Read Papantla Totonac 1 Reinan 20 Bible Online

1 Reinan 20 - Papantla Totonac bible

1 Reinan 20

¹Awor Ben-adad, rei di Siria, a reuni henter su ehersito, i tabatin trint'i dos rei huntu kune, ku kabai i garoshi. I el a bai rondona Samaria i a bringa kontra dje.

²E ora ei el a manda mensaheronan na e stat serka Akab, rei di Israel, i a laga bis'e: "Asina Ben-adad ta bisa:

³'Bo plata i bo oro ta di mi; bo esposanan i yunan di mas bunita tambe ta di mi.'"

⁴I rei di Israel a kontesta i a bisa: "Manera bo ta bisa, mi senor rei; ami i tur loke mi tin ta di bo."

⁵E ora ei e mensaheronan a bolbe i a bisa: "Asina Ben-adad ta bisa: 'Siguramente mi a manda bisabo: "Bo mester dunami bo plata, bo oro, bo esposanan i bo yunan,"

⁶ma manan na e ora aki mi ta manda mi sirbidonan serka bo, i nan lo ristra bo kas i e kasnan di bo sirbidonan; i lo sosode ku tur loke ta presioso den bo bista, nan lo kohe bai kune.'"

⁷E ora ei rei di Israel a yama tur e ansianonan di e tera i a bisa: "Pa fabor, paga tino i mira kon e homber aki ta buska problema; pasobra el a manda buska mi esposanan, mi yunan, mi plata i mi oro; i mi no a nengu'e."

⁸I tur e ansianonan i henter e pueblo a bis'e: "No skuch'e, ni konsenti kune."

⁹Pesei el a bisa e mensaheronan di Ben-adad: "Bisa senor mi rei: 'Tur loke bo a manda buska serka bo sirbido na prinsipio lo mi hasi, ma e kos aki si mi no por hasi.'" I e mensaheronan a bai hiba kontesta p'e.

¹⁰I Ben-adad a manda bis'e: "Ku e diosnan hasi asina ku mi i pio ainda, si e stof di Samaria ta sufisiente pa yena man di henter e pueblo ku ta siguimi."

¹¹E ora ei rei di Israel a kontesta i a bisa: "Bis'e: 'No laga esun ku ta bisti su armadura gaba manera esun ku ta kit'e.'"

¹²I a sosode ku ora Ben-adad a tende e mensahe aki, mientras ku e tabata bebe huntu ku e reinan den e tentnan, el a bisa su sirbidonan: "Para kla." Asina nan a para kla kontra e stat.

¹³At'awor un profeta a aserka Akab, rei di Israel, i a bisa: "Asina SENOR ta bisa: 'Bo a mira henter e multitut grandi aki? Mira, Mi ta bai entrega nan den bo man awe, i abo lo sa ku Ami ta SENOR.'"

¹⁴I Akab a bisa: "Pa medio di ken?" Asina el a bisa: "Asina SENOR ta bisa: 'Pa medio di e hobennan di e gobernantenan di e provinsianan.'" E ora ei el a bisa: "Ken lo kuminsa ku e bataya?" I el a kontesta: "Abo."

¹⁵E ora ei el a reuni e hobennan di e gobernantenan di e provinsianan, i tabatin dos shent'i trint'i dos; i despues di nan el a reuni henter e pueblo, tur e yunan di Israel, shete mil na tur.

¹⁶I merdia nan a sali bai, mientras ku Ben-adad tabata bebe te bira burachi den e tentnan, huntu ku e trint'i dos reinan ku tabata yud'e.

¹⁷I e hobennan di e gobernantenan di e provinsianan a sali bai prome. I Ben-adad a manda hombernan; i nan a kont'e, bisando: "Hombernan a sali for di Samaria."

¹⁸E ora ei el a bisa: " Si nan a sali pa pas, kohe nan bibu, of si nan a sali pa hasi guera, kohe nan bibu."

¹⁹Asina esakinan a sali for di e stat, e hobennan di e gobernantenan di e provinsianan, sigui pa e ehersito.

²⁰I kada un a mata esun ku a bin kontra dje; i e sirionan a hui, i Israel a persigm nan; i Ben-adad, rei di Siria, a skapa riba kabai, huntu ku algun koredo di kabai.

²¹I rei di Israel a sali bai i a ataka e kabainan i e garoshinan, i a kousa un matansa grandi meimei di e sirionan.

²²E ora ei e profeta a yega serka rei di Israel, i a bis'e: "Bai, fortalese bo mes, paga tino i mira kiko bo mester hasi; pasobra na kabamentu di ana rei di Siria ta bin kontra bo."

²³Awor e sirbidonan di rei di Siria a bis'e: "Nan diosnan ta diosnan di e serunan, pesei nan tabata mas fuerte ku nos; ma mas bien laga nos bringa kontra nan den sabana, i siguramente nos lo ta mas fuerte ku nan.

²⁴I hasi asin'aki: kita e reinan, kada un for di su puesto, i pone kapitannan na nan luga;

²⁵i reuni un otro ehersito manera e ehersito ku bo a perde, kabai pa kabai, garoshi pa garoshi. E ora ei nos lo bringa kontra nan den sabana, i siguramente nos lo ta mas fuerte ku nan." I el a skucha nan i a hasi asina.

²⁶Asina a sosode ku na kabamentu di ana Ben-adad a reuni e sirionan i a bai Afek pa bringa kontra Israel.

²⁷I e yunan di Israel a wordu reuni, a hana provishonnan i a bai kontra ku nan; i e yunan di Israel tabata kampa dilanti di nan, manera dos tou chikitu di kabritu, mientras ku e sirionan tabata yena e tera.

²⁸E ora ei un homber di Dios a yega serka i a papia ku rei di Israel i a bisa: "Asina SENOR ta bisa: 'Pasobra e sirionan a bisa: "SENOR ta un dios di e serunan, ma E no ta un dios di e vayenan", pesei lo Mi entrega henter e multitut grandi aki den bo man, i abo lo sa ku Ami ta SENOR.'"

²⁹Asina nan tabata kampa un dilanti di otro, shete dia largu. I a sosode ku riba e di shete dia e bataya a kuminsa; i e yunan di Israel a mata di e sirionan shen mil solda-na-pia den un dia.

³⁰Ma e restu a hui bai den e stat di Afek; i e muraya a kai riba e bint'i shete mil homber ku a resta. I Ben-adad a hui i a yega den e stat i a skonde den un kamber paden.

³¹I su sirbidonan a bis'e: "At'awor, nos a tende ku e reinan di e kas di Israel ta reinan miserikordioso. Pa fabor, laga nos mara pana-di-saku na nos hep i kabuya na nos kabes, i sali bai serka rei di Israel; podise e lo spar bo bida."

³²Asina nan a faha nan hep ku pana-di-saku i a mara kabuya na nan kabes, i a bin serka rei di Israel i a bisa: "Bo sirbido Ben-adad ta bisa: 'Pa fabor, lagami keda na bida.'" I el a bisa: "E ta na bida ainda? E ta mi ruman."

³³Awor e hombernan a tuma esaki komo un bon senal, i mesora nan a ten'e na su palabra, bisando: "Bo ruman Ben-adad." E ora ei el a bisa: "Bai busk'e." Anto Ben-adad a sali bin serka dje; i el a tum'e serka dje den garoshi.

³⁴I Ben-adad a bis'e: "Lo mi debolbe e statnan ku mi tata a kita for di bo tata; i bo mag traha kayanan pa bo mes na Damasko, manera mi tata a traha na Samaria." Akab a bisa: "I ami lo lagabo bai a base di e aliansa aki." Asina el a sera un aliansa kune i a lagu'e bai.

³⁵Awor un di e yu hombernan di e profetanan a bisa su kompanero pa medio di e palabra di SENOR: "Pa fabor, dal mi." Ma e homber a nenga di dal e.

³⁶E ora ei el a bis'e: "Pasobra bo no a skucha e bos di SENOR, mira, asina bo bai for di mi, un leon lo matabo." I asina ku el a bai for di dje un leon a han'e i a mat'e.

³⁷E ora ei el a topa un otro homber i a bisa: "Pa fabor, dal mi." I e homber a dal e, i a herid'e.

³⁸Asina e profeta a bai i a warda rei na kaminda, i a disfrasa su mes ku un verbant na su wowonan.

³⁹I ora rei tabata pasa, el a grita rei i a bisa: "Bo sirbido a sali bai den e bataya; i mira, un hende a bin i a trese un homber serka mi i a bisa: 'Wak pa e homber aki; si pa kualke motibu e skapa, lo bo paga su bida ku bo bida, of bo mester paga un talento di plata.'

⁴⁰I mientras ku bo sirbido tabata okupa aki i aya, el a bai." I rei di Israel a bis'e: "Asina bo sentensia lo ta; abo mes a disidl esaki."

⁴¹E ora ei el a kita e verbant lihe for di su wowonan; i rei di Israel a rekonos'e komo un di e profetanan.

⁴²I el a bis'e: "Asina SENOR ta bisa: 'Pasobra bo a laga e homber ku mi a destina pa destrukshon bai for di bo man, pesei lo bo duna bo bida pa su bida i bo pueblo pa su pueblo.'"

⁴³Asina rei di Israel a bai su kas ku mal beis i masha rabia, i a yega Samaria.