Read Papantla Totonac 1 Reinan 14 Bible Online

1 Reinan 14 - Papantla Totonac bible

1 Reinan 14

¹E tempu ei Abias, yu homber di Jeroboam, a bira malu.

²I Jeroboam a bisa su esposa: "Lanta awor, i disfrasa bo mes pa nan no ripara ku ta esposa di Jeroboam bo ta, i bai Silo; mira, profeta Ahias ta ayanan, kende a papia tokante di mi, ku ami lo a bira rei di e pueblo aki.

³I hiba dies pan, algun pan buskuchi i un butishi di miel, i bai serka dje. E lo kontabo kiko ta bai pasa ku e mucha."

⁴I Jeroboam su esposa a hasi asina; el a lanta bai Silo, i a yega na e kas di Ahias. Awor Ahias no por a mira, pasobra su wowonan tabata skur pa motibu di su edat.

⁵Awor SENOR a bisa Ahias: "Mira, esposa di Jeroboam ta bin pa konsulta ku bo tokante di su yu homber, pasobra e ta malu. Bo mester bis'e tal i tal kos, pasobra lo t'asina ku ora e yega e lo pretende di ta un otro hende."

⁶I a sosode ku ora Ahias a tende e zonidu di su pianan yega na porta, el a bisa: "Drenta, esposa di Jeroboam. Pakiko bo ta pretende di ta otro hende? Pasobra mi a wordu manda serka bo ku mal notisia.

⁷Bai bisa Jeroboam: 'Asina e SENOR Dios di Israel ta bisa: "Mi a halsabo for di meimei di e pueblo i a hasibo lider di Mi pueblo Israel,

⁸i a sker e reino kit'e for di e kas di David i a dunabo e. Sinembargo, bo no tabata manera Mi sirbido David, kende a warda Mi mandamentunan i a siguiMi ku henter su kurason, pa hasi solamente loke tabata bon den Mi bista;

⁹ma abo a hasi mas malu ku tur esnan ku tabata prome ku bo, i a bai traha otro diosnan i imagennan basha pa bo mes, pa probokaMi na rabia, i a tiraMi tras di bo lomba.

¹⁰"Pesei mira, Mi ta trese kalamidat riba e kas di Jeroboam, i lo korta kita for di Jeroboam tur hende homber, tantu katibu komo liber na Israel; i lo Mi bari e kas di Jeroboam limpi-limpi, manera ta bari mest te ora tur kita.

¹¹Esun ku ta pertenese na Jeroboam, ku muri den stat, kacho lo kome. I esun ku muri den kunuku, parha di shelu lo kome, pasobra SENOR a papia esaki."'

¹²"Awor abo lanta, bai bo kas. Asina bo pone bo pia den stat, e mucha lo muri.

¹³I henter Israel lo lamenta p'e i der'e, pasobra di e famia di Jeroboam ta e so lo bai den graf, pasobra di e kas di Jeroboam ta den dje so algu bon a wordu hana pa ku e SENOR Dios di Israel.

¹⁴"Ademas, SENOR lo lanta un rei pa Su mes riba Israel ku lo korta e kas di Jeroboam kit'afo di awe padilanti.

¹⁵Pasobra SENOR lo suta Israel manera un richi ta wordu sakudi den awa; i E lo ranka Israel ku rais ku tur for di e bon tera aki ku El a duna nan tatanan, i lo plama nan na e otro banda di Riu Eufrates, pasobra nan a traha nan imagennan di Asera, probokando SENOR na rabia.

¹⁶I E lo laga Israel pa su kuenta pa motibu di e pikanan di Jeroboam, ku el a komete, i ku kualnan el a hasi Israel peka."

¹⁷E ora ei Jeroboam su esposa a lanta bai i a yega Tirsa. Ora ku e tabata pasa drempel di e kas, e mucha a muri.

¹⁸I henter Israel a der'e i a lamenta p'e, konforme e palabra di SENOR ku El a papia pa medio di Su sirbido profeta Ahias.

¹⁹Awor e demas echonan di Jeroboam, kon el a hasi guera i kon el a reina, mira, nan ta para skirbi den e Buki di Kronikanan di e reinan di Israel.

²⁰I e tempu ku Jeroboam a reina tabata bint'i dos ana; i el a bai sosega serka su tatanan, i su yu homber Nadab a reina na su luga.

²¹Awor Roboam, yu homber di Salomon, tabata reina na Juda. Roboam tabatin kuarent'i un ana dia ku el a bira rei, i el a reina dieshete ana na Jerusalem, e stat ku SENOR a skohe for di tur e tribunan di Israel pa pone Su nomber ayanan. I nomber di su mama tabata Naama e amonita.

²²I Juda a hasi malu den bista di SENOR, i nan a probok'E hasié yalurs, mas ku tur loke nan tatanan a hasi, ku e pikanan ku nan a komete.

²³Pasobra nan tambe a traha pa nan mes luganan haltu i pilarnan sagrado i imagennan di Asera riba tur seru haltu i bou di tur palu berde.

²⁴I tambe tabatin sodomitanan na e tera. Nan tabata hasi konforme tur e abominashonnan di e nashonnan ku SENOR a saka for di dilanti di e yunan di Israel.

²⁵Awor a sosode ku den e di sinku ana di rei Roboam, Sisak, rei di Egipto, a lanta kontra Jerusalem.

²⁶I el a kohe e tesoronan di e kas di SENOR i e tesoronan di rei su kas bai kune, i el a kohe tur kos; tambe el a kohe tur e eskudonan di oro ku Salomon a traha.

²⁷Asina rei Roboam a traha eskudo di brons na nan luga, i a pone nan na enkargo di e komandantenan di e guardianan ku tabata tene warda na porta di rei su kas.

²⁸E ora ei a sosode ku ki ora ku rei tabata drenta e kas di SENOR, e guardianan tabata karga nan i despues hiba nan bek den e kamber di e guardianan.

²⁹Awor e demas echonan di Roboam i tur loke ku el a hasi, nan no ta para skirbi den e Buki di Kronikanan di e reinan di Juda?

³⁰I tabatin guera kontinuamente entre Roboam i Jeroboam.

³¹I Roboam a bai sosega serka su tatanan i a wordu dera serka su tatanan den e stat di David; i nomber di su mama tabata Naama e amonita. I su yu homber Abiam a bira rei na su luga.