Read Papantla Totonac 1 Reinan 2 Bible Online

1 Reinan 2 - Papantla Totonac bible

1 Reinan 2

¹Ora David su tempu di muri tabata aserkando, el a enkarga su yu homber Salomon, bisando:

²"Mi ta bai e kaminda di henter tera. Pesei, sea fuerte i mustra ku bo ta homber.

³I kumpli ku e enkargo di SENOR bo Dios, pa kana den Su kamindanan, pa warda Su statutonan, Su mandamentunan, Su ordenansanan i Su testimonionan, konforme loke ta para skirbi den e lei di Moises, pa bo tin eksito den tur loke bo hasi i unda ku bo bai,

⁴pa SENOR kumpli ku Su promesa ku El a papia tokante di mi, bisando: 'Si bo yu hombernan perkura di warda nan kaminda, pa nan kana Mi dilanti den berdat ku henter nan kurason i ku henter nan alma, lo bo no falta un homber riba trono di Israel.'

⁵"Awor abo tambe sa kiko Joab, yu homber di Sarvia, a hasi ku mi, kiko el a hasi ku e dos komandantenan di e ehersitonan di Israel, ku Abner, yu homber di Ner, i ku Amasa, yu homber di Jeter, kendenan el a mata; tambe el a drama sanger di guera den tempu di pas. I el a pone sanger di guera na su faha ku e tabatin na su hep i na su sandalianan ku e tabatin na su pia.

⁶Pesei, aktua konforme bo sabiduria i no laga su kabei blanku baha bai na pas den Seol.

⁷"Ma mustra karino na e yu hombernan di Barzilai e galaadita, i laga nan ta meimei di esnan ku ta kome na bo mesa, pasobra nan a yudami tempu ku mi a hui for di bo ruman Absalon.

⁸"I mira, Simei, yu homber di Gera e benjaminita di Bahurim, ta huntu ku bo. Awor ta e ta esun ku a maldishonami ku un maldishon pisa riba e dia ku mi a bai Mahanaim. Ma tempu ku el a baha bin serka mi na Jordan, mi a hur'e pa SENOR, bisando: 'Lo mi no matabo ku spada.'

⁹Pesei anto, no lagu'e bai sin hana kastigu, pasobra abo ta un homber sabi; i lo bo sa kiko bo mester hasi kune, i lo bo laga su kabei blanku baha tur na sanger den Seol."

¹⁰E ora ei David a bai sosega serka su tatanan i a wordu dera den e stat di David.

¹¹I e dianan ku David a reina riba Israel tabata kuarenta ana: shete ana el a reina na Hebron i trint'i tres ana el a reina na Jerusalem.

¹²I Salomon a sinta riba trono di su tata David, i su reino a keda firmemente stablesi.

¹³Awor Adonias, yu homber di Haguit, a bin serka Betsabe, mama di Salomon. I Betsabe a bisa: "Bo ta bin na pas?" I Adonias a bisa: "Si, na pas."

¹⁴E ora ei Adonias a bisa: "Mi tin algu di bisabo." I el a bisa: ''Papia numa."

¹⁵Anto Adonias a bisa: "Bo sa ku e reino tabata di mi i ku henter Israel tabata spera ku ami lo a bira rei; sinembargo, a bin un kambio i e reino a bira di mi ruman, pasobra el a hana esaki di SENOR.

¹⁶I awor mi ta hasibo un petishon; no nengami." I Betsabe a bis'e: "Papia numa."

¹⁷E ora ei Adonias a bisa: "Pa fabor, papia ku rei Salomon, pasobra e lo no nengabo, pa e dunami Abisag e sunamita komo esposa."

¹⁸I Betsabe a bisa: "Masha bon; lo mi papia ku rei pa bo."

¹⁹Asina Betsabe a bai serka rei Salomon pa papia kune pa Adonias. I rei a lanta pa risibie, a buig su dilanti i a sinta riba su trono; despues el a laga pone un trono pa rei su mama; i el a sinta na man drechi di rei.

²⁰E ora ei Betsabe a bisa: "Mi ta hasibo un petishon chikitu; no nengami." I rei a bis'e: "Pidi, mi mama, pasobra lo mi no nengabo."

²¹Asina el a bisa: "Laga Abisag e sunamita wordu duna na bo ruman Adonias komo esposa."

²²I rei Salomon a kontesta i a bisa su mama: "I pakiko bo ta pidi Abisag e sunamita pa Adonias? Pidi e reino tambe p'e, pasobra e ta mi ruman mayo, tantu p'e komo pa saserdote Abiatar i pa Joab, yu homber di Sarvia!"

²³E ora ei rei Salomon a hura pa SENOR, bisando: "Ku Dios hasi asina ku mi i pio ainda, si Adonias no a papia e palabra aki kontra su mes bida.

²⁴Awor anto, manera SENOR ta biba, Kende a stablesemi i a ponemi riba trono di mi tata David, i Kende a traha un kas pa mi manera El a priminti, siguramente Adonias lo wordu mata awe mes."

²⁵Asina rei Salomon a manda Benaia, yu homber di Joiada; i el a dal Adonias, asina ku el a muri.

²⁶I na saserdote Abiatar rei a bisa: "Bai Anatot, na bo mes kunuku, pasobra bo merese morto; ma lo mi no matabo awor aki, pasobra bo a karga e arka di Senor DIOS dilanti di mi tata David, i pasobra bo a wordu afligi den tur kos den kual mi tata a wordu afligi."

²⁷Asina Salomon a kita Abiatar di ta saserdote di SENOR, pa kumpli ku e palabra di SENOR ku El a papia tokante di e kas di Eli na Silo.

²⁸Awor e notisia a yega na Joab, pasobra Joab a sigui Adonias, ounke ku e no a sigui Absalon. I Joab a hui bai na e tent di SENOR i a kohe e kachunan di e altar tene.

²⁹I a wordu bisa na rei Salomon ku Joab a hui bai na e tent di SENOR, i at'e ta banda di e altar. E ora ei Salomon a manda Benaia, yu homber di Joiada, bisando: "Bai dal e mata."

³⁰Asina Benaia a drenta e tent di SENOR i a bis'e: "Asina rei a bisa: 'Sali pafo.'" Ma el a bisa: "No, ta aki mi kier muri." I Benaia a bolbe hiba kontesta pa rei, bisando: "Asina Joab a papia i asina el a kontestami."

³¹I rei a bis'e: "Hasi manera el a bisa i dal e mata i der'e, pa bo kita for di mi i for di kas di mi tata e sanger ku Joab a drama sin motibu.

³²I SENOR lo hasi su sanger bolbe riba su mes kabes, pasobra el a dal dos homber mas hustu i miho kune mata ku spada, sin ku mi tata David tabata sa esaki: Abner, yu homber di Ner, komandante di e ehersito di Israel, i Amasa, yu homber di Jeter, komandante di e ehersito di Juda.

³³Asina nan sanger lo bolbe riba kabes di Joab i riba kabes di su desendientenan pa semper; ma ku pas di SENOR sea pa semper ku David, su desendientenan, su kas i su trono."

³⁴E ora ei Benaia, yu homber di Joiada, a bai i a dal e mata; i el a wordu dera na su mes kas den desierto.

³⁵I rei a nombra Benaia, yu homber di Joiada, riba e ehersito na su luga, i rei a nombra saserdote Sadok na luga di Abiatar.

³⁶Awor rei a manda yama Simei i a bis'e: "Traha pa bo mes un kas na Jerusalem i bai biba ayanan, i no sali for di ayanan pa bai ningun parti.

³⁷Pasobra lo sosode ku dia bo sali i krusa Roi Kedron, lo bo sa bon ku lo bo muri sigur; bo sanger lo ta riba bo mes kabes."

³⁸E ora ei Simei a bisa rei: "E palabra ta bon. Manera senor mi rei a bisa, asina bo sirbido lo hasi." Asina Simei a biba hopi tempu na Jerusalem.

³⁹Ma a sosode ku despues di tres ana, dos di e sirbidonan di Simei a hui bai serka Akis, yu homber di Maaka, rei di Gat. I e hendenan a bisa Simei: "Mira, bo sirbidonan ta na Gat."

⁴⁰E ora ei Simei a lanta, a siya su buriku, i a bai Gat serka Akis pa buska su sirbidonan. I Simei a bai i a trese su sirbidonan for di Gat.

⁴¹Anto e hendenan a bisa Salomon ku Simei a sali for di Jerusalem bai Gat, i a bolbe.

⁴²Asina rei a manda yama Simei i a bis'e: "Mi no a hasibo hura pa SENOR i a spiertabo seriamente, bisando: 'Lo bo sa bon ku riba e dia ku bo sali i bai kualke kaminda, lo bo muri sigur'? I bo a bisami: 'E palabra ku mi a tende ta bon.'

⁴³Pakiko anto bo no a kumpli ku e huramentu di SENOR i e mandamentu ku mi a ordenabo?"

⁴⁴Tambe rei a bisa Simei: "Bo sa di tur e maldat ku bo a hasi na mi tata David--bo kurason ta konsiente di esaki; pesei SENOR lo debolbe bo maldat riba bo mes kabes.

⁴⁵Ma rei Salomon lo ta bendishona, i e trono di David lo ta stables! dilanti di SENOR pa semper."

⁴⁶Anto rei a ordena Benaia, yu homber di Joiada, i el a sali bai i a dal e asina ku el a muri. Asina e reino a keda stables! den man di Salomon.