Read Papantla Totonac 1 Reinan 6 Bible Online

1 Reinan 6 - Papantla Totonac bible

1 Reinan 6

¹Awor a sosode ku den e di kuater shent'i ochenta ana despues ku e yunan di Israel a sali for di tera di Egipto, den e di kuater ana di Salomon su reinado riba Israel, den luna di Zif, ku ta e di dos luna, el a kuminsa traha e kas di SENOR.

²Awor pa loke ta e kas ku rei Salomon a traha pa SENOR, su largura tabata sesenta kodo, su hanchura binti kodo i su haltura trinta kodo.

³I e veranda dilanti di e tempel di e kas tabata binti kodo largu, kual tabata koresponde ku e hanchura di e kas, i su hanchura dilanti di e kas tabata dies kodo.

⁴Tambe el a traha na e kas bentananan ku ta hanchu parti paden i smal parti pafo.

⁵I kontra muraya di e kas el a traha pisonan ku tabata tur ront di e murayanan di e kas, tantu ront di e tempel komo e santuario paden; asina el a traha kambernan tur ront.

⁶E piso di mas abou tabata sinku kodo hanchu, i esun meimei tabata seis kodo hanchu i esun di tres tabata shete kodo hanchu; pasobra na e parti pafo el a traha sosten den e muraya di e kas tur ront, pa no tin mester di hinka e balkinan den e murayanan di e kas.

⁷I ora ku e kas tabata wordu traha, nan a trah'e di piedra prepara kaba na e luga kaminda nan ta koba piedra; i ni martiu ni hacha ni ningun herment di heru no a wordu tend! den e kas mientras ku nan tabata trah'e.

⁸E entrada pa e piso di mas abou tabata na banda drechi di e kas; i pa medio di un trapi ku ta lora bai ariba nan tabata subi bai na e piso meimei, i for di esun di meimei na esun di tres.

⁹Asina el a traha e kas i a kab'e; i el a fura e kas ku balki i tabla di palu di seda.

¹⁰Tambe el a traha e pisonan kontra henter e kas, kada un sinku kodo haltu; i nan a wordu pega na e kas ku palu di seda.

¹¹Awor e palabra di SENOR a yega na Salomon, bisando:

¹²"Tokante di e kas aki ku bo ta trahando, si bo kana den Mi statutonan i ehekuta Mi ordenansanan i warda tur Mi mandamentunan dor di kana den nan, e ora ei lo Mi kumpli ku Mi palabra na bo, ku Mi a papia ku bo tata David.

¹³I lo Mi biba meimei di e yunan di Israel, i lo no bandona Mi pueblo Israel."

¹⁴Asina Salomon a traha e kas i a kab'e.

¹⁵E ora ei el a traha e murayanan di paden di e kas ku tabla di palu di seda; for di flur di e kas te na plafon el a fura e murayanan di paden ku palu, i el a fura flur di e kas ku tabla di sipres.

¹⁶I na parti patras di e kas el a traha binti kodo ku tabla di palu di seda for di flur te na plafon; el a traha nan na e kas parti paden komo un santuario paden, komo e luga santisimo.

¹⁷I e kas, esta, e tempel dilanti di e santuario paden, tabata kuarenta kodo largu.

¹⁸I tabatin palu di seda na e kas paden, graba den forma di kalbas i flor habri; tur kos tabata di palu di seda; no por a mira ningun piedra.

¹⁹E ora ei el a prepara un santuario paden den e kas, pa pone e arka di e aliansa di SENOR ayanan.

²⁰I e santuario paden tabata binti kodo largu, binti kodo hanchu i binti kodo haltu; i el a fur'e ku oro puru. Tambe el a fura e altar ku palu di seda.

²¹Asina Salomon a fura e parti paden di e kas ku oro puru. I el a kologa kadenanan di oro di un banda pa otro dilanti di e santuario paden; i el a fura esaki ku oro.

²²I el a fura henter e kas ku oro, te ora ku henter e kas a keda kla. Tambe henter e altar, ku tabata banda di e santuario paden, el a fura ku oro.

²³Tambe el a traha den e santuario paden dos kerubin di palu di oleifi, kada un dies kodo haltu.

²⁴I esun hala di e kerubin tabata sinku kodo i e otro hala di e kerubin otro sinku kodo; di punta di esun hala te na punta di e otro hala tabata dies kodo.

²⁵I e otro kerubin tabata dies kodo; tur dos kerubin tabatin e mesun midi i e mesun forma.

²⁶E haltura di esun kerubin tabata dies kodo, i e otro kerubin meskos.

²⁷I el a pone e kerubinnan meimei di e kas paden, i e halanan di e kerubinnan tabata habri, asina ku hala di esun tabata toka ku esun muraya, i hala di e otro kerubin tabata toka ku e otro muraya. Asina nan halanan tabata toka ku otro den sentro di e kas.

²⁸Tambe el a fura e kerubinnan ku oro.

²⁹E ora ei el a graba riba tur e murayanan di e kas tur ront figuranan di kerubin, di palma i di flor habri, parti paden i parti pafo.

³⁰I el a fura flur di e kas ku oro, parti paden i parti pafo.

³¹I pa e entrada di e santuario paden el a traha portanan di palu di oleifi, e kosein ariba i e koseinnan-di-porta di forma pentagonular.

³²Asina el a traha dos porta di palu di oleifi, i el a graba riba nan figuranan di kerubin, di palma i di flor habri, i a fura nan ku oro; i el a pone e oro riba e kerubinnan i riba e palmanan.

³³Asina tambe, di palu di oleifi, el a traha koseinnan-di-porta di forma kuadrangular pa e entrada di e tempel,

³⁴i dos porta di palu di sipres; e dos blatnan di esun porta tabata drai ku skarnir, i e dos blatnan di e otro porta tambe tabata drai ku skarnir.

³⁵I el a graba kerubin, palma i flor habri riba dje; i el a kubri e obra graba ku oro, aplika tur kaminda igual.

³⁶I el a traha e plenchi paden di tres kareda di piedra gekap i un kareda di balki di palu di seda.

³⁷Den e di kuater ana fundeshi di e kas di SENOR a wordu poni, den luna di Zif.

³⁸I den e di diesun ana, den luna di Bul, ku ta e di ocho luna, tur parti di e kas a keda kla i konforme tur su plannan. Asina el a traha shete ana riba dje.