Read Papantla Totonac 1 Reinan 12 Bible Online

1 Reinan 12 - Papantla Totonac bible

1 Reinan 12

¹E ora ei Roboam a bai Sikem, pasobra henter Israel a bin Sikem pa hasie rei.

²Awor a sosode ku ora Jeroboam, yu homber di Nabat, a tende di esaki, ku e tabata biba na Egipto (pasobra e tabata na Egipto ainda, kaminda el a hui bai for di presensia di rei Salomon),

³nan a manda yam'e; i Jeroboam i henter e asamblea di Israel a bin i a papia ku Roboam, bisando:

⁴"Bo tata a hasi nos yugo pisa; pesei anto, hasi e trabou duru di bo tata i su yugo pisa ku el a pone riba nos mas lihe, i nos lo sirbibo."

⁵E ora ei el a bisa nan: "Bai pa tres dia, anto bolbe serka mi." Asina e pueblo a bai.

⁶I rei Roboam a konsulta ku e ansianonan ku a sirbi su tata Salomon tempu ku e tabata na bida ainda, bisando: "Kiko boso ta konsehami pa kontesta e pueblo aki?"

⁷E ora ei nan a papia kune, bisando: "Si bo kier ta un sirbido di e pueblo aki awe, i si bo kier sirbi nan, duna nan nan petishon i papia bon palabra ku nan, e ora ei nan lo ta bo sirbido pa semper."

⁸Ma el a rechasa e konseho ku e ansianonan a dun'e, i a konsulta ku e hobennan ku a lanta huntu kune i ku tabata sirbie.

⁹Asina el a bisa nan: "Ki konseho boso ta duna pa nos kontesta e pueblo aki ku a papia ku mi, bisando: 'Hasi e yugo ku bo tata a pone riba nos mas lihe'?"

¹⁰I e hobennan ku a lanta huntu kune a papia kune, bisando: "Asina bo mester bisa e pueblo aki ku a papia ku bo, bisando: 'Bo tata a hasi nos yugo pisa, awor abo hasie mas lihe pa nos!' Ma bo mester bisa nan: 'Mi dede chikitu ta mas diki ku mi tata su lomo!

¹¹Awor, mientras ku mi tata a pone karga di un yugo pisa riba boso, ami ta bai anadi na boso yugo; mi tata a disiplina boso ku zwip, ma ami ta bai disiplina boso ku skorpion.'"

¹²E ora ei Jeroboam i henter e pueblo a bin serka Roboam riba e di tres dia, manera rei a papia, bisando: "Bolbe serka mi riba e di tres dia."

¹³I rei a kontesta e pueblo brutu, pasobra el a rechasa e konseho ku e ansianonan a dun'e.

¹⁴I el a papia ku nan konforme e konseho di e hobennan, bisando: "Mi tata a hasi boso yugo pisa, ma ami ta bai anadi na boso yugo; mi tata a disiplina boso ku zwip, ma ami ta bai disiplina boso ku skorpion."

¹⁵Asina rei no a skucha e pueblo, pasobra SENOR a destina esei, pa E por a stablese Su palabra ku SENOR a papia ku Jeroboam, yu homber di Nabat, pa medio di Ahias e silonita.

¹⁶Ora henter Israel a mira ku rei no a skucha nan, e pueblo a kontesta rei, bisando: "Ki parti nos tin ku David? Nos no tin erensia den e yu homber di Isai. Bai boso tentnan, O Israel! Awor perkura pa bo mes kas, David!" Asina Israel a bai na nan tentnan.

¹⁷Ma Roboam a reina riba e yunan di Israel ku tabata biba den e statnan di Juda.

¹⁸E ora ei rei Roboam a manda Hadoram, kende tabatin enkargo di e trabou forsa, i henter Israel a piedr'e mata. I rei Roboam a pura pa subi su garoshi pa hui bai Jerusalem.

¹⁹Asina Israel a rebeldia kontra e kas di David te dia dj awe.

²⁰I a sosode ku ora henter Israel a tende ku Jeroboam a bolbe, nan a manda yam'e bin na e asamblea i a hasie rei riba henter Israel. Ningun tribu no a sigui e kas di David sino solamente e tribu di Juda.

²¹Awor ora Roboam a yega Jerusalem, el a reuni henter e kas di Juda i e tribu di Benjamin, shent'i ochenta mil homber skohi ku tabata guerero, pa bringa kontra e kas di Israel pa debolbe e reino na Roboam, yu homber di Salomon.

²²Ma e palabra di Dios a yega na Semaias, e homber di Dios, bisando:

²³"Papia ku Roboam, yu homber di Salomon, rei di Juda, i ku henter e kas di Juda i Benjamin i ku e restu di e pueblo, bisando:

²⁴'Asina SENOR ta bisa: "Boso no bai bringa kontra boso rumannan, e yunan di Israel; kada un bolbe pa su kas, pasobra ta Ami a hasi e kos aki.

²⁵E ora ei Jeroboam a traha Sikem den e serunan di Efrain i a biba ayanan. I el a bai for di ayanan i a traha Penuel.

²⁶I Jeroboam a bisa den su kurason: "Awor e reino lo bolbe na e kas di David.

²⁷Si e pueblo aki bai pa ofrese sakrifisio den e kas di SENOR na Jerusalem, e ora ei kurason di e pueblo aki lo bolbe serka nan senor, serka Roboam, rei di Juda; i nan lo matami i bolbe serka Roboam, rei di Juda."

²⁸Asina rei a buska konseho i a traha dos bishe di oro, i el a bisa nan: "Ta muchu molester pa boso bai Jerusalem; ata boso diosnan, O Israel, ku a trese boso for di tera di Egipto."

²⁹I el a pone un na Bet-el i e otro el a pone na Dan.

³⁰Awor e kos aki a bira un pika, pasobra e pueblo a bai adora dilanti di esun te na Dan.

³¹I el a traha kasnan na luganan haltu, i a nombra saserdote for di entre henter e pueblo, kendenan no tabata di e yu hombernan di Levi.

³²Tambe Jeroboam a institui un fiesta den e di ocho luna, riba e di diesinku dia di e luna, manera e fiesta ku tin na Juda, i a subi bai na e altar; asina el a hasi na Bet-el, ofresiendo sakrifisio na e bishenan ku el a traha. I na Bet-el el a stashona e saserdotenan di e luganan haltu ku el a traha.

³³E ora ei el a subi bai na e altar ku el a traha na Bet-el, riba e di diesinku dia den e di ocho luna, den e luna ku el a skohe den su mes kurason; i el a institui un fiesta pa e yunan di Israel i a subi bai na e altar pa kima sensia.