Read Papantla Totonac 1 Reinan 16 Bible Online

1 Reinan 16 - Papantla Totonac bible

1 Reinan 16

¹Awor e palabra di SENOR a yega na Jehu, yu homber di Hanani, kontra Baasa, bisando:

²"Pasobra Mi a halsabo for di den stof i a hasibo lider di Mi pueblo Israel, i bo a kana den e kaminda di Jeroboam i a hasi Mi pueblo Israel peka, probokando Mi na rabia ku nan pikanan,

³mira, lo Mi kaba ku Baasa i ku su kas, i lo Mi hasi bo kas manera e kas di Jeroboam, yu homber di Nabat.

⁴Esun di Baasa ku muri den stat, kacho lo kome. I esun di dje ku muri den kunuku, parha di shelu lo kome."

⁵Awor e demas echonan di Baasa, loke ku el a hasi i su poder, nan no ta para skirbi den e Buki di Kronikanan di e reinan di Israel?

⁶I Baasa a bai sosega serka su tatanan i a wordu dera na Tirsa; i su yu homber Ela a bira rei na su luga.

⁷Ademas, e palabra di SENOR pa medio di profeta Jehu, yu homber di Hanani, tambe a yega kontra Baasa i su kas, pa motibu di tur e maldat ku el a hasi den bista di SENOR, probokando E na rabia ku e obra di su mannan, dor di ta manera e kas di Jeroboam, i pasobra el a destrui esaki.

⁸Den e di bint'i seis ana di Asa, rei di Juda, Ela, yu homber di Baasa, a bira rei di Israel na Tirsa, i a reina dos ana.

⁹I su sirbido Zimri, komandante di mitar di su garoshinan, a konspira kontra dje. Awor Ela tabata na Tirsa ta bebe burachi na e kas di Arsa, kende tabata mayordomo di e kas di Tirsa.

¹⁰E ora ei Zimri a drenta paden i a dal e mata, den e di bint'i shete ana di Asa, rei di Juda, i a bira rei na su luga.

¹¹I a sosode ku ora el a bira rei, asina ku el a sinta riba su trono, el a mata tur e hendenan di e kas di Baasa; e no a laga ni un hende homber, ni di su famianan ni di su amigunan.

¹²Asina Zimri a destrui tur e hendenan di e kas di Baasa, konforme e palabra di SENOR ku El a papia kontra Baasa pa medio di profeta Jehu,

¹³pa motibu di tur e pikanan di Baasa i e pikanan di su yu homber Ela, ku nan a komete i ku nan a hasi Israel komete, probokando e SENOR Dios di Israel na rabia ku nan idolonan.

¹⁴Awor e demas echonan di Ela i tur loke ku el a hasi, nan no ta para skirbi den e Buki di Kronikanan di e reinan di Israel?

¹⁵Den e di bint'i shete ana di Asa, rei di Juda, Zimri a reina shete dia na Tirsa. Awor e pueblo tabata kampa kontra Gibeton, ku tabata pertenese na e filisteonan.

¹⁶I e pueblo ku tabata kampa a tende nan bisa: "Zimri a konspira i tambe a mata rei." Pesei henter Israel a hasi Omri, komandante di e ehersito, rei di Israel riba e dia ei den e kampamentu.

¹⁷E ora ei Omri i henter Israel huntu kune a bai for di Gibeton, i nan a rondona Tirsa.

¹⁸I a sosode ku ora Zimri a mira ku nan a kohe e stat, el a bai den e sitadel di rei su kas i a kima rei su kas ku kandela ku su mes aden, i a muri,

¹⁹pa motibu di su pikanan ku el a komete, hasiendo malu den bista di SENOR, kanando den e kaminda di Jeroboam, i den su pika ku el a komete, dor di hasi Israel peka.

²⁰Awor e demas echonan di Zimri i e komplot ku el a traha, nan no ta para skirbi den e Buki di Kronikanan di e reinan di Israel?

²¹E ora ei e pueblo di Israel a keda dividi den dos parti: mitar di e pueblo a sigui Tibni, yu homber di Ginat, pa hasie rei; e otro mitar a sigui Omri.

²²Ma e pueblo ku a sigui Omri tabatin viktoria riba e pueblo ku a sigui Tibni, yu homber di Ginat. I Tibni a muri i Omri a bira rei.

²³Den e di trint'i un ana di Asa, rei di Juda, Omri a bira rei di Israel i a reina diesdos ana; el a reina seis ana na Tirsa.

²⁴I el a kumpra Seru Samaria serka Semer pa dos talento di plata; i el a konstrui riba e seru, i a yama e stat ku el a konstrui, Samaria, na nomber di Semer, dono di e seru.

²⁵I Omri a hasi malu den bista di SENOR, i a hasi mas maldat ku tur esnan ku tabata prome kune.

²⁶Pasobra el a kana den henter e kaminda di Jeroboam, yu homber di Nabat, i den su pikanan ku el a hasi Israel komete, probokando SENOR Dios di Israel ku nan idolonan.

²⁷Awor e demas echonan di Omri ku el a hasi i su poder ku el a demostra, nan no ta para skirbi den e Buki di Kronikanan di e reinan di Israel?

²⁸Asina Omri a bai sosega serka su tatanan i a wordu dera na Samaria; i su yu homber Akab a bira rei na su luga.

²⁹Awor Akab, yu homber di Omri, a bira rei di Israel den e di trint'i ocho ana di Asa, rei di Juda; i Akab, yu homber di Omri, a reina bint'i dos ana riba Israel na Samaria.

³⁰I Akab, yu homber di Omri, a hasi malu den bista di SENOR, mas ku tur esnan ku tabata prome kune.

³¹I a sosode ku no solamente el a konsidera komo algu gewon pa kana den e pikanan di Jeroboam, yu homber di Nabat, ma pa kolmo el a kasa ku Jezabel, yu muhe di Et-baal, rei di e sidonionan, i a bai sirbi Baal i a ador'e.

³²Asina el a lanta un altar pa Baal den e kas di Baal, ku el a traha na Samaria.

³³I tambe Akab a traha e imagen di Asera. Asina Akab a hasi mas pa proboka e SENOR Dios di Israel ku tur e reinan di Israel ku tabata prome kune.

³⁴Den Akab su dianan Hiel di Bet-el a traha Jeriko; el a pone su fundeshinan a kosto di perdida di su primogenito Abiram, i a pone su portanan a kosto di perdida di su yu homber mas chikitu Segub, konforme e palabra di SENOR ku El a papia pa medio di Josue, yu homber di Nun.