reina kuarenta ana.

⁵Na Hebron el a reina shete ana i seis luna riba Juda, i na Jerusalem el a reina trint'i tres ana riba henter Israel i Juda.

⁶Awor rei i su hombernan a bai Jerusalem kontra e jebuseonan, e habitantenan di e tera, kendenan a bisa David: "Bo no ta drenta aki den; ma e siegunan i e lamnan lo kore ku bo", pensando: "David no por drenta aki den."

⁷Sinembargo, David a kaptura e luga fortifika di Sion, esta, e stat di David.

⁸I e dia e David a bisa: "Ken ku pasa pa via di e akuadukto i derota e jebuseonan (e lamnan i e siegunan, kendenan David su alma ta odia) lo ta hefe i kapitan." Pesei nan ta bisa: "Ni e siegunan ni e lamnan lo no drenta den e kas."

⁹Asina David a biba den e luga fortifika, i a yam'e: stat di David. I David a konstrui tur ront, for di e sitadel bai paden.

¹⁰I David a bira mas i mas poderoso, pasobra e SENOR Dios di ehersitonan tabata kune.

¹¹Anto Hiram, rei di Tiro, a manda mensaheronan serka David ku palu di seda, karpinte i mesla; i nan a traha un kas pa David.

¹²I David a realisa su mes ku SENOR a stables'e komo rei riba Israel, i ku El a halsa su reino pa motibu di Su pueblo Israel.

¹³Mientras tantu David a tuma mas konkubina i esposa for di Jerusalem, despues ku el a bin for di Hebron; i a nase mas yu homber i yu muhe pa David.

¹⁴Awor esakinan ta e nombernan di esnan ku a nase p'e na Jerusalem: Samua, Sobab, Natan, Salomon,

¹⁵Ibhar, Elisua, Nefeg, Jafia,

¹⁶Elisama, Eliada i Elifelet.

¹⁷Ora ku e filisteonan a tende ku nan a ungi David komo rei riba Israel, tur e filisteonan a subi bai kontra David; i ora David a tende di esaki, el a baha bai na e luga fortifika.

¹⁸Awor e filisteonan a bin i a plama den e vaye di Refaim.

¹⁹Anto David a konsulta ku SENOR, bisando: "Mi mester bai kontra e filisteonan? Lo Bo entrega nan den mi man?" I SENOR a bisa David: "Bai, pasobra siguramente lo Mi entrega e filisteonan den bo man."

²⁰Asina David a yega Baal-perazim i a derota nan ayanan; i el a bisa: "SENOR a kibra pasa dor di mi enemigunan mi dilanti manera awa ta kibra pasa." Pesei el a yama e luga ei Baal-perazim.

²¹I nan a bandona nan ldolonan ayanan, i David i su hombernan a kohe nan bai ku nan.

²²Awor e filisteonan a bolbe bin i a plama den e vaye di Refaim.

²³I ora David a konsulta ku SENOR, El a bisa: "No subi direktamente; rondona nan di patras i bin ataka nan dilanti di e palunan di balsem.

²⁴I lo sosode ku ora bo tende e zonidu di marchamentu den e topnan di e palunan di balsem, bo mester aktua mesora, pasobra e ora ei SENOR lo a sali bo dilanti pa derota e ehersito di e filisteonan."

²⁵Anto David a hasi asina, meskos ku SENOR a orden'e, i a derota e filisteonan for di Geba te na Gezer.