Read Papantla Totonac 1 Reinan 4 Bible Online

1 Reinan 4 - Papantla Totonac bible

1 Reinan 4

¹Awor rei Salomon tabata rei di henter Israel.

²I esakinan tabata su ofisialnan: Azarias, yu homber di Sadok, tabata saserdote;

³Elihoref i Ahias, e yu hombernan di Sisa, tabata sekretario; Josafat, yu homber di Ahilud, tabata registrado;

⁴i Benaia, yu homber di Joiada, tabata manda riba e ehersito; i Sadok i Abiatar tabata saserdote;

⁵Azarias, yu homber di Natan, tabata manda riba e ofisialnan; i Zabud, yu homber di Natan, un saserdote, tabata rei su amigu;

⁶i Ahisar tabata mayordomo di e kas; i Adoniram, yu homber di Abda, tabata manda riba e hombernan ku mester a hasi trabou forsa.

⁷I Salomon tabatin diesdos gobernadonan ofer di henter Israel, kendenan tabata provee kuminda pa rei i pa e hendenan di su kas; kada un mester a provee un luna pa ana.

⁸I esakinan ta nan nomber: Ben-hur, den e serunan di Efrain;

⁹Ben-dekar na Makaz, Saalbim, Bet-semes i Elon-bet-hanan;

¹⁰Ben-hesed na Arubot (Soko tabata di dje i henter e tera di Hefer);

¹¹Ben-abinadab na henter e teritorio di Dor (Tafat, yu muhe di Salomon, tabata su esposa);

¹²Baana, yu homber di Ahilud, na Taanak i Meguido, i henter Bet-sean, ku ta keda banda di Zaretan bou di Jezreel, for di Bet-sean te na Abel-mehola, te na e otro banda di Jokmeam;

¹³Ben-geber, na Ramot-galaad (e statnan di Jair, yu homber di Manases, kualnan ta keda na Galaad, tabata di dje: e region di Argob, ku ta keda na Basan, sesenta stat grandi ku muraya i tranka di brons tabata di dje).

¹⁴Ahinadab, yu homber di Ido, na Mahanaim;

¹⁵Ahimaas, na Neftali (tambe el a kasa ku Basemat, yu muhe di Salomon);

¹⁶Baana, yu homber di Husai, na Aser i Alot;

¹⁷Josafat, yu homber di Parua, na Isakar;

¹⁸Simei, yu homber di Ela, na Benjamin;

¹⁹Geber, yu homber di Uri, na tera di Galaad, tera di Sehon, rei di e amoreonan, i di Og, rei di Basan; i e tabata e uniko ofisial ku tabata na e tera.

²⁰Juda i Israel tabata mes numeroso ku e santu ku tin na abundansia kantu di laman; nan tabata kome, bebe i regosiha.

²¹Awor Salomon tabata goberna riba tur e reinonan for di Riu Eufrates te na e tera di e filisteonan i te na e frontera di Egipto; nan tabata trese tributo i tabata sirbi Salomon tur e dianan di su bida.

²²I Salomon su provishon pa un dia tabata trinta midi di harina fini i sesenta midi di harina grof,

²³dies buey gordo, binti buey gorda den luga di yerba berde, shen karne i tambe bina, gasel, bina di dam i parha gorda.

²⁴Pasobra e tabatin dominio riba tur region pabou di Riu Eufrates; for di Tifsa te na Gaza, riba tur e reinan pabou di Riu Eufrates; i e tabatin pas na tur banda tur ront di dje.

²⁵Asina Juda i Israel tabata biba den siguridat, kada homber bou di su mata di wendruif i bou di su palu di figo, for di Dan te na Beerseba, tur e dianan di Salomon.

²⁶I Salomon tabatin kuarenta mil stal di kabai pa su garoshinan i diesdos mil koredo di kabai.

²⁷I e ofisialnan ei tabata provee kuminda pa rei Salomon i pa tur ku tabata bin na rei Salomon su mesa, kada un den su luna; nan tabata perkura pa no falta nada.

²⁸Tambe nan tabata trese puspas i yerba seku pa e kabainan i kabainan di kareda na e luga kaminda mester a hiba esaki, kada un segun su enkargo.

²⁹Awor Dios a duna Salomon sabiduria i disernimentu grandi i grandesa di kurason, manera e santu ku tin kantu di laman.

³⁰I e sabiduria di Salomon tabata surpasa e sabiduria di tur e hombernan di oriente i tur e sabiduria di Egipto.

³¹Pasobra e tabata mas sabi ku tur hende, mas sabi ku Etan e esraita, Heman, Kalkol i Darda, yu hombernan di Mahol; i su fama tabata konosi den tur e nashonnan tur ront.

³²Tambe el a papia tres mil proverbio i su kantikanan tabata mil i sinku.

³³I e tabata papia di e palunan, di e palu di seda ku tin na Libano te na e hisop ku ta krese na muraya; tambe e tabata papia di e bestianan, di parha, bestia ku ta lastra i piska.

³⁴I tabata bin hende for di tur pueblo pa tende e sabiduria di Salomon, for di tur e reinan di tera ku a tende di su sabiduria.