Read Papantla Totonac 2 Samuel 9 Bible Online

2 Samuel 9 - Papantla Totonac bible

2 Samuel 9

¹Anto David a bisa: "A keda un persona di e kas di Saul ainda, pa mi mustr'e karino pa kousa di Jonatan?"

²Awor tabatin un sirbido di e kas di Saul ku tabata yama Siba; i nan a yam'e serka David; i rei a bis'e: "T'abo ta Siba?" I el a bisa: "Mi ta bo sirbido."

³I rei a bisa: "No a keda ningun persona di e kas di Saul ainda, na kende mi por mustra e karino di Dios?" I Siba a bisa rei: "Ainda a keda un yu homber di Jonatan ku ta mankaron na tur dos pia."

⁴E ora ei rei a bis'e: "Unda e ta?" I Siba a bisa rei: "Mira, e ta na e kas di Makir, yu homber di Amiel, na Lo-debar."

⁵Anto rei David a manda yam'e i a tres'e for di e kas di Makir, yu homber di Amiel, for di Lo-debar.

⁶I Mefi-boset, yu homber di Jonatan, yu homber di Saul, a bin serka David i a tira su kurpa abou ku su kara te na suela. I David a bisa: "Mefi-boset." I el a bisa: "Ata bo sirbido aki!"

⁷I David a bis'e: "No tene miedu, pasobra siguramente lo mi mustra karino na bo pa kousa di bo tata Jonatan, i lo restora na bo henter e tera di bo welo Saul; i lo bo kome na mi mesa regularmente."

⁸El a bolbe tira su kurpa abou ku su kara te na suela i a bisa: "Kiko bo sirbido ta, ku lo bo tene konsiderashon ku un kacho morto manera mi?"

⁹Anto rei a yama Siba, Saul su sirbido, i a bis'e: "Tur loke tabata pertenese na Saul i na henter su kas, mi a duna bo shon su nietu.

¹⁰I abo, bo yu hombernan i bo sirbidonan mester kultiva e tera p'e i trese e kosecha paden, pa bo shon su nietu tin kuminda; sinembargo Mefi-boset, bo shon su nietu, lo kome na mi mesa regularmente." Awor Siba tabatin diesinku yu homber i binti sirbido.

¹¹E ora ei Siba a bisa rei: "Konforme tur loke mi senor rei ta ordena su sirbido, asina bo sirbido lo hasi." Asina Mefi-boset a kome na David su mesa manera un di rei su yu hombernan.

¹²I Mefi-boset tabatin un yu homber yon ku tabata yama Mika. I tur esnan ku tabata biba den e kas di Siba tabata sirbido di Mefi-boset.

¹³Asina Mefi-boset a biba na Jerusalem, pasobra e tabata kome na rei su mesa regularmente. Awor e tabata lam na tur dos pia.