Read Papantla Totonac 1 Reinan 13 Bible Online

1 Reinan 13 - Papantla Totonac bible

1 Reinan 13

¹Awor mira, un homber di Dios a bin Bet-el for di Juda pa medio di e palabra di SENOR, mientras ku Jeroboam tabata para na e altar pa kima sensia.

²I el a sklama kontra e altar pa medio di e palabra di SENOR, i a bisa: "O altar, altar, asina SENOR ta bisa: 'Mira, un yu homber lo nase pa e kas di David, Josias ta su nomber; i riba bo e lo sakrifika e saserdotenan di e luganan haltu, kendenan ta kima sensia riba bo, i wesu di hende lo wordu kima riba bo.'"

³E ora ei riba e mesun dia el a duna un senal, bisando: "Esaki ta e senal di kual SENOR a papia: 'Mira, e altar lo habri for di otro, i e shinishi ku tin riba dje lo wordu basha afo.'"

⁴Awor a sosode ku ora rei a tende e palabra di e homber di Dios ku el a sklama kontra e altar na Bet-el, Jeroboam a ekstende su man for di e altar, bisando: "Gar'e!" Ma su man ku el a ekstende kontra dje a seka, asina ku e no por a hal'e bek mas.

⁵Tambe e altar a habri for di otro i e shinishi a basha for di e altar, konforme e senal ku e homber di Dios a duna pa medio di e palabra di SENOR.

⁶I rei a kontesta i a bisa e homber di Dios: "Pa fabor, roga SENOR bo Dios i hasi orashon pa mi, pa mi man bolbe bira bon." Asina e homber di Dios a roga SENOR, i rei su man a bolbe bira bon i a bira manera e tabata prome.

⁷E ora ei rei a bisa e homber di Dios: "Ban kas ku mi i refreska bo kurpa, i lo mi dunabo un rekompensa."

⁸Ma e homber di Dios a bisa rei: "Ni maske bo a dunami mitar di bo kas, lo mi no a bai ku bo, ni lo mi no a kome pan ni bebe awa na e luga aki.

⁹Pasobra asina mi a wordu ordena pa medio di e palabra di SENOR, bisando: 'No kome pan ni bebe awa, ni bolbe pa e mesun kaminda ku bo a bin.'"

¹⁰Asina el a kohe un otro kaminda i no a bolbe pa e kaminda ku el a bin Bet-el.

¹¹Awor tabata biba un profeta bieu na Bet-el; i su yu hombernan a bin kont'e tur loke ku e homber di Dios a hasi e dia ei na Bet-el; e palabranan ku el a papia ku rei tambe nan a konta nan tata.

¹²I nan tata a bisa nan: "Kual kaminda el a kohe?" Awor su yu hombernan a mira e kaminda ku e homber di Dios, ku a bin for di Juda, a kohe.

¹³E ora ei el a bisa su yu hombernan: " Siya e buriku pa mi." Asina nan a siya e buriku p'e; i el a subi e buriku i a bai.

¹⁴Asina el a bai tras di e homber di Dios i a han'e sinta bou di un palu di eik; i el a bis'e: "Ta bo ta e homber di Dios ku a bin for di Juda?" I el a bisa: "Si, t'ami."

¹⁵E ora ei el a bis'e: "Ban kas ku mi i kome pan."

¹⁶I el a bisa: "Mi no por bolbe ku bo ni bai ku bo, ni mi no ta kome pan ni bebe awa serka bo na e luga aki.

¹⁷Pasobra mi a hana un ordu pa medio di e palabra di SENOR: 'Bo no mag kome pan ni bebe awa ayanan; no bolbe pa e kaminda ku bo a bin.'"

¹⁸I el a bis'e: "Ami tambe ta un profeta meskos ku bo, i un angel a papia ku mi dor di e palabra di SENOR, bisando: 'Tres'e bek serka bo na bo kas, pa e kome pan i bebe awa.'" Ma ta gana el a gan'e.

¹⁹Asina el a bai bek kune, i a kome pan na su kas i a bebe awa.

²⁰Awor a sosode ku mientras nan tabata sinta na mesa, e palabra di SENOR a yega na e profeta ku a hasie bolbe;

²¹i el a sklama bisa e homber di Dios ku a bin for di Juda: "Asina SENOR ta bisa: 'Pasobra bo a desobedese e ordu di SENOR, i no a kumpli ku e mandamentu ku SENOR bo Dios a ordenabo,

²²ma a bai bek i a kome pan i bebe awa na e luga di kual El a bisabo: "No kome pan ni bebe awa", bo kadaver lo no wordu dera den graf di bo tatanan.'"

²³I a sosode ku despues ku el a kome pan i despues ku el a bebe, el a siya e buriku pa e profeta ku el a hasi bolbe.

²⁴Ma ora ku el a bai, un leon a top'e na kaminda i a mat'e, i su kadaver a keda benta riba kaminda, ku e buriku para banda di dje; e leon tambe tabata para banda di e kadaver.

²⁵I ata, tabatin homber ta pasa i nan a mira e kadaver benta riba kaminda, i e leon para banda di e kadaver; i nan a bin konta esaki den e stat kaminda e profeta bieu tabata biba.

²⁶Awor ora ku e profeta ku a hasie bolbe di e kaminda a tende esaki, el a bisa: "Ta e homber di Dios ku a desobedese e ordu di SENOR; pesei SENOR a entregu'e na e leon ku a habrak'e i a mat'e, konforme e palabra di SENOR ku El a papia kune."

²⁷E ora ei el a papia ku su yu hombernan, bisando: "Siya e buriku pa mi." I nan a siy'e.

²⁸I el a bai i a hana su kadaver benta riba kaminda ku e buriku i e leon para banda di e kadaver; e leon no a kome e kadaver ni a habraka e buriku.

²⁹Asina e profeta a hisa kadaver di e homber di Dios pon'e riba e buriku i a tres'e bek; i el a bin na e stat di e profeta bieu pa lamenta p'e, i pa der'e.

³⁰I el a pone su kadaver den su mes graf; i nan a lamenta p'e, bisando: "Ai, mi ruman!"

³¹I a sosode ku despues ku el a der'e, el a papia ku su yu hombernan, bisando: "Dia mi muri, derami den e graf ku e homber di Dios ta dera aden; pone mi wesunan banda di su wesunan.

³²Pasobra siguramente lo sosode loke ku el a sklama pa medio di e palabra di SENOR kontra e altar na Bet-el, i kontra tur e kasnan di e luganan haltu ku tin den e statnan di Samaria."

³³Despues di e evento aki Jeroboam no a bolbe di su mal kaminda, ma el a bolbe nombra saserdotenan pa e luganan haltu for di meimei di henter e pueblo; ken ku tabata kier el a konsagra pa ta saserdote di e luganan haltu.

³⁴I e evento aki a bira pika pa e kas di Jeroboam, pa kual motibu el a wordu kita i destrui for di riba e superfisio di tera.