Read Papantla Totonac 2 Samuel 6 Bible Online

2 Samuel 6 - Papantla Totonac bible

2 Samuel 6

¹Awor David a bolbe reuni tur e hombernan skohi di Israel, trinta mil.

²I David a lanta i a bai ku henter e pueblo ku tabata huntu kune na Baala di Juda, pa trese for di ayanan e arka di Dios ku ta wordu yama na e Nomber, e nomber mes di e SENOR di ehersitonan, Kende ta sinta riba Su trono ariba di e kerubinnan.

³I nan a pone e arka di Dios riba un garoshi nobo pa nan por a tres'e for di e kas di Abinadab, ku tabata keda riba e seru; i Uza ku Ahio, yu hombernan di Abinadab, tabata guia e garoshi nobo.

⁴Asina nan a trese e garoshi huntu ku e arka di Dios for di e kas di Abinadab, ku tabata keda riba e seru; i Ahio tabata kana dilanti di e arka.

⁵Mientras tantu David ku henter e kas di Israel tabata selebra dilanti di SENOR ku tur klase di instrument traha di palu di pino, i ku lirio, arpa, tamburein, kleper i simbal.

⁶Ma ora nan a yega na e plenchi-di-bati-mainshi di Nakon, Uza a saka su man na e arka di Dios i a koh'e tene, pasobra e bueynan a trompeka.

⁷I e rabia di SENOR a kima kontra Uza, i Dios a dal e mata ayanan pa motibu di su ireverensia; i el a muri ayanan banda di e arka di Dios.

⁸I David a rabia pa motibu di SENOR Su furia kontra Uza; i e luga ei ta wordu yama Perez-uza te dia djawe.

⁹Anto David a hana miedu di SENOR e dia ei; i el a bisa: "Kon e arka di SENOR por yega serka mi?"

¹⁰I David no tabata dispuesto pa hiba e arka di SENOR serka dje den e stat di David; ma David a hib'e na e kas di Obed-edom e geteo.

¹¹Asina e arka di Dios a keda na e kas di Obed-edom e geteo pa tres luna, i SENOR a bendishona Obed-edom i tur e hendenan di su kas.

¹²Awor nan a konta rei David, bisando: "SENOR a bendishona e kas di Obed-edom i tur loke ta pertenese na dje, pa motibu di e arka di Dios." I David a bai i a trese e arka di Dios ku alegria for di e kas di Obed-edom den e stat di David.

¹³I asina a sosode ku despues ku e kargadonan di e arka di SENOR a dal seis stap, David a ofrese komo sakrifisio un buey i un karne gorda.

¹⁴I David tabata balia dilanti di SENOR ku tur su forsa; i David tabatin un efod di lino bisti.

¹⁵Asina David i henter e kas di Israel tabata trese e arka di SENOR ku gritu i ku zonidu di trompet.

¹⁶Anto a sosode ku ora ku e arka di SENOR a yega den e stat di David, Mikal, yu muhe di Saul, a wak for di bentana i a mira rei David ta bula i ta balia dilanti di SENOR; i el a despresi'e den su kurason.

¹⁷Asina nan a trese e arka di SENOR paden i a pon'e na su luga den e tent ku David a lanta p'e; i David a ofrese ofrendanan kima i ofrendanan di pas dilanti di SENOR.

¹⁸I ora David a kaba di ofrese e ofrendanan kima i e ofrendanan di pas, el a bendishona e pueblo den e nomber di e SENOR di ehersitonan.

¹⁹Ademas, el a parti pa henter e pueblo, pa henter e multitut di Israel, tantu homber komo muhe, un pan buskuchi, un pan di dadel i un pan di rasenchi pa kada un. Despues henter e pueblo a bai kada un pa su kas.

²⁰Ma ora David a bin bek pa bendishona e hendenan di su kas, Mikal, yu muhe di Saul, a sali pa kontra ku David i a bisa: "Esta bunita e rei di Israel a distingui su mes awe! El a ekspone su mes awe den bista di e krianan di su sirbidonan, manera un hende bulgar ta ekspone su mes sin ni un tiki di berguensa!"

²¹Anto David a bisa Mikal: "Tabata dilanti di SENOR, Kende a skohemi riba bo tata i riba henter su kas, pa nombrami komo gobernante riba e pueblo di SENOR, riba Israel; pesei lo mi selebra dilanti di SENOR.

²²I lo mi ta mas despresia ainda ku esaki i lo mi ta umilde den mi mes bista; ma serka e krianan di kendenan bo a papia, serka nan lo mi ta distingui."

²³I Mikal, yu muhe di Saul, no a hana yu te dia di su morto.