Read Papantla Totonac 1 Reinan 22 Bible Online

1 Reinan 22 - Papantla Totonac bible

1 Reinan 22

¹I a pasa tres ana sin ku tabatin guera entre Siria i Israel.

²I a sosode ku den e di tres ana Josafat, rei di Juda, a baha bin serka rei di Israel.

³Awor rei di Israel a bisa su sirbidonan: "Boso no sa ku Ramot-galaad ta pertenese na nos, i ku te ainda nos no ta hasi nada pa kit'e for di man di rei di Siria?"

⁴I el a bisa Josafat: "Bo kier ban ku mi pa bringa na Ramot-galaad?" I Josafat a bisa rei di Israel: "Ami ta manera abo ta, mi pueblo ta manera bo pueblo, mi kabainan manera bo kabainan."

⁵Ademas, Josafat a bisa rei di Israel: "Pa fabor, konsulta ku e palabra di SENOR prome."

⁶E ora ei rei di Israel a reuni e profetanan huntu, komo kuater shen homber, i a bisa nan: "Mi mester bai bringa kontra Ramot-galaad, of mi mester keda sin bai?" I nan a bisa: "Bai, pasobra SENOR lo entregu'e den man di rei."

⁷Ma Josafat a bisa: "No tin profeta di SENOR mas akinan, ku nos por konsulta kune?"

⁸I rei di Israel a bisa Josafat: "Tin un homber mas pa medio di ken nos por konsulta ku SENOR, ma mi ta odi'e, pasobra e no ta profetisa nada bon di mi, sino malu so. Ta Mikaias, yu homber di Imla." Ma Josafat a bisa: "Rei no mester papia asina."

⁹E ora ei rei di Israel a yama un ofisial i a bisa: "Hasi lihe trese Mikaias, yu homber di Imla."

¹⁰Awor rei di Israel i Josafat, rei di Juda, tabata sinta kada un riba su trono, bisti na pana di rei, na e plenchi-di-bati-mainshi na entrada di e porta di Samaria; i tur e profetanan tabata profetisa nan dilanti.

¹¹Anto Zedekias, yu homber di Kenaana, a traha kachunan di heru pa su mes i a bisa: "Asina SENOR ta bisa: 'Ku esakinan lo bo kacha e sirionan te ora bo kaba ku nan.'"

¹²I tur e profetanan tabata profetisa asin'aki, bisando: "Subi bai Ramot-galaad i prospera, pasobra SENOR lo entregu'e den man di rei."

¹³E ora ei e mensahero ku a bai yama Mikaias a papia kune, bisando: "Mira awor, e palabranan di e profetanan ta unanimamente na fabor di rei. Pa fabor, laga bo palabra ta manera palabra di un di nan, i papia faborabel."

¹⁴Ma Mikaias a bisa: "Manera SENOR ta biba, loke SENOR bisami, esei lo mi papia."

¹⁵Ora ku el a yega serka rei, rei a bis'e: "Mikaias, nos mester bai bringa kontra Ramot-galaad, of nos mester keda sin bai?" I el a kontest'e: "Bai i prospera, i SENOR lo entregu'e den man di rei."

¹⁶E ora ei rei a bis'e: "Kuantu biaha mi mester hurabo pa no papia nada otro sino e berdat ku mi den e nomber di SENOR?"

¹⁷Asina el a bisa: "Mi a mira henter Israel plama riba e serunan, manera karne ku no tin wardado. I SENOR a bisa: 'Esakinan no tin shon. Laga kada un di nan bolbe su kas na pas.'"

¹⁸E ora ei rei di Israel a bisa Josafat: "Mi no a bisabo ku e lo no profetisa nada bon di mi, sino malu so?"

¹⁹I Mikaias a bisa: "Pesei, tende e palabra di SENOR. Mi a mira SENOR sinta riba Su trono, i henter e ehersito di shelu para serka djé na Su man drechi i na Su man robes.

²⁰I SENOR a bisa: 'Ken lo gana Akab pa bai muri na Ramot-galaad?' "I un a bisa esaki i un otro a bisa esaya.

²¹E ora ei un spiritu a bin dilanti i a bai para dilanti di SENOR, i a bisa: 'Ami lo gan'e.'

²²"I SENOR a bis'e: 'Kon?' "I el a bisa: 'Ami lo bai i bira un spiritu di mentira den boka di tur su profetanan.' "E ora ei El a bisa: 'Abo mester gan'e, i bo ta logra tambe. Bai i hasi asina.'

²³"Pesei anto, mira, SENOR a pone un spiritu di mentira den boka di tur e profetanan aki di bo; i SENOR a proklama desaster kontra bo."

²⁴E ora ei Zedekias, yu homber di Kenaana, a yega serka i a dal Mikaias na su banda di kara, i a bisa: "Kon e Spiritu di SENOR por a bai for di mi pa papia ku bo?"

²⁵I Mikaias a bisa: "Mira, lo bo mira riba e dia ku bo drenta un kamber paden pa skonde."

²⁶E ora ei rei di Israel a bisa: "Kohe Mikaias hib'e bek serka Amon, e gobernado di e stat, i serka Joas, rei su yu homber,

²⁷i bisa: 'Asina rei ta bisa: "Pone e homber aki den prizon i aliment'e ku pan di aflikshon i ku awa di aflikshon te ora mi bolbe sano i salvo.

²⁸I Mikaias a bisa: "Si di berdat bo bolbe sano i salvo, SENOR no a papia pa medio di mi." I el a bisa: "Skucha, boso, pueblonan tur."

²⁹Asina rei di Israel i Josafat, rei di Juda, a bai kontra Ramot-galaad.

³⁰I rei di Israel a bisa Josafat: "Lo mi disfrasa mi mes i bai den bataya, ma abo bisti bo pana di rei." Asina rei di Israel a disfrasa su mes i a bai den bataya.

³¹Awor rei di Siria a ordena e trint'i dos kapitannan di su garoshinan, bisando: "No bringa kontra chikitu ni grandi, sino solamente kontra rei di Israel."

³²Asina a sosode ku ora e kapitannan di e garoshinan a mira Josafat, nan a bisa: "Siguramente ta rei di Israel," i nan a bira pa bringa kontra dje, i Josafat a dal un gritu.

³³E ora ei a sosode ku ora e kapitannan di e garoshinan a mira ku no tabata rei di Israel, nan a bira bai i a stop di persiguie.

³⁴Awor un homber a span su bog tira pa loko i a alkansa rei di Israel net kaminda su armadura tabata hinka den otro. Asina el a bisa e koredo di su garoshi: "Bira bai bek i sakami for di bataya, pasobra mi ta gravemente herida."

³⁵I e bataya tabata duru e dia ei, i rei a keda wanta regt den su garoshi dilanti di e sirionan, i a muri parti di atardi; i e sanger di e herida tabata kore bai den bom di e garoshi.

³⁶I ora solo tabata bahando, a pasa un gritu dor di henter e ehersito, bisando: "Kada homber pa su stat i kada homber pa su tera."

³⁷Asina rei a muri i a wordu hiba na Samaria; i nan a dera rei na Samaria.

³⁸I nan a laba e garoshi na e tanki di Samaria (kaminda e prostitutanan tabata bana), i e kachonan tabata lembe su sanger, konforme e palabra di SENOR ku El a papia.

³⁹Awor e demas echonan di Akab i tur loke ku el a hasi, e kas di ivor ku el a traha i tur e statnan ku el a traha, nan no ta para skirbi den e Buki di Kronikanan di e reinan di Israel?

⁴⁰Asina Akab a bai sosega serka su tatanan; i su yu homber Okozias a bira rei na su luga.

⁴¹Awor Josafat, yu homber di Asa, a bira rei di Juda den e di kuater ana di Akab, rei di Israel.

⁴²Josafat tabatin trint'i sinku ana dia ku el a bira rei, i el a reina bint'i sinku ana na Jerusalem. I nomber di su mama tabata Azuba, yu muhe di Silhi.

⁴³I el a kana den henter e kaminda di su tata Asa; e no a kita for di esaki, i el a hasi bon den bista di SENOR. Sinembargo, e luganan haltu no a wordu kita; ainda e pueblo tabata ofrese sakrifisio i kima sensia riba e luganan haltu.

⁴⁴Josafat tambe a hasi pas ku rei di Israel.

⁴⁵Awor e demas echonan di Josafat, su poder ku el a demostra, i kon el a hasi guera, nan no ta para skirbi den e Buki di Kronikanan di e reinan di Juda?

⁴⁶I e restante di e sodomitanan ku a keda den e dianan di su tata Asa, el a saka for di e tera.

⁴⁷Awor no tabatin rei na Edom; un diputado tabata rei.

⁴⁸Josafat a traha barkunan di Tarsis pa bai buska oro na Ofir, ma nan no a bai, pasobra e barkunan a kibra na Ezion-geber.

⁴⁹E ora ei Okozias, yu homber di Akab, a bisa Josafat: "Laga mi sirbidonan bai ku bo sirbidonan den e barkunan." Ma Josafat no tabata kier.

⁵⁰I Josafat a bai sosega serka su tatanan i a wordu dera serka su tatanan den e stat di su tata David; i su yu homber Joram a bira rei na su luga.

⁵¹Okozias, yu homber di Akab, a bira rei di Israel na Samaria den e di dieshete ana di Josafat, rei di Juda, i el a reina dos ana riba Israel.

⁵²I el a hasi malu den bista di SENOR i a kana den e kaminda di su tata i den e kaminda di su mama i den e kaminda di Jeroboam, yu homber di Nabat, kende a hasi Israel peka.

⁵³Asina el a sirbi Baal i a ador'e, i a proboka e SENOR Dios di Israel na rabia, konforme tur loke su tata a hasi.