Read Papantla Totonac 1 Reinan 19 Bible Online

1 Reinan 19 - Papantla Totonac bible

1 Reinan 19

¹Awor Akab a konta Jezabel tur loke Elias a hasi, i kon el a mata tur e profetanan ku spada.

²E ora ei Jezabel a manda un mensahero serka Elias, bisando: "Ku e diosnan hasi asina ku mi i pio ainda, si manan na e ora aki mi no hasi bo bida manera bida di un di nan."

³I Elias a hana miedu i a lanta hui bai pa skapa su bida i a yega Beerseba, ku ta pertenese na Juda, i a laga su sirbido ayanan.

⁴Ma e mes a hasi un biahe di un dia den desierto, i a bai sinta bou di un mata di enebro; i el a pidi pa e muri, i a bisa: "Ta basta; awor, O SENOR, tuma mi bida, pasobra mi no ta miho ku mi tatanan."

⁵I el a kai drumi bou di un mata di enebro i a pega sono; i mira, tabatin un angel ta mishi kune, i el a bis'e: "Lanta i kome."

⁶E ora ei el a wak, i mira, na su kabes tabatin un pan buskuchi traha riba piedra kayente, i un butishi di awa. Asina el a kome i bebe, i a kai drumi atrobe.

⁷I e Angel di SENOR a bolbe bin pa di dos biaha, a mishi kune i a bisa: "Lanta i kome, pasobra e biahe ta muchu largu pa bo."

⁸Asina el a lanta i a kome i bebe, i den e forsa di e kuminda ei el a bai kuarenta dia i kuarenta nochi te ora ku el a yega Horeb, e seru di Dios.

⁹E ora ei el a yega ayanan na un kueba i a pasa nochi ayanan. I mira, e palabra di SENOR a yega na dje, i El a bis'e: "Kiko bo ta hasi akinan, Elias?"

¹⁰I el a bisa: "Mi a traha masha duru pa SENOR, e Dios di ehersitonan, pasobra e yunan di Israel a bandona Bo aliansa, a basha Bo altarnan abou i a mata Bo profetanan ku spada. I ta ami so a keda; i nan ta buska pa kita mi bida."

¹¹I El a bisa: "Sali, i bai para riba e seru dilanti di SENOR." I mira, SENOR tabata pasa! I un bientu enorme i fuerte tabata sker e serunan i kibra e barankanan na pida-pida dilanti di SENOR; ma SENOR no tabata den e bientu. I despues di e bientu un temblor, ma SENOR no tabata den e temblor.

¹²I despues di e temblor un kandela, ma SENOR no tabata den e kandela; i despues di e kandela zonidu di un brisa suave.

¹³I a sosode ku ora Elias a tende esaki, el a lora su kara den su mantel i a sali bai para den e entrada di e kueba. I mira, un bos a yega na dje i a bisa: "Kiko bo ta hasi akinan, Elias?"

¹⁴E ora ei el a bisa: "Mi a traha masha duru pa SENOR, e Dios di ehersitonan, pasobra e yunan di Israel a bandona Bo aliansa, a basha Bo altarnan abou i a mata Bo profetanan ku spada. I ta ami so a keda; i nan ta buska pa kita mi bida."

¹⁵I SENOR a bis'e: "Bai, bolbe pa bo kaminda pa desierto di Damasko, i ora bo yega bo mester ungi Hazael komo rei di Siria;

¹⁶i Jehu, yu homber di Nimsi, bo mester ungi komo rei di Israel; i Eliseo, yu homber di Safat di Abel-mehola, bo mester ungi komo profeta na bo luga.

¹⁷I lo sosode ku esun ku skapa di spada di Hazael, Jehu lo mata, i esun ku skapa di spada di Jehu, Eliseo lo mata.

¹⁸Sinembargo, Mi ta laga shete mil na Israel, tur rudia ku no a dobla pa Baal, i tur boka ku no a sunch'e."

¹⁹Asina el a bai for di einan i a hana Eliseo, yu homber di Safat, ta plug ku diesdos par di buey su dilanti, i e mes tabata ku e di diesdos par. I Elias a pasa bai serka dje i a tira su mantel riba dje.

²⁰I el a bai laga e bueynan i a kore bai tras di Elias, i a bisa: "Pa fabor, lagami sunchi mi tata ku mi mama, e ora ei lo mi siguibo." I el a bis'e: "Bai bek atrobe, pasobra ta kiko mi a hasibo?"

²¹Asina el a bira bai lagu'e, i a kohe e par di buey, a sakrifika nan i a herebe nan karni riba e yugonan di e bueynan, i a duna e pueblo esaki; i nan a kome. Despues el a lanta, a sigui Elias i a sirbie.