Read Papantla Totonac 1 Reinan 17 Bible Online

1 Reinan 17 - Papantla Totonac bible

1 Reinan 17

¹Awor Elias e tisbita, kende tabata un di e hendenan ku tabata biba temporalmente na Galaad, a bisa Akab: "Manera SENOR, e Dios di Israel, ta biba, dilanti di Kende mi ta para, siguramente lo no tin ni serena ni awaseru e ananan aki, si no ta pa medio di mi palabra."

²I e palabra di SENOR a yega na Elias, bisando:

³"Bai for di aki i bira bai pariba, i skonde banda di Roi Kerit, ku ta keda pariba di Jordan.

⁴I lo bo bebe for di e roi, i Mi a ordena e rafnan pa dunabo di kome ayanan."

⁵Asina el a bai i a hasi konforme e palabra di SENOR, pasobra el a bai i a biba banda di Roi Kerit, ku ta keda pariba di Jordan.

⁶I e rafnan tabata trese pan ku karni p'e mainta i pan ku karni atardi; i e tabata bebe for di e roi.

⁷I a sosode ku despues di un tempu e roi a seka, pasobra awaseru no a kai na e tera.

⁸E ora ei e palabra di SENOR a yega na dje, bisando:

⁹"Lanta, bai Sarepta, ku ta pertenese na Sidon, i keda ayanan; mira, ayanan Mi a duna un biuda ordu pa dunabo di kome."

¹⁰Asina el a lanta i a bai Sarepta, i ora ku el a yega na porta di e stat, mira, tabatin un biuda einan ta piki palu; i el a yam'e i a bisa: "Pa fabor, buska poko awa den un butishi pa mi, pa mi bebe."

¹¹I ora ku e tabata bai kohe esaki, el a yam'e i a bisa: "Pa fabor, trese pida pan pa mi den bo man."

¹²Ma el a bisa: "Manera SENOR bo Dios ta biba, mi no tin pan, solamente un man di harina den e komchi i un tiki zeta den e butishi; i mira, mi ta piki algun pida palu pa mi bai paden i prepar'e pa mi ku mi yu homber, pa nos kom'e i muri."

¹³E ora ei Elias a bis'e: "No tene miedu; bai, hasi manera bo a bisa, ma traha un pan buskuchi chikitu for di dje pa mi prome, i tres'e pa mi; i despues bo por traha un pa bo mes i pa bo yu homber.

¹⁴Pasobra asina e SENOR Dios di Israel ta bisa: 'E komchi di harina lo no bira bashi, ni e butishi di zeta lo no bira bashi, te dia ku SENOR manda awaseru riba e superfisio di tera.'"

¹⁵Asina el a bai i a hasi konforme e palabra di Elias; i e ku Elias i e hendenan di su kas a kome pa hopi dia.

¹⁶E komchi di harina no a bira bashi ni e butishi di zeta no a bira bashi, konforme e palabra di SENOR ku El a papia pa medio di Elias.

¹⁷Awor a sosode ku despues di e kosnan aki, e yu homber di e muhe, e ama di kas, a bira malu; i su malesa tabata asina grave ku no a keda rosea den dje.

¹⁸Pesei e muhe a bisa Elias: "Ta kiko mi tin di hasi ku bo, O homber di Dios? Bo a bin serka mi pa trese mi inikidat na memoria i pa mata mi yu!"

¹⁹I el a bis'e: "Dunami bo yu." Anto el a koh'e for di den su skochi i a kargu'e subi bai kune na e kamber ariba, kaminda e tabata keda, i a pon'e riba su mes kama.

²⁰I el a sklama na SENOR i a bisa: "O SENOR mi Dios, Bo a trese kalamidat tambe riba e biuda serka ken mi ta keda, dor di laga su yu muri?"

²¹E ora ei el a rek su mes tres biaha riba e mucha, i a sklama na SENOR, i a bisa: "O SENOR mi Dios, mi ta rogaBo, laga bida di e mucha aki bolbe den dje."

²²I SENOR a tende e bos di Elias; i bida di e mucha a bolbe den dje, i el a rebiba.

²³I Elias a kohe e mucha i a baha kune for di e kamber ariba hib'e den kas, i a entregu'e na su mama; i Elias a bisa: "Mira, bo yu ta bibu!"

²⁴E ora ei e muhe a bisa Elias: "Awor mi sa ku bo ta un homber di Dios, i ku e palabra di SENOR den bo boka ta berdat."