Read Papantla Totonac 1 Reinan 18 Bible Online

1 Reinan 18 - Papantla Totonac bible

1 Reinan 18

¹Awor a sosode ku despues di hopi dia e palabra di SENOR a yega na Elias den e di tres ana, bisando: "Bai, presenta bo mes na Akab, i lo Mi manda awaseru riba e superfisio di tera."

²Asina Elias a bai presenta su mes na Akab. Awor e hamber na Samaria tabata severo.

³I Akab a yama Abdias, kende tabata mayordomo di e kas. (Awor Abdias tabatin gran temor pa SENOR,

⁴pasobra a sosode ku dia Jezabel a destrui e profetanan di SENOR, Abdias a kohe shen profeta i a skonde nan na sinkuenta-sinkuenta den un kueba, i a provee pan i awa pa nan.)

⁵E ora ei Akab a bisa Abdias: "Pasa dor di e tera, bai na tur e fuentenan di awa i na tur e vayenan; podise nos hana yerba pa tene e kabainan i e mulanan na bida, sin tin mester di mata ni un di e bestianan."

⁶Asina nan a parti e tera den nan dos pa inspekshon'e; Akab a bai su so den esun direkshon i Abdias a bai su so den otro direkshon.

⁷Awor ora ku Abdias tabata na kaminda, ata, Elias a topa kune; i el a rekonos'e i a tira su kurpa abou ku su kara te na suela i a bisa: "T'abo mes, Elias, mi shon?"

⁸I el a bis'e: "T'ami mes. Bai bisa bo shon: 'Ata, Elias t'aki.'"

⁹I el a bisa: "Ta ki pika mi a komete, ku bo ta entrega bo sirbido den man di Akab, p'e matami?

¹⁰Manera SENOR bo Dios ta biba, no tin nashon ni reino na unda mi senor no a laga buskabo; i ora nan a bisa: 'E no t'aki', el a hasi e reino of nashon hura ku nan no por a hanabo.

¹¹I awor bo ta bisa: 'Bai bisa bo shon: "Ata, Elias t'aki."'

¹²I lo sosode ku ora mi bai lagabo, e Spiritu di SENOR lo hibabo na un luga ku mi no sa; asina ku ora mi bin i konta Akab i e no por hanabo, e lo matami, maske ku ami, bo sirbido, a teme SENOR for di mi hubentut.

¹³No a wordu konta na mi shon kiko mi a hasi ora Jezabel a mata e profetanan di SENOR, ku mi a skonde shen profeta di SENOR na sinkuenta-sinkuenta den un kueba, i a sostene nan ku pan i ku awa?

¹⁴I awor bo ta bisa: 'Bai bisa bo shon: "Ata, Elias t'aki"'; anto e lo matami."

¹⁵I Elias a bisa: "Manera e SENOR di ehersitonan ta biba, dilanti di Kende mi ta para, siguramente lo mi presenta mi mes na dje awe."

¹⁶Asina Abdias a bai pa kontra ku Akab, i a kont'e esaki; i Akab a bai pa kontra ku Elias.

¹⁷I a sosode ku ora Akab a mira Elias, Akab a bis'e: "Ta abo mes? Abo ku ta hinka Israel den problema?"

¹⁸I Elias a bisa: "No ta ami a hinka Israel den problema, ma ta abo i bo tata su kas, pasobra bo a bandona e mandamentunan di SENOR, i bo a sigui e Baalnan.

¹⁹Awor anto, manda yama henter Israel bin serka mi riba Seru Karmelo, huntu ku e kuater shent'i sinkuenta profetanan di Baal, i e kuater shen profetanan di e imagen di Asera ku ta kome na Jezabel su mesa."

²⁰Asina Akab a manda yama tur e yunan di Israel, i a trese e profetanan huntu na Seru Karmelo.

²¹I Elias a yega serka henter e pueblo i a bisa: "Kuantu tempu mas boso ta keda duda entre dos opinion? Si SENOR ta Dios, siguié; ma si ta Baal, siguie." Ma e pueblo no a kontest'e ni un palabra.

²²E ora ei Elias a bisa e pueblo: "Ta ami so a keda komo profeta di SENOR, ma Baal su profetanan ta kuater shent'i sinkuenta homber.

²³Awor, laga nan duna nos dos buey; i laga nan skohe un buey pa nan mes, kort'e na pida-pida i pon'e riba e palu, ma no pone kandela bou di dje; i ami lo prepara e otro buey i pon'e riba e palu, i lo mi no pone kandela bou di dje.

²⁴E ora ei boso invoka e nomber di boso dios, i ami lo invoka e nomber di SENOR; i e Dios ku kontesta ku kandela, E ta Dios." I henter e pueblo a kontesta i a bisa: "Esei ta un bon idea."

²⁵Asina Elias a bisa e profetanan di Baal: "Skohe un buey pa boso mes i prepar'e prome, pasobra boso ta hopi; i invoka e nomber di boso dios, ma no pone kandela bou di dje."

²⁶E ora ei nan a kohe e buey ku el a duna nan i nan a prepar'e i a invoka e nomber di Baal for di mainta te merdia, bisando: "O Baal, kontesta nos." Ma no tabatin ni un bos i ni un hende no a kontesta. I nan tabata bula ront di e altar ku nan a traha.

²⁷I a sosode ku ora a bira merdia, Elias a kuminsa hasi bofon di nan i a bisa: "Yama na bos haltu, pasobra e ta un dios; of e ta okupa, of el a aparta su mes, of e ta biaha, of kisas e ta na sono, i boso mester lant'e."

²⁸Asina nan tabata grita na bos haltu i tabata korta nan kurpa, segun nan kustumber, ku spada i lansa, te ora sanger tabata basha na nan kurpa.

²⁹I a sosode ku ora merdia a pasa, nan a sigui profetisa te na e ora di ofrese sakrifisio di atardi; ma no tabatin ningun bos, ningun hende no tabata kontesta, i ningun hende no tabata paga atenshon.

³⁰E ora ei Elias a bisa henter e pueblo: "Hala serka di mi." Asina henter e pueblo a hala serka di dje. I el a drecha e altar di SENOR ku a wordu basha abou.

³¹I Elias a kohe diesdos piedra konforme e kantidat di e tribunan di e yu hombernan di Jakob, na kende e palabra di SENOR a yega, bisando: "Israel lo ta bo nomber."

³²Anto ku e piedranan el a traha un altar na nomber di SENOR; i el a traha un roi ront di e altar, sufisientemente grandi pa kontene dos midi di simia.

³³Despues el a aregla e palu, a korta e buey na pida-pida i pon'e riba e palu. I el a bisa: "Yena kuater tinashi ku awa i basha esaki riba e ofrenda kima i riba e palu."

³⁴I el a bisa: "Hasie pa di dos biaha." I nan a hasie pa di dos biaha. I el a bisa: "Hasie pa di tres biaha." I nan a hasie pa di tres biaha.

³⁵I e awa tabata kore tur ront di e altar, i el a yena e roi tambe ku awa.

³⁶I a sosode ku na e ora di ofrese e sakrifisio di atardi, profeta Elias a yega serka i a bisa: "O SENOR, e Dios di Abraham, Isaak i Israel, laga ta konosi awe ku ta Abo ta Dios na Israel, i ku ami ta Bo sirbido i ku mi a hasi tur e kosnan aki konforme Bo palabra.

³⁷Kontestami, O SENOR, kontestami, pa e pueblo aki sa ku ta Abo, O SENOR, ta Dios, i ku ta Abo a hasi nan kurason bolbe atrobe."

³⁸E ora ei e kandela di SENOR a kai i a kima tur kos: e ofrenda kima, e palu, e piedranan i e stof; i el a seka e awa ku tabatin den e roi.

³⁹I ora henter e pueblo a mira esaki, nan a tira nan kurpa abou ku nan kara te na suela; i nan a bisa: "SENOR, E ta Dios; SENOR, E ta Dios."

⁴⁰E ora ei Elias a bisa nan: "Gara e profetanan di Baal; no laga ni un di nan skapa." Asina nan a gara nan; i Elias a hiba nan na Roi Kison, i a mata nan ayanan.

⁴¹Awor Elias a bisa Akab: "Bai, kome i bebe, pasobra tin zonidu di un awaseru pisa."

⁴²Asina Akab a bai pa kome i bebe. Ma Elias a subi bai na kabes di Seru Karmelo; i el a sak abou te na suela i a pone su kara meimei di su rudianan.

⁴³I el a bisa su sirbido: "Subi bai awor, wak den direkshon di laman." Asina el a subi bai i a wak, i a bisa: "No tin nada." I shete biaha Elias a bisa: "Bai bek."

⁴⁴I a sosode ku e di shete biaha el a bisa: "Mira, un nubia mes chikitu ku man di hende ta sali for di laman." I Elias a bisa: "Bai bisa Akab: 'Prepara bo garoshi i baha bai, pa e awaseru pisa no strobabo.'"

⁴⁵Asina a sosode ku den un ratu di ora shelu a bira pretu di nubia i bientu, i tabatin un awaseru pisa. I Akab a subi su garoshi i a bai Jezreel.

⁴⁶I e man di SENOR tabata riba Elias, i el a faha su hep i a kore yega Jezreel prome ku Akab.