Read Papantla Totonac 1 Reinan 10 Bible Online

1 Reinan 10 - Papantla Totonac bible

1 Reinan 10

¹Awor ora reina di Saba a tende di e fama di Salomon tokante di e nomber di SENOR, el a bin pa pon'e na prueba ku preguntanan difisil.

²Asina el a bin Jerusalem, kompana pa un grupo masha grandi, ku kamelnan karga ku speserei i masha hopi oro i piedra presioso. Ora ku el a yega serka Salomon, el a papia kune di tur loke tabatin riba su kurason.

³I Salomon a kontesta tur su preguntanan; no tabatin nada ku tabata muchu difisil pa rei splika reina di Saba.

⁴Ora reina di Saba a ripara tur e sabiduria di Salomon, e kas ku el a traha,

⁵e kuminda di su mesa, e ordu di sinta di su ofisialnan, e manera di sirbi di su sirbidonan di mesa i nan pana di bisti, su koperonan i su trapi ku e tabata subi pa bai na e kas di SENOR, el a keda boka habri.

⁶E ora ei el a bisa rei: "Tabata berdat loke mi a tende na mi mes tera tokante di bo palabranan i bo sabiduria.

⁷Sinembargo, mi no a kere e palabranan, te ora mi a bin i mi a mira ku mi mes wowo. I mira, ni mitar nan no a kontami. Den sabiduria i prosperidat bo ta surpasa e palabranan ku mi a tende.

⁸Ki bendishona bo hombernan ta, ki bendishona e sirbidonan di bo aki ta, ku kontinuamente ta para bo dilanti i ta tende bo sabiduria.

⁹Bendishona sea SENOR bo Dios, Kende tin delisia den bo, i a ponebo riba trono di Israel; pasobra SENOR a stima Israel pa semper, pesei El a hasibo rei, pa hasi huisio i hustisia."

¹⁰I reina di Saba a duna rei shent'i binti talento di oro i un kantidat masha grandi di speserei i piedra presioso. Nunka mas a drenta un kantidat asina grandi di speserei manera esun ku reina di Saba a duna rei Salomon.

¹¹I tambe e barkunan di Hiram, ku tabata trese oro for di Ofir, tabata trese for di Ofir un kantidat masha grandi di palu di sandalo i piedra presioso.

¹²I for di e palunan di sandalo rei a traha stet pa e kas di SENOR i pa rei su kas, tambe salterio i arpa pa e kantadonan; nunka mas a drenta palu di sandalo asina, ni nan no a wordu mira mas te dia djawe.

¹³I rei Salomon a duna reina di Saba tur loke e tabata desea, tur loke el a pidi, fuera di loke el a dun'e konforme su abundansia real. E ora ei el a bai bek na su mes pais huntu ku su sirbidonan.

¹⁴Awor e peso di oro ku a drenta pa Salomon den un ana tabata seis shent'i sesent'i seis talento di oro,

¹⁵fuera di loke tabata drenta di e negoshantenan i di e merkansia di e komersiantenan i di tur e reinan di e arabirnan i di e gobernantenan di e tera.

¹⁶I rei Salomon a traha dos shen eskudo grandi di oro bati, i a uza seis shen siklo di oro pa kada eskudo grandi.

¹⁷I el a traha tres shen eskudo di oro bati i a uza tres mina di oro pa kada eskudo; i rei a pone nan den e kas di e mondi-sera di Libano.

¹⁸Ademas, rei a traha un trono grandi di ivor i a fur'e ku oro refina.

¹⁹E trono tabatin seis tret i e parti haltu di e trono parti patras tabata rondo; i tabatin man na kada banda di e asiento i dos leon para banda di e mannan.

²⁰I tabatin diesdos leon para einan na kada banda riba e seis tretnan; nada similar no a wordu traha pa ningun otro reino.

²¹I tur e kopanan di bebe di rei Salomon tabata di oro, i tur e artikulonan-di-uzo di e kas di e mondi-sera di Libano tabata di oro puru. Nada no tabata di plata; esaki no tabata wordu konsidera di balor den e dianan di Salomon.

²²Pasobra rei tabatin e barkunan di Tarsis huntu ku e barkunan di Hiram riba laman; un biaha den kada tres ana e barkunan di Tarsis tabata bin trese oro, plata, ivor, makaku i pouwis.

²³Asina rei Salomon a surpasa tur e reinan di tera den rikesa i den sabiduria.

²⁴I henter tera tabata buska e presensia di Salomon, pa tende su sabiduria ku Dios a pone den su kurason.

²⁵I tur hende tabata trese su regalo, artikulonan di plata i di oro, pana pa bisti, arma, speserei, kabai i mula, kada ana un sierto kantidat.

²⁶Awor Salomon a akumula garoshi i koredo di kabai; i e tabatin mil kuater shen garoshi i diesdos mil koredo di kabai, i el a stashona nan den e statnan di garoshi i serka rei na Jerusalem.

²⁷I rei a hasi plata mes komun ku piedra na Jerusalem, i el a hasi palu di seda mes abundante ku palu di sikamor ku ta krese den vaye.

²⁸Tambe Salomon tabata importa kabai for di Egipto i Kue, i rei su komersiantenan tabata kumpra nan na Kue na un preis.

²⁹I un garoshi importa for di Egipto tabata kosta seis shen siklo di plata, i un kabai shent'i sinkuenta; i na e mesun manera nan tabata eksporta nan pa tur e reinan di e heteonan i pa e reinan di Siria.