Read Papantla Totonac 1 Reinan 15 Bible Online

1 Reinan 15 - Papantla Totonac bible

1 Reinan 15

¹Awor den e di diesocho ana di rei Jeroboam, yu homber di Nabat, Abiam a bira rei di Juda.

²El a reina tres ana na Jerusalem; i nomber di su mama tabata Maaka, yu muhe di Abisalom.

³I el a kana den tur e pikanan di su tata, ku el a komete prome kune; i su kurason no tabata kompletamente dedika na SENOR su Dios, manera kurason di su tata David.

⁴Ma pa motibu di David SENOR su Dios a dun'e un lampi na Jerusalem, pa lanta su yu homber despues di dje i pa stablese Jerusalem;

⁵pasobra David a hasi loke tabata korekto den bista di SENOR, i no a aparta su mes for di nada ku El a orden'e hasi tur e dianan di su bida, ku eksepshon di e kaso di Urias e heteo.

⁶I tabatin guera entre Roboam i Jeroboam tur e dianan di su bida.

⁷Awor e demas echonan di Abiam i tur loke ku el a hasi, nan no ta para skirbi den e Buki di Kronikanan di e reinan di Juda? I tabatin guera entre Abiam i Jeroboam.

⁸I Abiam a bai sosega serka su tatanan i nan a der'e den e stat di David; i su yu homber Asa a bira rei na su luga.

⁹Asina ta ku den e di binti ana di Jeroboam, rei di Israel, Asa a kuminsa reina komo rei di Juda.

¹⁰I el a reina kuarent'i un ana na Jerusalem; i nomber di su mama tabata Maaka, yu muhe di Abisalom.

¹¹I Asa a hasi loke tabata korekto den bista di SENOR, manera su tata David.

¹²Tambe el a saka e sodomitanan for di e tera, i a kita tur e idolonan ku su tatanan a traha.

¹³I tambe el a kita su mama Maaka for di e puesto di reina mama, pasobra su mama a traha un imagen horibel di Asera; i Asa a kap e imagen horibel bash'abou i a kim'e na Roi Kedron.

¹⁴Ma e luganan haltu no a wordu kita; sinembargo, kurason di Asa tabata kompletamente dedika na SENOR henter su bida.

¹⁵I el a trese den e kas di SENOR e kosnan ku su tata a dedika i e kosnan ku e mes a dedika: plata, oro i artikulonan-di-uzo.

¹⁶Awor tabatin guera entre Asa i Baasa, rei di Israel, henter nan bida.

¹⁷I Baasa, rei di Israel, a lanta kontra Juda i a fortifika Rama, pa no laga ningun hende sali ni drenta serka Asa, rei di Juda.

¹⁸E ora ei Asa a kohe tur e plata i e oro ku a keda den a luganan-di-warda-tesoro di e kas di SENOR i e luganan-di-warda-tesoro di rei su kas, i a entrega nan den man di su sirbidonan. I rei Asa a manda nan serka Ben-adad, yu homber di Tabrimon, yu homber di Hezion, rei di Siria, kende tabata biba na Damasko, bisando:

¹⁹"Laga tin un aliansa entre abo i ami, manera tabatin entre mi tata i bo tata. Mira, mi a manda un regalo di plata i oro pa bo; bai, kibra bo aliansa ku Baasa, rei di Israel, pa e retira for di mi."

²⁰Asina Ben-adad a skucha rei Asa i a manda e komandantenan di su ehersitonan kontra e statnan di Israel, i a konkista Ijon, Dan, Abel-bet-maaka i henter Kineret, ademas di henter e tera di Neftali.

²¹I a sosode ku ora Baasa a tende di esaki, el a stop di fortifika Rama i a keda na Tirsa.

²²Anto rei Asa a hasi un proklamashon na henter Juda, sin eksepshon di ningun hende; i nan a kohe e piedranan i e palunan di Rama, ku Baasa a uza pa konstrui, bai kune. I ku esakinan rei Asa a traha Geba di Benjamin i Mizpa.

²³Awor e demas echonan di Asa, tur su poder, tur loke ku el a hasi, i e statnan ku el a traha, nan no ta para skirbi den e Buki di Kronikanan di e reinan di Juda? Ma den e dianan di su biehes el a bira malu na su pianan.

²⁴I Asa a bai sosega serka su tatanan i a wordu dera serka su tatanan den e stat di su tata David; i su yu homber Josafat a reina na su luga.

²⁵Awor Nadab, yu homber di Jeroboam, a bira rei di Israel den e di dos ana di Asa, rei di Juda, i el a reina dos ana riba Israel.

²⁶I el a hasi malu den bista di SENOR, i a kana den e kaminda di su tata i den su pika ku el a hasi Israel komete.

²⁷E ora ei Baasa, yu homber di Ahias, di e kas di Isakar, a konspira kontra dje; i Baasa a dal e mata na Gibeton, ku tabata pertenese na e filisteonan, mientras ku Nadab i henter Israel tabata rondona Gibeton.

²⁸Asina Baasa a mat'e den e di tres ana di Asa, rei di Juda, i a reina na su luga.

²⁹I a sosode ku asina el a bira rei, el a mata henter e kas di Jeroboam. E no a laga ni un hende di Jeroboam na bida, te ora ku el a destrui nan, konforme e palabra di SENOR ku El a papia pa medio di Su sirbido, Ahias e silonita,

³⁰i pa motibu di e pikanan di Jeroboam ku el a komete i ku el a hasi Israel komete, pa motibu di su probokashon ku kual el a proboka e SENOR Dios di Israel na rabia.

³¹Awor e demas echonan di Nadab i tur loke ku el a hasi, nan no ta para skirbi den e Buki di Kronikanan di e reinan di Israel?

³²I tabatin guera entre Asa i Baasa, rei di Israel, henter nan bida.

³³Den e di tres ana di Asa, rei di Juda, Baasa, yu homber di Ahias, a bira rei di henter Israel na Tirsa i a reina bint'i kuater ana.

³⁴I el a hasi malu den bista di SENOR, i a kana den e kaminda di Jeroboam i den su pika ku el a hasi Israel komete.