Read Papantla Totonac 1 Reinan 21 Bible Online

1 Reinan 21 - Papantla Totonac bible

1 Reinan 21

¹Awor despues di e kosnan aki a sosode ku Nabot e jezreelita tabatin un kunuku di wendruif ku tabata keda na Jezreel, banda di e palasio di Akab, rei di Samaria.

²I Akab a papia ku Nabot, bisando: "Dunami bo kunuku di wendruif pa mi por tin e komo hofi di berdura, pasobra e ta keda pega ku mi kas, i lo mi dunabo un kunuku di wendruif ku ta miho kune na su luga; si bo kier, lo mi dunabo su balor na plaka."

³Ma Nabot a bisa Akab: "SENOR librami di dunabo e erensia di mi tatanan."

⁴Asina Akab a bai den su kas ku mal beis i masha rabia pa motibu di e palabra ku Nabot e jezreelita a papia kune; pasobra el a bisa: "Mi no ta dunabo e erensia di mi tatanan." I el a kai drumi riba su kama i a bira su kara, i no kier a kome.

⁵Ma su esposa Jezabel a bin serka dje i a bis'e: "Di kon bo spiritu ta asina desanima ku bo no ta kome?"

⁶Asina el a bis'e: "Pasobra mi a papia ku Nabot e jezreelita, i a bis'e: 'Dunami bo kunuku di wendruif pa plaka, of si bo kier, lo mi dunabo un otro kunuku di wendruif na su luga.' Ma el a bisa: 'Mi no ta dunabo mi kunuku di wendruif.'"

⁷I su esposa Jezabel a bis'e: "Mira, no ta abo tin outoridat riba Israel awor? Lanta, kome pan, i laga bo kurason ta kontentu; lo mi dunabo e kunuku di wendruif di Nabot e jezreelita."

⁸Asina el a skirbi algun karta na nomber di Akab, a seya nan ku e seyo di Akab i a manda e kartanan pa e ansianonan i pa e hendenan di noblesa ku tabata biba serka Nabot den su stat.

⁹Awor el a skirbi den e kartanan: "Proklama un ayuno, i pone Nabot sinta na kabes di e pueblo;

¹⁰i pone dos homber perverso su dilanti, i laga nan testifika kontra dje, bisando: 'Bo a maldishona Dios i rei.' Anto sak'e pafo i piedr'e mata."

¹¹Asina e hombernan di su stat, e ansianonan i e hendenan di noblesa ku tabata biba den su stat, a hasi manera Jezabel a manda bisa nan, manera tabatin skirbi den e kartanan ku el a manda pa nan.

¹²Nan a proklama un ayuno i a pone Nabot sinta na kabes di e pueblo.

¹³E ora ei e dos hombernan perverso a drenta i a bai sinta su dilanti; i e hombernan perverso a testifika kontra dje, kontra Nabot, dilanti di e pueblo, bisando: "Nabot a maldishona Dios i rei." Asina nan a hib'e pafo di e stat i a piedr'e mata.

¹⁴E ora ei nan a manda notisia pa Jezabel, bisando: "Nabot a wordu piedra, i el a muri."

¹⁵I ora Jezabel a tende ku Nabot a wordu piedra i ku el a muri, Jezabel a bisa Akab: "Lanta, podera di e kunuku di wendruif di Nabot e jezreelita, ku el a nenga di dunabo pa plaka; pasobra Nabot no ta na bida mas, ma e ta morto."

¹⁶I a sosode ku ora Akab a tende ku Nabot a muri, Akab a lanta pa baha bai na e kunuku di wendruif di Nabot e jezreelita, pa podera di dje.

¹⁷E ora ei e palabra di SENOR a yega na Elias e tisbita, bisando:

¹⁸"Lanta, baha bai pa kontra ku Akab, rei di Israel, kende ta na Samaria; mira, e ta den e kunuku di wendruif di Nabot, kaminda el a baha bai pa podera di dje.

¹⁹I lo bo papia kune, bisando: 'Asina SENOR ta bisa: "Bo a mata i tambe a tuma den bo poder?"' I lo bo papia kune, bisando: 'Asina SENOR ta bisa: "Na e luga kaminda e kachonan a lembe e sanger di Nabot, e kachonan lo lembe bo sanger tambe.

²⁰I Akab a bisa Elias: "Bo a hanami, O mi enemigu?" I el a kontesta: "Mi a hanabo, pasobra bo a bende bo mes pa hasi malu den bista di SENOR.

²¹Mira, lo Mi trese maldat riba bo, i lo Mi baribo tir'afo, i korta tur e hombernan kita for di Akab, tantu katibu komo liber na Israel;

²²i lo Mi hasi bo kas manera e kas di Jeroboam, yu homber di Nebat, i manera e kas di Baasa, yu homber di Ahias, pa motibu di e probokashon ku kual bo a probokaMi na rabia, i pasobra bo a hasi Israel peka.

²³"I di Jezabel tambe SENOR a papia, bisando: 'E kachonan lo kome Jezabel banda di e muraya di Jezreel.'

²⁴"Esun ku ta pertenese na Akab, ku muri den stat, kacho lo kome, i esun ku muri den kunuku parha di shelu lo kome."

²⁵Siguramente no tabatin ni un hende manera Akab ku a bende su mes pa hasi malu den bista di SENOR, pasobra su esposa Jezabel tabata instigu'e.

²⁶I el a aktua masha abominabel dor di sigui idolonan, konforme tur loke e amoreonan, kendenan SENOR a kore kune for di dilanti di e yunan di Israel, a hasi.

²⁷I a sosode ku ora Akab a tende e palabranan aki, el a sker su pananan, a bisti pana-di-saku i a yuna, i el a drumi abou den pana-di-saku i tabata kana ront tur deprimi.

²⁸E ora ei e palabra di SENOR a yega na Elias e tisbita, bisando:

²⁹"Bo ta mira kon Akab a umiya su mes Mi dilanti? Pasobra el a umiya su mes Mi dilanti, lo Mi no trese e maldat den su dianan, ma lo Mi trese e maldat riba su kas den e dianan di su yu homber."