Read Papantla Totonac 2 Reinan 1 Bible Online

2 Reinan 1 - Papantla Totonac bible

2 Reinan 1

¹Awor Moab a rebeldia kontra Israel despues di morto di Akab.

²I Okozias a kai dor di e trali di su kamber ariba na Samaria, i a bira malu. Anto el a manda mensaheronan i a bisa nan: "Bai, konsulta ku Baal-zebub, e dios di Ekron, si mi ta rekupera di e malesa aki."

³Ma e Angel di SENOR a bisa Elias e tisbita: "Lanta, bai kontra ku e mensaheronan di rei di Samaria i bisa nan: 'Ta pasobra no tin Dios na Israel pesei boso ta bai konsulta ku Baal-zebub, e dios di Ekron?'

⁴Pesei anto, asina SENOR ta bisa: 'Lo bo no baha for di e kama ku bo a subi, ma lo bo muri sigur.'" Anto Elias a bai.

⁵Ora ku e mensaheronan a bolbe serka dje, el a bisa nan: "Pakiko boso a bin bek?"

⁶I nan a bis'e: "Un homber a bin kontra ku nos i a bisa nos: 'Bai bek serka e rei ku a manda boso i bis'e: "Asina SENOR ta bisa: 'Ta pasobra no tin Dios na Israel pesei bo ta manda konsulta ku Baal-zebub, e dios di Ekron? Pesei lo bo no baha for di e kama ku bo a subi, ma lo bo muri sigur.

⁷I el a bisa nan: "Kon e homber, ku a bin kontra ku boso i ku a papia e palabranan aki ku boso, tabata?"

⁸I nan a kontest'e: "E tabata un homber yen di kabei ku un faha di kueru mara na su hep." I el a bisa: "Ta Elias e tisbita."

⁹E ora ei rei a manda serka dje un kapitan di sinkuenta ku su sinkuentanan. I el a bai serka Elias, i mira, e tabata sinta riba kabes di e seru. I el a bis'e: "O homber di Dios, rei ta bisa: 'Baha.'"

¹⁰I Elias a kontesta i a bisa e kapitan di sinkuenta: "Si mi ta un homber di Dios, laga kandela baha for di shelu i kaba ku bo i ku bo sinkuentanan." E ora ei kandela a baha for di shelu i a kaba kune i ku su sinkuentanan.

¹¹Anto rei a bolbe manda serka dje un otro kapitan di sinkuenta ku su sinkuentanan. I el a kontesta i a bis'e: "O homber di Dios, asina rei ta bisa: 'Baha lihe.'"

¹²I Elias a kontesta i a bisa nan: "Si mi ta un homber di Dios, laga kandela baha for di shelu i kaba ku bo i ku bo sinkuentanan." E ora ei kandela di Dios a baha for di shelu i a kaba kune i ku su sinkuentanan.

¹³Asina el a bolbe manda e kapitan di e di tres trupa di sinkuenta ku su sinkuentanan. Ora ku e di tres kapitan di sinkuenta a subi bai, el a yega i a hinka rudia dilanti di Elias, i a rogu'e i a bis'e: "O homber di Dios, pa fabor, laga mi bida i e bida di bo sinkuenta sirbidonan aki ta presioso den bo bista.

¹⁴Mira, kandela a baha for di shelu i a kaba ku e prome dos kapitannan di sinkuenta ku nan sinkuentanan; ma awor, laga mi bida ta presioso den bo bista."

¹⁵I e Angel di SENOR a bisa Elias: "Baha bai kune; no tene miedu di dje." Asina el a lanta i a baha bai kune serka rei.

¹⁶E ora ei el a bis'e: "Asina SENOR ta bisa: 'Pasobra bo a manda mensaheronan pa konsulta ku Baal-zebub, e dios di Ekron--ta pasobra no tin Dios na Israel pa konsulta ku Su palabra?--pesei lo bo no baha for di e kama ku bo a subi, ma lo bo muri sigur.'"

¹⁷Asina Okozias a muri konforme e palabra di SENOR ku Elias a papia. I pasobra e no tabatin yu homber, Joram a bira rei na su luga den e di dos ana di Joram, yu homber di Josafat, rei di Juda.

¹⁸Awor e demas echonan di Okozias ku el a hasi, nan no ta para skirbi den e Buki di Kronikanan di e Reinan di Israel?