Read Papantla Totonac 1 Reinan 5 Bible Online

1 Reinan 5 - Papantla Totonac bible

1 Reinan 5

¹Awor Hiram, rei di Tiro, a manda su sirbidonan serka Salomon, ora ku el a tende ku nan a ungie komo rei na luga di su tata, pasobra semper Hiram tabata amigu di David.

²E ora ei Salomon a manda bisa Hiram:

³"Bo sa ku mi tata David no por a traha un kas pa e nomber di SENOR su Dios pa motibu di e gueranan ku tabata rondon'e, te ora SENOR a pone nan bou di su plant'i pia.

⁴Ma awor SENOR mi Dios a dunami sosiegu na tur banda; no tin ni atversario ni desaster.

⁵I mira, mi tin intenshon di traha un kas pa e nomber di SENOR mi Dios, manera SENOR a papia ku mi tata David, bisando: 'Bo yu homber, kende lo Mi pone riba bo trono na bo luga, e lo traha e kas pa Mi nomber.'

⁶"Pesei anto, ordena pa nan kap palu di seda di Libano pa mi, i mi sirbidonan lo traha huntu ku bo sirbidonan; i lo mi dunabo sueldo pa bo sirbidonan, konforme tur loke bo bisa, pasobra bo sa ku meimei di nos no tin ningun hende ku sa kon pa kap palu manera e sidonionan."

⁷I a sosode ku ora Hiram a tende e palabranan di Salomon, el a regosiha masha i a bisa: "Bendishona sea SENOR awe, Kende a duna David un yu homber sabi riba e pueblo grandi aki."

⁸Asina Hiram a manda bisa Salomon: "Mi a tende e mensahe ku bo a manda pa mi; lo mi hasi loke bo ta desea tokante di e palu di seda i di sipres.

⁹Mi sirbidonan lo hiba nan for di Libano na laman; i lo mi traha flot di nan pa pasa laman bai na e luga ku bo dirigimi, i ayanan lo mi laga los nan for di otro pa bo hiba nan. E ora ei lo bo kumpli ku mi deseo dor di duna mi hendenan di kas kuminda."

¹⁰Asina Hiram a duna Salomon mes tantu palu di seda i di sipres ku e tabata desea.

¹¹E ora ei Salomon a duna Hiram binti mil midi di trigo komo kuminda pa su hendenan di kas, i binti midi di zeta bati; asina Salomon tabata duna Hiram ana tras ana.

¹²I SENOR a duna Salomon sabiduria, meskos ku El a primintie; i tabatin pas entre Hiram i Salomon, i nan dos a sera un aliansa.

¹³Awor rei Salomon a lanta for di henter Israel un grupo di trahado pa hasi trabou forsa; i e trahadonan pa hasi trabou forsa tabata trinta mil homber.

¹⁴I e tabata manda nan Libano, dies mil kada luna pa turno; nan tabata un luna na Libano i dos luna na kas. I Adoniram tabatin enkargo di esnan ku tabata hasi trabou forsa.

¹⁵Awor Salomon tabatin setenta mil kargado di karga i ochenta mil kapdo di piedra den e serunan,

¹⁶fuera di Salomon su tres mil tres shen ofisialnan prinsipal ku tabatin enkargo di e proyekto i ku tabata goberna riba e pueblo ku tabata hasi e trabou.

¹⁷Anto rei a ordena, i nan a kap piedranan grandi, piedranan kostoso, pa pone fundeshi di e kas ku piedra gekap.

¹⁸Asina Salomon su trahadonan den konstrukshon i Hiram su trahadonan den konstrukshon i e gebalitanan a kap nan, i a prepara e palunan i e piedranan pa traha e kas.