Read Papantla Totonac 1 Reinan 8 Bible Online

1 Reinan 8 - Papantla Totonac bible

1 Reinan 8

¹E ora ei Salomon a reuni e ansianonan di Israel i tur e kabesantenan di e tribunan, e lidernan di e kasnan di e tatanan di e yunan di Israel, serka rei Salomon na Jerusalem, pa trese e arka di e aliansa di SENOR for di e stat di David, ku ta Sion.

²I tur e hombernan di Israel a reuni serka rei Salomon na e fiesta, den luna di Etanim, ku ta e di shete luna.

³E ora ei tur e ansianonan di Israel a bin, i e saserdotenan a hisa e arka.

⁴I nan a trese e arka di SENOR, e tent di reunion i tur e artikulonan-di-uzo santu, ku tabatin den e tent; i esakinan e saserdotenan i e levitanan a trese.

⁵Anto rei Salomon i henter e kongregashon di Israel, ku a reuni serka dje, tabata huntu kune dilanti di e arka, i nan tabata ofrese komo sakrifisio asina tantu karne i buey ku nan no por a wordu konta ni numera.

⁶E ora ei e saserdotenan a hiba e arka di e aliansa di SENOR na su luga den e santuario paden di e kas, na e luga santisimo, bou di e halanan di e kerubinnan.

⁷Pasobra e kerubinnan tabatin nan halanan habri ofer di e luga di e arka, i for di ariba e kerubinnan tabata tapa e arka i su baranan.

⁸Ma e baranan tabata asina largu ku por a mira e puntanan di e baranan for di e luga santu dilanti di e santuario paden, ma no por a mira nan di pafo; nan ta ayanan te dia djawe.

⁹No tabatin nada den e arka sino solamente e dos tablanan di piedra ku Moises a pone den dje na Horeb, kaminda SENOR a sera un aliansa ku e yunan di Israel, tempu ku nan a sali for di tera di Egipto.

¹⁰I a sosode ku ora e saserdotenan a sali for di e luga santu, e nubia a yena e kas di SENOR,

¹¹asina ku e saserdotenan no por a keda para pa sirbi, pa motibu di e nubia; pasobra e gloria di SENOR a yena e kas di SENOR.

¹²E ora ei Salomon a bisa: "SENOR a bisa ku E lo biba den e nubia skur.

¹³Siguramente mi a traha un kas magnifiko pa Bo, un luga pa Bo biba aden pa semper."

¹⁴E ora ei rei a bira su kara i a bendishona henter e asamblea di Israel, mientras ku henter e asamblea di Israel tabata para.

¹⁵I el a bisa: "Bendishona sea SENOR, e Dios di Israel, Kende a papia ku Su boka ku mi tata David i a kumpli ku esaki ku Su man, bisando:

¹⁶'For di dia ku Mi a saka Mi pueblo Israel for di Egipto, Mi no a skohe ni un stat for di tur e tribunan di Israel pa traha un kas aden pa Mi nomber por ta ayanan, ma Mi a skohe David pa ta riba Mi pueblo Israel.'

¹⁷"Awor tabata riba kurason di mi tata David pa traha un kas pa e nomber di SENOR, e Dios di Israel.

¹⁸Ma SENOR a bisa mi tata David: 'Pasobra tabata riba bo kurason pa traha un kas pa Mi nomber, bo a hasi bon di tin esaki riba bo kurason.

¹⁹Sinembargo, abo lo no traha e kas, ma bo yu homber ku lo sali for di bo lomo, e lo traha e kas pa Mi nomber.'

²⁰"Awor SENOR a kumpli ku Su palabra ku El a papia; pasobra mi a lanta na luga di mi tata David i ta sinta riba trono di Israel, manera SENOR a priminti; i mi a traha e kas pa e nomber di SENOR, e Dios di Israel.

²¹I ayanan mi a traha un luga pa e arka, ku tin e aliansa di SENOR aden, kual El a sera ku nos tatanan, tempu ku El a saka nan for di tera di Egipto."

²²E ora ei Salomon a bai para dilanti di e altar di SENOR den presensia di henter e asamblea di Israel i a habri su mannan na shelu.

²³I el a bisa: "O SENOR, e Dios di Israel, no tin ningun Dios manera Bo, ni ariba den shelu ni abou riba tera, Kende ta warda e aliansa i ta mustra miserikordia na Bo sirbidonan ku ta kana Bo dilanti ku henter nan kurason,

²⁴Kende a kumpli ku Bo sirbido, mi tata David, loke Bo a primintie; di berdat, Bo a papia ku Bo boka i a kumpli ku esaki ku Bo man, manera ta e kaso awe.

²⁵"Pesei anto, O SENOR, e Dios di Israel, kumpli ku Bo sirbido, mi tata David, loke Bo a primintie, bisando: 'Lo bo no falta un homber pa sinta riba trono di Israel, kontal ku bo yu hombernan perkura di warda nan kaminda, pa kana Mi dilanti manera abo a kana.'

²⁶Pesei anto, O Dios di Israel, mi ta pidiBo, laga Bo palabra ku Bo a papia ku Bo sirbido, mi tata David, keda konfirma.

²⁷"Ma di berdat Dios lo biba riba tera? Mira, shelu i e shelu di shelunan no por konteneBo; kuantu menos e kas aki ku mi a traha!

²⁸Sinembargo, pone atenshon na e orashon di Bo sirbido i na su suplika, O SENOR mi Dios, pa skucha e sklamashon i e orashon ku Bo sirbido ta hasi awe Bo dilanti;

²⁹ku Bo wowo por ta habri di nochi i di dia den direkshon di e kas aki, den direkshon di e luga di kual Bo a bisa: 'Mi nomber lo ta ayanan,' pa skucha e orashon ku Bo sirbido lo hasi den direkshon di e luga aki.

³⁰I skucha e suplika di Bo sirbido i di Bo pueblo Israel, ora nan ta hasi orashon den direkshon di e luga aki; tende Abo den shelu, Bo luga di biba; tende i pordona.

³¹"Si un hende peka kontra su prohimo i wordu obliga pa hasi huramentu, i e bin hura dilanti di Bo altar den e kas aki,

³²e ora ei tende Abo den shelu, i aktua i huzga Bo sirbidonan, i kondena e malbado dor di trese su manera di aktua riba su mes kabes, i hustifika e hustu dor di dun'e segun su hustisia.

³³"Ora Bo pueblo Israel wordu derota dilanti di un enemigu, pasobra nan a peka kontra Bo, si nan bolbe serka Bo atrobe i konfesa Bo nomber i hasi orashon i suplika na Bo den e kas aki,

³⁴e ora ei tende Abo den shelu, i pordona e pika di Bo pueblo Israel i trese nan bek na e tera ku Bo a duna nan tatanan.

³⁵"Ora ku e shelunan keda sera i no tin awaseru, pasobra nan a peka kontra Bo, i nan hasi orashon den direkshon di e luga aki i konfesa Bo nomber, i bira for di nan pika ora Bo afligi nan,

³⁶e ora ei tende Abo den shelu i pordona e pika di Bo sirbidonan i di Bo pueblo Israel, si, sina nan e bon kaminda ku nan mester kana aden. I manda awaseru riba Bo tera ku Bo a duna Bo pueblo komo erensia.

³⁷"Ora tin hamber den e tera, of pestilensia, pispis of beskem, tirakochi bruin of tirakochi berde; ora nan enemigu rondona nan den e tera di nan statnan; kualke plaga of kualke malesa ku sea;

³⁸kualke orashon of suplika ku un hende of ku henter Bo pueblo Israel hasi, ora kada un konose e aflikshon di su mes kurason, i ta habri su mannan den direkshon di e kas aki--

³⁹e ora ei tende Abo den shelu, Bo luga di biba, i pordona, i aktua, i duna kada un segun tur su kamindanan, kende su kurason Bo konose (pasobra ta Abo so konose kurason di tur e yunan di hende),

⁴⁰pa nan tin temor pa Bo tur e dianan ku nan ta biba den e tera ku Bo a duna nos tatanan.

⁴¹"Tambe tokante di e stranhero ku no ta di Bo pueblo Israel, ora ku e bin for di un tera leu pa kousa di Bo nomber

⁴²(pasobra nan lo tende di Bo gran nomber i Bo man poderoso i di Bo brasa ekstendi), ora ku e bin hasi orashon den direkshon di e kas aki,

⁴³tende Abo den shelu, Bo luga di biba, i hasi konforme tur loke e stranhero pidiBo, pa tur e pueblonan di tera por konose Bo nomber, pa tin temor pa Bo manera Bo pueblo Israel, i pa nan sa ku e kas aki ku mi a traha ta wordu yama na Bo nomber.

⁴⁴"Ora Bo pueblo sali pa bai bringa kontra nan enemigu, unda ku Bo manda nan, i nan hasi orashon na SENOR den direkshon di e stat ku Bo a skohe i e kas ku mi a traha pa Bo nomber,

⁴⁵e ora ei tende den shelu nan orashon i nan suplika, i sostene nan kousa.

⁴⁶"Ora nan peka kontra Bo (pasobra no tin ningun hende ku no ta peka) i Bo ta rabia ku nan i ta entrega nan na un enemigu, asina ku nan ta hiba nan komo katibu na tera di e enemigu, sea leu of serka;

⁴⁷si nan pensa bon na e tera kaminda nan a wordu hiba komo katibu, i repenti, i hasi suplika na Bo na e tera di esnan ku a hiba nan komo katibu, bisando: 'Nos a peka i a komete inikidat, nos a hasi maldat';

⁴⁸si nan bolbe serka Bo ku henter nan kurason i ku henter nan alma na e tera di nan enemigunan ku a hiba nan komo katibu, i nan hasi orashon na Bo den direkshon di nan tera ku Bo a duna nan tatanan, e stat ku Bo a skohe i e kas ku mi a traha pa Bo nomber,

⁴⁹e ora ei tende nan orashon i nan suplika den shelu, Bo luga di biba, i sostene nan kousa,

⁵⁰i pordona Bo pueblo ku a peka kontra Bo i tur nan transgreshonnan ku nan a transgresa kontra Bo, i laga nan hana kompashon serka esnan ku a hiba nan komo katibu, pa nan tin kompashon di nan

⁵¹(pasobra nan ta Bo pueblo i Bo erensia ku Bo a saka for di Egipto, for di meimei di e fornu di heru),

⁵²pa Bo wowo por ta habri pa e suplika di Bo sirbido i pa e suplika di Bo pueblo Israel, pa skucha nan ki ora ku nan yama na Bo.

⁵³Pasobra Bo a separa nan for di tur e pueblonan di tera komo Bo erensia, manera Bo a papia pa medio di Bo sirbido Moises, tempu ku Bo a saka nos tatanan for di Egipto, O Senor DIOS."

⁵⁴I a sosode ku ora Salomon a kaba di hasi henter e orashon i suplika aki na SENOR, el a lanta for di dilanti di e altar di SENOR, kaminda e tabata na rudia ku su mannan habri na shelu.

⁵⁵I el a para i a bendishona henter e asamblea di Israel na bos haltu, bisando:

⁵⁶"Bendishona sea SENOR, Kende a duna sosiegu na Su pueblo Israel, konforme tur loke ku El a priminti; ni un palabra di tur Su bon promesa ku El a hasi pa medio di Su sirbido Moises no a faya.

⁵⁷Ku SENOR nos Dios sea ku nos, manera E tabata ku nos tatanan; ku E no laga nos ni bandona nos,

⁵⁸ku E hala nos kurason serka djé, pa kana den tur Su kamindanan i pa warda Su mandamentunan, Su statutonan i Su ordenansanan, ku El a ordena nos tatanan.

⁵⁹I ku e palabranan aki di mi, ku kualnan mi a hasi suplika dilanti di SENOR, keda serka di SENOR nos Dios di dia i anochi, pa E sostene e kousa di Su sirbido i e kousa di Su pueblo Israel, manera kada dia ta eksigi,

⁶⁰asina ku tur e pueblonan di tera por sa ku SENOR ta Dios; no tin ningun otro.

⁶¹Pesei, laga boso kurason ta kompletamente dedika na SENOR nos Dios, pa kana den Su statutonan i pa warda Su mandamentunan, manera riba e dia djawe."

⁶²Awor rei i henter Israel huntu kune a ofrese sakrifisionan dilanti di SENOR.

⁶³I Salomon a ofrese komo e sakrifisio di ofrendanan di pas, ku el a ofrese na SENOR, bint'i dos mil buey i shent'i binti mil karne. Asina rei i tur e yunan di Israel a dedika e kas di SENOR.

⁶⁴Riba e mesun dia rei a konsagra e parti meimei di e plenchi ku tabata keda dilanti di e kas di SENOR, pasobra einan el a ofrese e ofrenda kima, e ofrenda di mainshi i e vet di e ofrendanan di pas; pasobra e altar di brons ku tabata dilanti di SENOR tabata muchu chikitu pa kontene e ofrenda kima, e ofrenda di mainshi i e vet di e ofrendanan di pas.

⁶⁵Asina Salomon a selebra e fiesta e dia ei, i henter Israel huntu kune, un asamblea grandi for di e entrada di Hamat te na e roi di Egipto, dilanti di SENOR nos Dios, pa shete dia i shete dia mas, esta, dieskuater dia.

⁶⁶Riba e di ocho dia el a manda e pueblo bai i nan a bendishona rei. E ora ei nan a bai na nan tentnan ku goso i ku kurason kontentu pa tur e bondat ku SENOR a mustra na Su sirbido David i na Su pueblo Israel.