Read Papantla Totonac 1 Reinan 11 Bible Online

1 Reinan 11 - Papantla Totonac bible

1 Reinan 11

¹Awor rei Salomon tabata stima hopi muhe stranhero fuera di e yu muhe di Farao: muhenan di Moab, Amon, Edom, Sidon i muhenan heteo,

²for di e nashonnan di kualnan SENOR a bisa e yunan di Israel: "Boso no mester emparenta ku nan, ni nan no mester emparenta ku boso, pasobra siguramente nan lo hasi boso kurason desvia pa sigui tras di nan diosnan." Salomon a tene duru na esakinan den amor.

³I e tabatin shete shen esposa, prensesnan, i tres shen konkubina, i su esposanan a hasi su kurason desvia.

⁴Pasobra a sosode ku ora Salomon a bira bieu, su esposanan a hasi su kurason desvia pa sigui tras di otro diosnan; i su kurason no tabata kompletamente dedika na SENOR su Dios, manera kurason di su tata David tabata.

⁵Pasobra Salomon a sigui tras di Astoret, e diosa di e sidonionan, i tras di Milkom, e idolo abominabel di e amonitanan.

⁶I Salomon a hasi loke tabata malu den bista di SENOR, i no tabata sigui SENOR kompletamente, manera su tata David a hasi.

⁷Anto Salomon a traha un luga haltu pa Kemos, e idolo abominabel di Moab, riba e seru ku ta keda pariba di Jerusalem, i pa Molok, e idolo abominabel di e yu hombernan di Amon.

⁸Asina tambe el a hasi pa tur su esposanan stranhero, kendenan tabata kima sensia i tabata ofrese sakrifisio na nan diosnan.

⁹Awor SENOR tabata rabia ku Salomon, pasobra su kurason a desvia for di SENOR, e Dios di Israel, Kende a parese na dje dos biaha,

¹⁰i Kende a orden'e tokante di e asunto aki, pa e no sigui tras di otro diosnan; ma e no a kumpli ku loke SENOR a ordena.

¹¹Asina SENOR a bisa Salomon: "Pasobra bo a hasi esaki, i bo no a warda Mi aliansa i Mi statutonan ku Mi a ordenabo, lo Mi sker e reino kit'e for di bo sigur-sigur i dun'e na bo sirbido.

¹²Sinembargo, lo Mi no hasie den bo dianan, pa kousa di bo tata David; ma lo Mi sker e kit'e for di man di bo yu homber.

¹³Sinembargo, lo Mi no sker henter e reino kit'e, ma lo Mi duna un tribu na bo yu homber pa kousa di Mi sirbido David i pa kousa di Jerusalem ku Mi a skohe."

¹⁴E ora ei SENOR a lanta un atversario kontra Salomon, Hadad e edomita; e tabata di e famia real na Edom.

¹⁵Pasobra a sosode, tempu David tabata na Edom, i Joab, komandante di e ehersito, a bai pa dera e mortonan, i a mata tur homber na Edom

¹⁶(pasobra Joab i henter Israel a keda ayanan seis luna, te ora ku el a kaba ku tur homber na Edom),

¹⁷ku Hadad a hui bai Egipto, e ku algun edomita, sirbidonan di su tata, huntu kune. Na e tempu ei Hadad tabata mucha ainda.

¹⁸I nan a lanta bai for di Madian i a yega Paran; i nan a hiba hombernan huntu ku nan for di Paran i a bin Egipto serka Farao, rei di Egipto, kende a dun'e un kas, a provee kuminda p'e i a dun'e un pida tereno.

¹⁹Awor Hadad a hana gran apresio serka Farao, asina ku el a dun'e e ruman muhe di su kasa komo esposa, esta, ruman muhe di reina Tafenes.

²⁰I ruman muhe di Tafenes a duna lus na Genubat, yu homber di Hadad, kende Tafenes a kita for di pechu den kas di Farao; i Genubat tabata den kas di Farao entre e yunan di Farao.

²¹Ma ora Hadad a tende na Egipto ku David a bai sosega serka su tatanan i ku Joab, komandante di e ehersito, a muri, Hadad a bisa Farao: "Lagami bai mi mes tera."

²²E ora ei Farao a bis'e: "Ma di kiko bo ta sinti falta serka mi, ku bo kier bai bo mes tera?" I el a kontesta: "Di nada; ma di tur manera, lagami bai."

²³Tambe Dios a lanta un otro atversario kontra Salomon, Rezon, yu homber di Eliada, kende a hui bai for di su shon Hadadezer, rei di Soba.

²⁴I el a reuni hombernan serka dje i a bira lider di un trupa di bandido, despues ku David a mata esnan di Soba; i nan a bai Damasko i a keda ayanan, i tabata goberna na Damasko.

²⁵Asina Rezon tabata un atversario di Israel tur e dianan di Salomon, ademas di e maldat ku Hadad a hasi; i e tabata aborese Israel i tabata reina riba Siria.

²⁶E ora ei Jeroboam, yu homber di Nabat, un efrateo di Sereda, sirbido di Salomon, kende su mama tabata yama Zerua, un biuda, tambe a rebeldia kontra rei.

²⁷Awor esaki tabata e motibu pakiko el a rebeldia kontra rei: Salomon a traha e sitadel i a sera e sker den muraya di e stat di su tata David.

²⁸Awor e homber Jeroboam tabata un guerero balente; i ora Salomon a mira ku e hoben tabata un bon trahado, el a nombr'e riba henter e trabou forsa di e kas di Jose.

²⁹I a sosode ku e tempu ei, ora Jeroboam a sali for di Jerusalem, profeta Ahias e silonita a top'e na kaminda. Awor Ahias tabatin un mantel nobo bisti; i nan dos so tabata den kunuku.

³⁰E ora ei Ahias a gara e mantel nobo ku e tabatin bisti tene, i a sker e na diesdos pida.

³¹I el a bisa Jeroboam: "Tuma dies pida pa bo, pasobra asina SENOR, e Dios di Israel, ta bisa: 'Mira, lo Mi sker e reino kit'e for di man di Salomon i dunabo dies tribu

³²(ma un tribu lo ta p'e, pa kousa di Mi sirbido David i pa kousa di Jerusalem, e stat ku Mi a skohe for di tur e tribunan di Israel),

³³pasobra nan a bandonaMi i a adora Astoret, e diosa di e sidonionan, Kemos, e dios di Moab, i Milkom, e dios di e yu hombernan di Amon; i nan no a kana den Mi kamindanan, hasiendo loke ta korekto den Mi bista i kumpliendo ku Mi statutonan i Mi ordenansanan, manera su tata David a hasi.

³⁴'Sinembargo, lo Mi no kita henter e reino for di su man, ma lo Mi hasie gobernante tur e dianan di su bida, pa kousa di Mi sirbido David, kende Mi a skohe, kende a kumpli ku Mi mandamentunan i Mi statutonan;

³⁵ma lo Mi kita e reino for di man di su yu homber i duna abo esaki, esta, dies tribu.

³⁶Ma su yu homber lo Mi duna un tribu, pa Mi sirbido David por tin un lampi semper Mi dilanti na Jerusalem, e stat ku Mi a skohe pa Mi mes, pa pone Mi nomber ayanan.

³⁷I lo Mi tumabo, i lo bo reina riba tur loke bo ta desea i lo bo ta rei riba Israel.

³⁸Anto lo sosode ku si bo skucha tur loke Mi ordenabo i kana den Mi kamindanan, i hasi loke ta korekto den Mi bista dor di kumpli ku Mi statutonan i Mi mandamentunan, manera Mi sirbido David a hasi, e ora ei lo Mi ta ku bo i lo Mi traha un kas duradero pa bo, manera Mi a traha pa David, i lo Mi dunabo Israel.

³⁹Asina lo Mi afligi e desendientenan di David pa esaki, ma no pa semper.'"

⁴⁰Pesei Salomon a buska pa mata Jeroboam, ma Jeroboam a lanta i a hui bai Egipto serka Sisak, rei di Egipto; i e tabata na Egipto te na morto di Salomon.

⁴¹Awor e demas echonan di Salomon i tur loke ku el a hasi i su sabiduria, nan no ta para skirbi den e buki di e echonan di Salomon?

⁴²Asina e tempu ku Salomon a reina na Jerusalem riba henter Israel tabata kuarenta ana.

⁴³I Salomon a bai sosega serka su tatanan i a wordu dera den e stat di su tata David; i su yu homber Roboam a reina na su luga.