Read Papantla Totonac 2 Samuel 8 Bible Online

2 Samuel 8 - Papantla Totonac bible

2 Samuel 8

¹Awor despues di esaki a sosode ku David a derota e filisteonan i a hasi nan somete; i David a tuma e stat prinsipal for di man di e filisteonan.

²I el a derota Moab i a pone nan drumi abou na suela, i a midi nan ku un lina; i el a midi dos lina pa mata i un lina kompleto pa tene na bida. I e moabitanan a bira sirbido di David, i tabata paga tributo.

³Ademas, David a derota Hadadezer, yu homber di Rehob, rei di Soba, ora ku el a bai pa restora su poder na Riu Eufrates.

⁴I David a kaptura for di dje mil shete shen koredo di kabai i binti mil solda-na-pia; i David a korta kabuya-di-pia di e kabainan di garoshi, ma a reserva sufisiente di nan pa shen garoshi.

⁵I ora ku e sirionan di Damasko a bin yuda Hadadezer, rei di Soba, David a mata bint'i dos mil homber di e sirionan.

⁶E ora ei David a pone guarnishonnan na Siria di Damasko; i e sirionan a bira sirbido di David, i tabata paga tributo. I SENOR tabata yuda David tur kaminda ku e tabata bai.

⁷I David a kohe e eskudonan di oro ku e sirbidonan di Hadadezer tabata karga, i a hiba nan Jerusalem.

⁸I for di Beta i for di Berotai, statnan di Hadadezer, rei David a kohe un kantidat masha grandi di brons.

⁹Awor ora Toi, rei di Hamat, a tende ku David a derota henter e ehersito di Hadadezer,

¹⁰Toi a manda su yu homber Hadoram serka rei David, pa salud'e i pa bendishon'e, pasobra el a bringa kontra Hadadezer i a derot'e; pasobra Hadadezer tabata na guera ku Toi. I Joram a trese huntu kune artikulonan di plata, di oro i di brons.

¹¹Esakinan tambe rei David a dedika na SENOR, meskos ku el a hasi ku e plata i oro for di tur e nashonnan ku el a hasi somete:

¹²for di Edom i Moab i e yu hombernan di Amon i e filisteonan i Amalek, i for di e botin di Hadadezer, yu homber di Rehob, rei di Soba.

¹³Asina David a gana fama pa su mes ora ku el a bin bek, despues di a mata diesocho mil sirio den e Vaye di Salu.

¹⁴I el a pone guarnishonnan na Edom. Na henter Edom el a pone guarnishonnan, i tur e edomitanan a bira sirbido di David. I SENOR tabata yuda David tur kaminda ku e tabata bai.

¹⁵Asina David a reina riba henter Israel; i David a atministra huisio i hustisia pa henter su pueblo.

¹⁶I Joab, yu homber di Sarvia, tabatin enkargo di e ehersito, i Josafat, yu homber di Ahilud, tabata registrado.

¹⁷I Sadok, yu homber di Ahitob, i Ahimelek, yu homber di Abiatar, tabata saserdote; i Seraias tabata sekretario.

¹⁸I Benaia, yu homber di Joiada, tabatin enkargo di e kereteonan i e peleteonan; i e yu hombernan di David tabata gobernantenan prinsipal.