Read Papantla Totonac 1 Reinan 1 Bible Online

1 Reinan 1 - Papantla Totonac bible

1 Reinan 1

¹Awor rei David tabata bieu, di edat avansa; i nan a tap'e, ma su kurpa no tabata keda kayente.

²Pesei su sirbidonan a bis'e: "Laga buska un birgen hoben pa senor mi rei, i lagu'e sirbi rei i kuid'e; i lagu'e drumi banda di rei, pa senor mi rei su kurpa keda kayente."

³Asina nan a buska un mucha muhe bunita den henter e teritorio di Israel, i a hana Abisag e sunamita i a hib'e serka rei.

⁴I e mucha muhe tabata masha bunita; i el a kuida rei i a sirbie, ma rei no tabatin relashon kune.

⁵Awor Adonias, yu homber di Haguit, a halsa su mes, bisando: "Ami lo bira rei." Asina el a prepara garoshinan i koredonan di kabai pa su mes, ku sinkuenta homber pa kore su dilanti.

⁶I su tata nunka no a reprend'e ni un ora so dor di puntra: "Pakiko bo a hasi asina?" Ademas, e tabata un homber masha nechi mes, i el a nase despues di Absalon.

⁷I el a konferensia ku Joab, yu homber di Sarvia, i ku saserdote Abiatar; i nan a sigui Adonias i a yud'e.

⁸Ma saserdote Sadok, Benaia, yu homber di Joiada, profeta Natan, Simei, Rei i e hombernan poderoso di David, no tabata na fabor di Adonias.

⁹I Adonias a ofrese komo sakrifisio karne i buey i bestia gorda banda di e piedra di Zohelet, ku ta keda pega ku En-rogel; i el a invita tur su ruman hombernan, rei su yu hombernan, i tur e hombernan di Juda, rei su sirbidonan.

¹⁰Ma e no a invita profeta Natan, ni Benaia, ni e hombernan poderoso, ni su ruman Salomon.

¹¹E ora ei Natan a papia ku Betsabe, mama di Salomon, bisando: "Bo no a tende ku Adonias, yu homber di Haguit, a bira rei, sin ku nos senor David sa esaki?

¹²Bin awor anto; pa fabor, lagami dunabo konseho i salba bo bida i bida di bo yu homber Salomon.

¹³Bai mesora serka rei David i bis'e: 'O senor mi rei, bo no a hura na bo sirbiente, bisando: "Siguramente bo yu homber Salomon lo bira rei despues di mi, i e lo sinta riba mi trono"? Pakiko anto Adonias a bira rei?'

¹⁴Mira, mientras ku bo ta einan ainda ta papia ku rei, lo mi drenta despues di bo i konfirma bo palabranan."

¹⁵Asina Betsabe a drenta bai den kamber serka rei. Awor rei tabata hopi bieu, i Abisag e sunamita tabata sirbi rei.

¹⁶E ora ei Betsabe a buig i a tira su kurpa abou ku su kara te na suela dilanti di rei. I rei a bisa: "Kiko bo ta desea?"

¹⁷I Betsabe a bis'e: "Mi senor, pa SENOR bo Dios bo a hura bo sirbiente, bisando: 'Siguramente bo yu homber Salomon lo bira rei despues di mi, i e lo sinta riba mi trono.'

¹⁸I awor, mira, Adonias ta rei; i awor, ni sa senor mi rei no sa esaki.

¹⁹I el a ofrese komo sakrifisio buey i bestia gorda i karne na abundansia, i a invita tur e yu hombernan di rei i saserdote Abiatar i Joab, komandante di e ehersito; ma bo sirbido Salomon e no a invita.

²⁰I pa loke t'abo awor, senor mi rei, wowo di henter Israel ta riba bo, pa bo bisa nan ta ken lo sinta riba trono di senor mi rei despues di dje.

²¹Sino lo sosode ku asina senor mi rei bai sosega serka su tatanan, ami ku mi yu homber Salomon lo wordu konsidera komo kriminal."

²²I mira, mientras ku e tabata papia ku rei ainda, profeta Natan a kana drenta.

²³I nan a konta rei, bisando: "Ata profeta Natan." I ora ku el a drenta serka rei, el a tira su kurpa abou ku su kara te na suela dilanti di rei.

²⁴E ora ei Natan a bisa: "Senor mi rei, ta abo a bisa: 'Ta Adonias lo bira rei despues di mi, i ta e lo sinta riba mi trono'?

²⁵Pasobra awe el a baha bai i a ofrese komo sakrifisio buey i bestia gorda i karne na abundansia, i a invita tur rei su yu hombernan i e komandantenan di e ehersito i saserdote Abiatar; i ata nan ta kome i bebe su dilanti, i nan ta bisa: 'Biba rei Adonias!'

²⁶Ma ni ami, bo sirbido, ni saserdote Sadok, ni Benaia, yu homber di Joiada, ni bo sirbido Salomon e no a invita.

²⁷Ta senor mi rei a hasi e kos aki, sin laga bo sirbidonan sa ta ken mester sinta riba trono di senor mi rei despues di dje?"

²⁸E ora ei rei David a kontesta i a bisa: "Yama Betsabe pa mi." I Betsabe a bin den presensia di rei i a bai para dilanti di rei.

²⁹I rei a hura i a bisa: "Manera SENOR ta biba, Kende a redimi mi bida for di tur angustia,

³⁰siguramente, manera mi a hurabo pa e SENOR Dios di Israel, bisando: 'Bo yu homber Salomon lo ta rei despues di mi, i ta e lo sinta riba mi trono na mi luga', di berdat lo mi hasi asina awe."

³¹E ora ei Betsabe a buig ku su kara te na suela i a tira su kurpa abou dilanti di rei i a bisa: "Ku mi senor rei David biba pa semper."

³²Anto rei David a bisa: "Yama saserdote Sadok, profeta Natan i Benaia, yu homber di Joiada, pa mi." I nan a bin den presensia di rei.

³³I rei a bisa nan: "Hiba e sirbidonan di boso senor huntu ku boso, i laga mi yu homber Salomon kore riba mi mes mula, i hib'e Gihon.

³⁴I laga saserdote Sadok i profeta Natan ungie einan komo rei di Israel, i supla trompet i bisa: 'Biba rei Salomon!'

³⁵E ora ei boso mester bin su tras i e mester bin sinta riba mi trono i bira rei na mi luga; pasobra ta e mi a nombra pa ta gobernante riba Israel i Juda."

³⁶I Benaia, yu homber di Joiada, a kontesta rei i a bisa: "Amen! Ku SENOR, e Dios di senor mi rei, bisa asina.

³⁷Manera SENOR tabata ku senor mi rei, lagu'E ta asina tambe ku Salomon, i hasi su trono mas grandi ku trono di mi senor rei David!"

³⁸Asina saserdote Sadok, profeta Natan, Benaia, yu homber di Joiada, e kereteonan i e peleteonan a bai i a laga Salomon kore riba e mula di rei David, i a hib'e Gihon.

³⁹E ora ei saserdote Sadok a kohe e kachu di zeta for di e tent i a ungi Salomon. Despues nan a supla trompet, i henter e pueblo a bisa: "Biba rei Salomon!"

⁴⁰I henter e pueblo a bai su tras, i e pueblo tabata toka fluit i tabata regosiha ku gran goso, asina ku tera tabata tembla di nan boroto.

⁴¹Awor Adonias i tur e invitadonan ku tabata huntu kune a tende esaki ora nan a kaba di kome. Ora Joab a tende e zonidu di trompet, el a bisa: "Pakiko nan ta hasi tantu bochincha asina den stat?"

⁴²Mientras ku e tabata papia ainda, ata Jonatan, yu homber di saserdote Abiatar, a yega. I Adonias a bisa: "Drenta, pasobra bo ta un homber balente i ta trese bon notisia."

⁴³Ma Jonatan a kontesta i a bisa Adonias: "No! Nos senor rei David a hasi Salomon rei.

⁴⁴Tambe rei a manda huntu kune saserdote Sadok, profeta Natan, Benaia, yu homber di Joiada, e kereteonan i e peleteonan; i nan a lagu'e kore riba e mula di rei.

⁴⁵I saserdote Sadok i profeta Natan a ungie komo rei na Gihon, i di einan nan a bin regosihando, asina ku e stat ta yen di bochincha. Esaki ta e boroto ku boso a tende.

⁴⁶Ademas, Salomon a sinta kaba riba trono di e reino.

⁴⁷I tambe, rei su sirbidonan a bin pa bendishona nos senor rei David, bisando: 'Ku bo Dios hasi nomber di Salomon mas miho ku bo nomber i su trono mas grandi ku bo trono!' I rei a buig riba su kama.

⁴⁸Tambe rei a bisa asin'aki: 'Bendishona sea SENOR, e Dios di Israel, Kende a duna un hende pa sinta riba mi trono awe, mientras ku mi mes wowonan ta mira esaki.'"

⁴⁹E ora ei tur e invitadonan di Adonias a spanta masha; i nan a lanta, i kada un a sigui su kaminda.

⁵⁰I Adonias tabatin miedu di Salomon, i el a lanta bai i a kohe e kachunan di e altar tene.

⁵¹Awor nan a konta Salomon, bisando: "Mira, Adonias tin miedu di rei Salomon, pasobra ata, el a kohe e kachunan di altar tene, bisando: 'Laga rei Salomon hurami awe ku e lo no mata su sirbido ku spada.'"

⁵²I Salomon a bisa: "Si e kier ta un homber digno, ni un drachi di su kabei lo no kai abou na suela; ma si hana maldat den dje, e lo muri."

⁵³Asina rei Salomon a manda nan bah'e for di e altar. I el a bin i a tira su kurpa abou ku su kara te na suela dilanti di rei Salomon, i Salomon a bis'e: "Bai bo kas."