Read Papantla Totonac 1 Reinan 3 Bible Online

1 Reinan 3 - Papantla Totonac bible

1 Reinan 3

¹Anto Salomon a sera un aliansa di matrimonio ku Farao, rei di Egipto, i a tuma Farao su yu muhe i a hib'e na e stat di David, te dia ku el a kaba di traha su mes kas i e kas di SENOR i e muraya ront di Jerusalem.

²Ainda e pueblo tabata ofrese sakrifisio riba e luganan haltu, pasobra te na e dianan ei no tabatin un kas traha pa e nomber di SENOR.

³Awor Salomon tabata stima SENOR, i tabata kana den e statutonan di su tata David; solamente e tabata ofrese sakrifisio i kima sensia riba e luganan haltu.

⁴I rei a bai Gabaon pa ofrese sakrifisio ayanan, pasobra esei tabata e luga haltu prinsipal; Salomon a ofrese mil ofrenda kima riba e altar ei.

⁵Na Gabaon SENOR a parese na Salomon anochi den un sono, i Dios a bisa: "Pidi loke bo kier pa Mi dunabo."

⁶E ora ei Salomon a bisa: "Bo a mustra gran miserikordia na Bo sirbido, mi tata David, segun ku e tabata kana Bo dilanti den berdat, hustisia i rektitut di kurason pa ku Bo; i Bo a reserva p'e e gran miserikordia aki, ku Bo a dun'e un yu homber pa sinta riba su trono, manera ta e kaso awe.

⁷"I awor, O SENOR mi Dios, Bo a hasi Bo sirbido rei na luga di mi tata David, ounke ku mi ta un mucha chikitu; mi no sa kon pa sali ni kon pa drenta.

⁸I Bo sirbido ta meimei di Bo pueblo ku Bo a skohe, un pueblo grandi ku no por wordu numera ni konta pa motibu ku nan ta asina hopi.

⁹Asina, duna Bo sirbido un kurason di komprendementu pa huzga Bo pueblo, pa disern! entre bon i malu. Pasobra ken ta kapas pa huzga e pueblo grandi aki di Bo?"

¹⁰I tabata agradabel den bista di SENOR ku Salomon a pidi esaki.

¹¹I Dios a bis'e: "Pasobra bo a pidi esaki i no a pidi bida largu pa bo mes, ni a pidi rikesa pa bo mes, ni bo no a pidi bida di bo enemigunan, ma a pidi pa bo mes disernimentu pa komprende hustisia,

¹²mira, Mi a hasi konforme bo palabranan. Ata, Mi a dunabo un kurason sab! i ku disernimentu, asina ku prome ku bo no tabatin ni un manera bo, ni despues di bo lo no lanta otro manera bo.

¹³I tambe Mi a dunabo loke bo no a pidi, tantu rikesa komo onor, asina ku entre e reinan lo no tin ni un manera bo den tur bo dianan.

¹⁴I si bo kana den Mi kamindanan i warda Mi statutonan i mandamentunan, manera bo tata David a kana, e ora ei lo Mi prolonga bo dianan."

¹⁵E ora ei Salomon a spierta, i mira, tabata un sono. I el a bin Jerusalem i a bai para dilanti di e arka di e aliansa di SENOR i a ofrese ofrendanan kima i a hasi ofrendanan di pas, i a hasi un fiesta pa tur su sirbidonan.

¹⁶E ora ei dos muhe prostituta a bin serka rei i a bai para su dilanti.

¹⁷I esun muhe a bisa: "O mi senor, e muhe aki i ami ta biba den e mesun kas; i mi a duna lus mientras ku e tabata na kas.

¹⁸I a sosode ku riba e di tres dia despues ku mi a duna lus, e muhe aki tambe a duna lus, i nos tabata huntu. No tabatin ningun hende strano huntu ku nos den kas; ta nos dos so tabata den kas.

¹⁹"I e muhe aki su yu homber a muri den anochi, pasobra el a drumi riba dje.

²⁰Asina el a lanta mei anochi i a kohe mi yu homber for di banda di mi, mientras ku bo sirbiente tabata na sono, i a pon'e den su brasa, i a pone su yu homber morto den mi brasa.

²¹I ora mi a lanta mainta pa duna mi yu pechu, ata, e tabata morto; ma mainta, ora mi a wak e bon, ata, no tabata mi yu ku mi a hana."

²²E ora ei e otro muhe a bisa: "No! Esun bibu ta mi yu i esun morto ta bo yu." Ma e prome muhe a bisa: "No! Esun morto ta bo yu i esun bibu ta mi yu." Asina nan tabata papia dilanti di rei.

²³E ora ei rei a bisa: "Esun ta bisa: 'Esun bibu ta mi yu i esun morto ta bo yu'; i e otro ta bisa: 'No! Esun morto ta bo yu i esun bibu ta mi yu.'"

²⁴I rei a bisa: "Trese un spada pa mi." Asina nan a trese un spada dilanti di rei.

²⁵I rei a bisa: "Parti e mucha bibu na dos, i duna mitar na esun i mitar na e otro."

²⁶E ora ei e muhe, kende su yu tabata esun bibu, a papia ku rei, pasobra e tabata profundamente konmovi pa su yu; i el a bisa: "O mi senor, dun'e e yu bibu i no mat'e di ningun manera." Ma e otro a bisa: "E lo no ta ni di mi ni di bo; partie na dos!"

²⁷E ora ei rei a kontesta i a bisa: "Duna e prome muhe e yu bibu i no mat'e di ningun manera. Ta e ta su mama."

²⁸Ora henter Israel a tende di e huisio ku rei a duna, nan a hana temor pa rei, pasobra nan a mira ku e sabiduria di Dios tabata den dje pa atministra hustisia.