Read Papantla Totonac 1 Reinan 7 Bible Online

1 Reinan 7 - Papantla Totonac bible

1 Reinan 7

¹Awor riba su mes kas Salomon a traha diestres ana; i asina el a kaba henter su kas.

²I el a traha e kas di e mondi-sera di Libano; su largura tabata shen kodo i su hanchura sinkuenta kodo i su haltura trinta kodo, riba kuater kareda di pilar di palu di seda, ku balki di palu di seda riba e pilarnan.

³I e tabata fura ku palu di seda na parti ariba di e kambernan na banda, kualnan tabata riba e kuarent'i sinku pilarnan, diesinku den kada kareda.

⁴I tabatin tres kareda di bentana ku ta hanchu parti paden i smal parti pafo, i tabatin bentana enfrente di otro bentana den tres kareda.

⁵I tur e entradanan i koseinnan-di-porta tabatin leishi di forma kuadrangular, i tabatin bentana enfrente di otro bentana den tres kareda.

⁶Despues el a traha e sala di pilarnan; su largura tabata sinkuenta kodo i su hanchura trinta kodo; i tabatin un veranda nan dilanti i pilarnan i un drempel nan dilanti.

⁷I el a traha e sala di trono, kaminda e mester a huzga, e sala di hustisia; i esaki tabata fura ku palu di seda for di flur te na plafon.

⁸I su kas ku e lo a bai biba aden, e otro plenchi mas paden di e sala, tabata di e mesun sorto di trabou. Tambe Salomon a traha un kas manera e sala aki pa Farao su yu muhe, ku kende Salomon a kasa.

⁹Tur esakinan tabata di piedra kostoso, di piedra gekap segun midi, korta ku zag, paden i pafo; i esaki for di fundeshi te na nok, i asina tambe na e parti pafo te na e plenchi grandi.

¹⁰I e fundeshi tabata di piedra kostoso, piedra grandi, piedra di dies kodo i piedra di ocho kodo.

¹¹I ariba tabatin piedra kostoso, piedra gekap segun midi, i palu di seda.

¹²Asina tur ront di e plenchi grandi tabatin tres kareda di piedra gekap i un kareda di balki di palu di seda, meskos ku e plenchi paden di e kas di SENOR, i e veranda di e kas.

¹³Awor rei Salomon a manda buska Hiram for di Tiro.

¹⁴E tabata yu homber di un biuda for di e tribu di Neftali, i su tata tabata un homber di Tiro, un trahado di obra di brons; i e tabata yen di sabiduria, komprendementu i kapasidat pa traha kualke obra di brons. Asina el a bin serka rei Salomon i a hasi tur su trabou.

¹⁵I el a basha e dos pilarnan di brons; diesocho kodo tabata e haltura di un pilar, i un lina-di-midi di diesdos kodo por a pasa ront di tur dos.

¹⁶Tambe el a traha dos kapitel di brons basha pa pone riba kabes di e pilarnan; e haltura di esun kapitel tabata sinku kodo i e haltura di e otro kapitel tabata sinku kodo.

¹⁷Tabatin netnan di knopwerk i hilu lora manera kadena pa e kapitelnan ku tabata riba kabes di e pilarnan; shete pa esun kapitel i shete pa e otro kapitel.

¹⁸Asina el a traha e pilarnan, i dos kareda tur ront di esun knopwerk pa tapa e kapitelnan ku tabata riba top di e granatapelnan; i meskos el a hasi pa e otro kapitel.

¹⁹I e kapitelnan ku tabata riba kabes di e pilarnan den e veranda tabata di diseno di leli, kuater kodo.

²⁰I tabatin kapitelnan tambe riba e dos pilarnan, pega ku e bola ku tabata banda di e knopwerk; i dos shen granatapel den kareda ront di tur dos kapitel.

²¹Asina el a lanta e pilarnan na e veranda di e tempel; i el a lanta e pilar di banda drechi i a yam'e Jakin, i el a lanta e pilar di banda robes i a yam'e Boaz.

²²I riba kabes di e pilarnan tabatin diseno di leli. Asina e trabou di e pilarnan a keda kla.

²³Awor el a traha e laman di metal basha, dies kodo di rant pa rant, den forma rondo, i su haltura tabata sinku kodo, i un lina-di-midi di trinta kodo por a pasa ront di dje.

²⁴I bou di su rant tabatin kalbas pasa tur ront, dies pa kada kodo, ku tabata rondona e laman kompletamente; e kalbasnan tabata den dos kareda, basha huntu ku e restu.

²⁵E laman tabata para riba diesdos buey, tres kara panort, tres kara pabou, tres kara pasuit i tres kara pariba; i e laman tabata poni riba nan, i tur nan parti patras tabata den direkshon paden.

²⁶I e tabata mes diki ku hanchura di un man, i su rant tabata traha manera rant di un kopa, manera un flor di leli; e por a kontene dos mil bato.

²⁷E ora ei el a traha e dies basenan di brons; e largura di kada base tabata kuater kodo i su hanchura kuater kodo i su haltura tres kodo.

²⁸I e diseno di e basenan tabata asin'aki: nan tabatin rant, esta, rant meimei di e leishinan,

²⁹i na e rantnan ku tabata entre e leishinan tabatin leon, buey i kerubin; i na e leishinan tabatin un pedestal ariba, i bou di e leonnan i bueynan tabatin krans ta kologa.

³⁰Awor kada base tabatin kuater wil di brons ku as di brons, i su kuater pianan tabatin stet; bou di e labamano tabatin stet di metal basha, ku krans na kada banda.

³¹I boka di e labamano paden di e korona na e parti ariba tabata un kodo, i su boka tabata rondo manera diseno di un pedestal, un kodo i mei; i tambe na su boka tabatin figuranan graba, i nan rantnan tabata kuadra, no rondo.

³²I e kuater wilnan tabata bou di e rantnan, i e asnan di e wilnan tabata riba e base. I e haltura di un wil tabata un kodo i mei.

³³I e wilnan tabata traha manera wil di garoshi. Nan asnan, nan rimnan, nan spaknan i nan nafnan, tur tabata basha.

³⁴Awor tabatin kuater stet na e kuater skinanan di kada base; su stetnan tabata forma parti di e base mes.

³⁵I na e parti ariba di e base tabatin un rant, mei kodo haltu, tur ront, i na e parti ariba di e base su mannan i su rantnan tabata forma parti di dje.

³⁶I riba superfisio di su mannan i riba su rantnan el a graba kerubin, leon i palma, konforme e espasio disponibel riba kada un, ku krans tur ront.

³⁷El a traha e dies basenan asin'aki: nan tur tabata basha meskos, di e mesun midi i di e mesun forma.

³⁸I el a traha dies labamano di brons, kada labamano tabata kontene kuarenta bato; kada labamano tabata midi kuater kodo, i riba kada un di e dies basenan tabatin un labamano.

³⁹E ora ei el a pone e basenan, sinku na banda drechi di e kas i sinku na banda robes di e kas; i el a pone e laman di metal basha na banda drechi di e kas parti pariba, direkshon suit.

⁴⁰Awor Hiram a traha e labamanonan, e skopnan i e puncheronan. Asina Hiram a termina tur e trabou ku e tabata hasi pa rei Salomon den e kas di SENOR:

⁴¹e dos pilarnan; e dos bolanan di e kapitelnan ku tabata riba kabes di e dos pilarnan; e dos knopwerknan pa tapa e dos bolanan di e kapitelnan ku tabata riba kabes di e pilarnan;

⁴²e kuater shen granatapelnan pa e dos knopwerknan, dos kareda di granatapel pa kada knopwerk, pa tapa e dos bolanan di e kapitelnan ku tabata riba kabes di e pilarnan;

⁴³e dies basenan ku e dies labamanonan riba e basenan;

⁴⁴e laman i e diesdos bueynan bou di e laman;

⁴⁵e hemchinan, e skopnan i e puncheronan. Tur e artikulonan-di-uzo aki ku Hiram a traha pa rei Salomon den e kas di SENOR tabata di brons lombra.

⁴⁶Den e sabana di Jordan rei a basha nan, den tera di klei, entre Sukot i Saretan.

⁴⁷I Salomon a laga tur e artikulonan-di-uzo sin pisa, pasobra nan tabata muchu hopi; e peso di e brons no por a wordu kalkula.

⁴⁸I Salomon a traha tur e artikulonan-di-uzo ku tabatin den e kas di SENOR: e altar di oro; e mesa di oro ku tabatin e pan di e Presensia riba dje;

⁴⁹e kandelanan, sinku na banda drechi i sinku na banda robes, dilanti di e santuario paden, di oro puru; e flornan, e lampinan i e skernan-pa-korta-mecha, di oro;

⁵⁰e kopanan, e kosnan-pa-paga-lampi, e komchinan, e kucharanan i e weanan-pa-kandela, di oro puru; i e skarnirnan, tantu pa e portanan di e kas paden, e luga santisimo, komo pa e portanan di e kas, esta, di e tempel, di oro.

⁵¹Asina tur e trabou ku rei Salomon a hasi den e kas di SENOR a keda kla. I Salomon a trese e kosnan ku su tata David a dedika, e plata i e oro i e artikulonan-di-uzo; i el a pone nan den e luganan-di-warda-tesoro di e kas di SENOR.