Read Papantla Totonac 1 Reinan 9 Bible Online

1 Reinan 9 - Papantla Totonac bible

1 Reinan 9

¹Awor a sosode ku ora Salomon a kaba di traha e kas di SENOR, i rei su kas, i tur loke Salomon tabata desea di hasi,

²SENOR a parese na Salomon pa di dos biaha, manera El a parese na dje na Gabaon.

³I SENOR a bis'e: "Mi a tende bo orashon i bo suplika ku bo a hasi Mi dilanti; Mi a konsagra e kas aki ku bo a traha dor di pone Mi nomber ayanan pa semper, i Mi wowo i Mi kurason lo ta einan kontinuamente.

⁴"I pa loke t'abo, si bo kana Mi dilanti manera bo tata David a kana, den integridat di kurason i den rektitut, hasiendo konforme tur loke Mi a ordenabo, i si bo warda Mi statutonan i Mi ordenansanan,

⁵e ora ei lo Mi stablese e trono di bo reino riba Israel pa semper, manera Mi a priminti bo tata David, bisando: 'Lo bo no falta un homber riba trono di Israel.'

⁶"Ma si abo of bo yu hombernan laga di siguiMi, i no ta warda Mi mandamentunan i Mi statutonan ku Mi a pone boso dilanti, i boso bai sirbi otro diosnan i adora nan,

⁷e ora ei lo Mi korta Israel kita for di e tera ku Mi a duna nan, i e kas ku Mi a konsagra pa Mi nomber, lo Mi tira for di Mi bista. Asina Israel lo bira un proverbio i un refran den tur pueblo.

⁸I e kas aki lo bira un monton di ruina; ken ku pasa banda di dje lo keda asombra, i lo hasi bofon i bisa: 'Pakiko SENOR a hasi asina ku e tera aki i ku e kas aki?'

⁹I nan lo bisa: 'Pasobra nan a bandona SENOR nan Dios, Kende a saka nan tatanan for di tera di Egipto, i a adopta otro diosnan, a adora nan i a sirbi nan; pesei SENOR a trese tur e atversidat aki riba nan.'"

¹⁰I a sosode ku na fin di binti ana den kualnan Salomon a traha e dos kasnan, e kas di SENOR i e kas di rei

¹¹(Hiram, rei di Tiro, a provee pa Salomon palu di seda i di sipres i oro, kuantu ku e tabata desea), rei Salomon a duna Hiram binti stat den e tera di Galilea.

¹²Asina Hiram a sali for di Tiro pa bai mira e statnan ku Salomon a dun'e, i e no a gusta nan.

¹³I el a bisa: "Ta ki sorto di statnan esakinan ta ku bo a dunami, mi ruman?" I nan a yama nan tera di Kabul te dia djawe.

¹⁴I Hiram a manda shent'i binti talento di oro pa rei.

¹⁵Awor esaki ta e relato tokante di e trabou forsa ku rei Salomon a eksigi pa traha e kas di SENOR, su mes kas, e sitadel, e muraya di Jerusalem, Hazor, Meguido i Gezer.

¹⁶Farao, rei di Egipto, a bai i a kaptura Gezer, i a kim'e ku kandela, a mata e kananeonan ku tabata biba den e stat, i a duna esaki komo regalo di bruit na su yu muhe, esposa di Salomon.

¹⁷Asina Salomon a rekonstrui Gezer i Bet-horon-abou,

¹⁸i Baalat i Tamar den desierto, na tera di Juda,

¹⁹i tur e statnan di deposito ku Salomon tabatin, e statnan pa su garoshinan i e statnan pa su koredonan di kabai, i tur loke Salomon tabata desea di traha na Jerusalem, na Libano i na henter e tera bou di su dominio.

²⁰Pa loke ta henter e pueblo ku a keda di e amoreonan, e heteonan, e ferezeonan, e heveonan i e jebuseonan, kendenan no tabata pertenese na e yunan di Israel,

²¹nan desendientenan ku a keda despues di nan na e tera ku e yunan di Israel no tabata por a destrui kompletamente, for di esakinan Salomon a eksigi trahado forsa te dia djawe.

²²Ma Salomon no a hasi ningun di e yunan di Israel esklabu, pasobra nan tabata hombernan di guera, su sirbidonan, su prensnan, su kapitannan, su komandantenan di garoshi i su koredonan di kabai.

²³Esakinan tabata e ofisialnan prinsipal ku tabatin enkargo di e trabou di Salomon, sinku shent'i sinkuenta, kendenan tabata goberna e pueblo ku tabata hasi e trabou.

²⁴Asina ku Farao su yu muhe a sali for di e stat di David pa bai su kas ku Salomon a traha p'e, Salomon a traha e sitadel.

²⁵Awor tres biaha pa ana Salomon tabata ofrese ofrendanan kima i ofrendanan di pas riba e altar ku el a traha pa SENOR, i tabata kima sensia huntu ku esakinan riba e altar ku tabata dilanti di SENOR. Asina el a kaba e kas.

²⁶Tambe rei Salomon a traha un flota di barku na Ezion-geber, ku ta keda serka di Elot kantu di Laman Kora, na tera di Edom.

²⁷I Hiram a manda su sirbidonan ku e flota, marineronan ku tabata konose laman, huntu ku e sirbidonan di Salomon.

²⁸I nan a bai Ofir i a buska kuater shent'i binti talento di oro for di ayanan, i a trese esaki pa rei Salomon.